Biroken Dagidiay Siuumiso a Maikari
1 Ti maysa a panggep ti panangasabatayo isut’ panangsapul kadagidiay “siuumiso a maikari iti agnanayon a biag.” (Ara. 13:48) Ti panangiwaras kadagiti Pagwanawanan ken Agriingkayo! ket maysa nga ekselente a wagas ti panangitungpal iti daytoy. Itampoktayo dagiti magasin bayat ti Abril. Manamnama, a no adda interes, makairugitay kadagiti baro a panangyadal ti Biblia iti libro a Pannakaammo a Mangiturong iti Biag nga Agnanayon. Adtoy ti sumagmamano a singasing a mabalin nga agkurri kadakayo:
2 Ti panangusar iti Abril 1 a “Pagwanawanan,” a mangipamaysa iti diskurso publiko ti kombension distrito itay napan a tawen nga, “Idaydayawyo ti Ari ti Kinaagnanayon!,” mabalinyo a kunaen daytoy:
◼ “Adu a tattao ti nakasaomi nga addaan pammati iti Dios. Marigatan dagiti dadduma a mamati kenkuana. Ania ti mariknayo? [Palubosan a sumungbat.] Nalawlawtayo kadagiti nabatad nga ebidensia a mangpaneknek a talaga nga adda Dios. [Basaen ti Salmo 104:24.] No makakitatayo iti kamera wenno kompiuter, ammotayo a sigurado nga inaramid dayta ti maysa nga intelihente a diseniador. Nainkalintegan ngata a kunaen a dagiti narikrikut a banag, kas iti daga ken datayo a tattao ket timmaud nga aksidente?” Usaren ti parapo manipud artikulo a mangipakita iti nalawag a rason a pamatian iti Dios. No adda interes, itukon dagiti magasin.
3 Itampok ti Abril 15 a “Pagwanawanan” ti artikulo nga “Umawat iti Bendision ti Dios ti Pudno a Panagdayaw.” Sakbay nga itukonyo, mabalinyo nga isaludsod:
◼ “Kadagiti ginasut a relihion nga adda ditoy lubong, kunaenyo kadi nga awaten amin ida ti Dios? [Palubosan nga agkomento.] Impadto ni Jesus nga iti laksid ti panangibilang dagiti adu a relihioso a tattao, dinto maawat dagidiay saan a mangar-aramid iti pagayatan ti Dios. [Basaen ti Mateo 7:21-23.] Nasken a mailasintayo ti pudno a relihion nga insuro ni Jesus.” Luktan iti paulo nga “Ania Dagiti Bunga a Masapul a Patauden ti Pudno a Relihion?,” a mangrugi iti panid 16, ken pagsaritaan ti maysa nga ehemplo a mangyilustrar iti punto.
4 No maitampok ti kangrunaan a topiko iti Abril 22 nga “Agriingkayo!,” “Inton Awanen Dagiti Gubat,” mabalinyo a kunaen:
◼ “Iti daytoy a siglo addan ginasut a gubgubat, agraman dua a sangalubongan a gubat. Kaskasdi a gistay amin a papangulo ti lubong kunaenda a kayatda ti talna. No tunggal maysa kayatna ti talna, apay a dida maragpat dayta? [Palubosan a sumungbat.] Ania ti pagarupyo a kasapulan tapno makitatayo ti pudno a talna ditoy daga?” Kalpasan a sumungbat ti bumalay, luktan iti panid 8 ken 9 sa basaen dagiti teksto a kas iti Salmo 46:8, 9. Usaren dagiti ladawan ken kasuratan a nakotar a mangipakita no kasano nga iyegto ti Pagarian ti Dios ti sangalubongan a talna nga agpaut iti agnanayon. Kalpasanna itukon ti magasin ken iyurnos ti panagsubli.
5 Siguraduenyo nga ikkan ti gundaway ti amin a masabetyo a magunggonaan iti panagbasa Ti Pagwanawanan ken Agriingkayo!, a mangyeg ti “naimbag a damag iti nasaysayaat a banag.”—Isa. 52:7.