Sawen ti Kinapudno iti Kaarrubayo
1 Idinto ta pagminaren dagiti magasin a Pagwanawanan ken Agriingkayo! ti mensahe ti Biblia a kinapudno, ti panangiwaras kadagitoy a pagbasaan bayat ti bulan ti Mayo ket maysa a wagas a ‘panangisaotayo ti kinapudno kadagiti kaarrubatayo.’ (Efe. 4:25) Adtoy ti sumagmamano a kapanunotan a tumulong kadatayo a mangirugi:
2 Rebbeng a maitampok ti Abril 22 nga “Agriingkayo!” agingga a maibus ti abastoyo. Mabalinyo nga irugi ti presentasionyo babaen iti panangisaludsod:
◼ “Ania ti makunayo iti maysa a lubong nga awan ti gubat? [Palubosan a sumungbat.] Ammoyo kadi a dagiti relihion ti lubong ket aktual nga itantandudoda dagiti gubat ken pinnatayan? [Palubosan a sumungbat.] Iti nalawag a pannakaisupadi, siputanyo no ania ti kuna ti Biblia nga aramiden dagiti pudno a managdaydayaw ti Dios.” Basaen ti Isaias 2:2-4 manipud iti ngato ti panid 4 ti magasin, sa iti panid 10 basaenyo ti umuna a parapo iti baba ti subtema nga “Awis Kadagiti Managayat ti Talna.” Sumaruno, isaludsodyo: “Ammoyo kadi no kasano nga aramiden ti Dios dayta? Masarakan ti sungbat iti daytoy a magasin, ket daytoy ti basaenyo a kopiayo.”
3 No itukonyo ti Mayo 15 a “Pagwanawanan,” ipadasyo a dakamaten ti kallabes a pasamak a naipadamag a nakariknaan dagiti tattao ti kinaawan talged, sa isaludsodyo:
◼ “Ania ti pagarupyo a kasapulan tapno pudno a mariknatayo a natalgedtay iti daytoy a biag? [Palubosan a sumungbat.] Iti agpaypayso, pudno kadi a makapagtalektayo iti tattao a mangsolbar kadagiti problema a sangsanguen ti sangatauan? [Palubosan a sumungbat; sa basaen ti Salmo 146:3.] Sumaganad, ikkannatayo ti salmista iti rason nga agbalin a positibo maipapan ti masanguanan. [Basaen ti Salmo 146:5, 6.] Daytoy nga artikulo, ‘Pudno a Kinatalged, Ita ken iti Agnanayon,’ ilawlawagna no apay a makapagtalektayo ken Jehova a Dios a mangyeg iti nasaysayaat a kasasaad ditoy daga. Itukon ti magasin sa iyurnos ti panagsubli.
4 Maigapu iti nasaknap a kinaawan panagtalek dagiti tattao ita, nalabit mabalin nga usaren ti artikulo nga “Apay a Diak Makataginayon Kadagiti Gagayyem?” iti “Agimtuod Dagiti Agtutubo” iti Mayo 22 nga “Agriingkayo!” Mabalinyo nga isaludsod:
◼ “Ipategtay amin dagiti nasayaat a gagayyem. Ti panagkunayo, ania ti sekreto ti manayon a pannakigayyem? [Palubosan a sumungbat.] Kitaenyo no ania ti kinuna ni Jesus iti Mateo 7:12. [Basaen, sa komentuan bayat nga ipakpakita ti artikulo.] Impakita ni Jesus no ania a talaga ti pudpudno a pannakigayyem iti Juan 15:13. [Basaen.] Ammok a tagiragsakenyonto a basaen daytoy nga artikulo.” Itukon sa iyurnos ti panagsubliyo.
5 No kaykayatyo ti ababa a panangiparang, mabalinyo nga ipadas daytoy:
◼ “Adu ti mangipapan a naglaon ti kaaduan a magasin ita iti nawadwad unay a komersialismo, sekso, wenno kinaranggas. [Ipakita Ti Pagwanawanan ken Agriingkayo!] Iwarwarasmi dagitoy makaay-ayo a babasaen a naibasar iti Biblia. Pudno nga edukasional unay dagitoy ken maisurodatayo nga agdayaw iti Dios, ayaten dagiti kaarrubatayo, ken mangtaginayon iti nalinteg a kondukta. Ammok a pagragsakanyonto a basaen dagitoy a ruar.”
6 No napingettayo nga agsao iti kinapudno kadagiti kaarrubatayo, nalabit makaiyegtayo iti dakkel a rag-o kadagiti adu.—Ara. 8:4, 8.