Isagana Dagiti Estudiante ti Biblia iti Ministerio
1 Ti kalat a mangidaulo kadagiti panagadal ti Biblia isut’ panangaramid kadagiti baro a disipulo a makiraman kadatayo a mangisuro iti sabsabali. (Mat. 28:19, 20) Gapuna ti panggeptayo ket saan laeng a mangisuro iti pannakaammo; kayattayo met nga imula iti naimpusuan a pammati kadagiti estudiantetayo ken isagana ida a mangiranud ti namnamada iti dadduma. (2 Cor. 4:13) Kasanotayo a matulongan ida nga agbalin a kualipikado a mangisuro iti sabsabali?—2 Tim. 2:2.
2 Ituding ti Ministerio a kas Kalat: Manipud pay rugi, aramiden a nalawag a ti pudno a panagdayaw ket ramanenna iti “publiko a panangideklara maipaay ti pannakaisalakan.” (Roma 10:10) Ti mismo a nagantayo, a Saksi ni Jehova, ipamatmatna a masapul a makisaotayo iti tattao. Tulongan ida a kumita a ti pannakaisuroda ket saan laeng a maipaay iti bukodda a pannakaisalakan. Inton agbalinda a manursuro a mismo, dagidiay dumngeg kadakuada ket magundawayanda met ti maisalakan.—1 Tim. 4:16.
3 Repasuen No Ania ti Naadal: Ti sagpaminsan a repaso ti tumulong iti estudiante a rumang-ay ti espiritual bayat a dagiti baro a naadal a kinapudno ket maimula iti panunot ken pusona. Kapadasantayo dayta a mismo no sungbatan dagiti pangrepaso a saludsod a nairaman iti Panagadal ti Pagwanawanan iti kada lawas. Maisagana a simple dagiti saludsod ti kada lawas nga agpaay a sungbatan iti estudiante babaen ti bukodna a sasao.
4 Ti repasoyo ti maiyasping iti langa ti serbisio iti tay-ak. Maisango ti saludsod a masansan a masabet no mangasabatayo iti sabsabali. Bayat nga aglugarkayo kas bumalay, idemostra ti estudianteyo no ania ti sawenna. Komendaranyo no ania ti naimbag a naaramidanna, ket itukonyo dagiti singasing a makatulong pay kenkuana nga mas epektibo iti sumaruno a daras. Daytoy a panagsanay ti mangisuro kenkuana no kasano nga usarenna dagiti naadalna ken mapatanorna ti laingna a mangusar ti Biblia.
5 Panakirinnason a Libro: Siguruenyo a ti estudianteyo ket adda kopiana a Panakirinnason a libro, ken sanayenyo a mangusar iti dayta. Ipakita no kasano a maipaay daytoy dagiti singasing ti panangirugi iti saritaan, panangsungbat kadagiti saludsod iti Biblia, ken pangsumra kadagiti pangontra. Usaren ti libro iti linawas a panagadal a mangidemostra ti wagas iti pannakisao kadagiti dadduma. Daytoy a libro ti mangpabileg iti talekna, a maparang-ay ti reggetna a mangideklara iti damag ti Pagarian.
6 Igunamgunam ti Pateg Dagiti Gimong: Dagiti gimong ti kongregasion, nangruna ti Gimong iti Serbisio ken Teokratiko a Pagadalan iti Ministerio, isuda ti nadisenio a mangisagana kadatayo iti tay-ak ti serbisio. Maigunamgunam ti pateg dagitoy a gimong, ket tulongam a tumabuno. Ti regular nga itatabuno ti mangted iti estudianteyo ti pammaregta nga agbalin a pudno a disipulo ni Jesus.
7 Dikay koma liplipatan iti bukodyo nga ehemplo. Ti kinaregularyo iti panangasaba a trabaho ti mangipakita iti napasnek a panangipategyo ti kinapudno. Ti kasta a kurso ti mamaregta iti estudianteyo a mangaramid pay ti ad-adu a mangidemostra ti pammatina. (Luc. 6:40) Amin dagitoy ti tumulong iti maysa nga agdadamo a mangmatmat iti ministerio a kas pribilehio ken maragsakan a makiraman iti dayta.—1 Tim. 1:12.