Panangparayray ti Interes Kadagiti Panagsarungkar
1 Ti ministerio maiyasping iti panagtalon, ket ti panagsarungkar maidilig iti panangringkon ken panangpadanum. (Mat. 13:23; Luc. 10:2; 2 Cor. 9:10) Kas “katrabahuan ti Dios,” addaantayo ti obligasion a tumulong iti aniaman a karrusing a bukel a dumakkel ti kinatangkenan ken kinabunga. (1 Cor. 3:6, 9) Kasanotayo a maibanag daytoy iti kasayaatan?
2 Sapaenyo ti agsarungkar. Repasuenyo iti house-to-house a rekord, ket ikeddengyo no ania ti pagsaritaan, maibasar iti nalpasen a napagsaritaan iti umuna a bisita. Kanayon a nasayaat no usaren ti Biblia, a bigbigen a ti bilegna ket dumanon iti puso.—Heb. 4:12.
3 No nakaibatikayo iti broshur a “Pudno Aya a Maseknan ti Dios Kadatayo?,” mabalinyo a rugian babaen ti panagkuna a kastoy:
◼ “Adu a tattao ti mamati a ti Dios ket dadaelenna ti daga, bayat nga agamak dagiti dadduma a ti tao a mismo ti mangaramid iti dayta. Ania ti makunayo? [Palubosan a sumungbat.] Ibaga kadatayo ti Biblia nga imbes a dadaelenna daytoy daga, dalusan ti Dios manipud kinakillo, nga aramidenna a lugar iti talna ken talged.” Iturong iti panid 22, ken basaen ti Proverbio 2:21, 22, a sadiay ti nakakotaranna. Mailawlawag ti urnos iti panagadal ti Biblia iti pagtaengan.
4 No nakapaimakayo iti “Adtoy!” a broshur, mabalinyo a kunaen:
◼ “Idi napan a bisitak, nabasatayo maipapan iti kari ti Dios a mangaramid iti amin a bambanag a baro. Datayo ken dagiti ingongotentayo ket agragsak iti daytoy a bendision babaen ti panangadal iti ad-adu maipapan ti pagayatan ti Dios ken no kasano a maiyaplikar iti biagtayo.” Basaen ti Juan 17:3, ken ukagen iti parapo 52 ken 53 iti panid 27.
5 No sarunuen ti naipaima a “Panggep ti Biag” a broshur iti maysa a relihioso a tao, mabalin a masarakanyo a maiparbeng a kunaen:
◼ “Nalabit nga ul-ulitenyo iti kararag ti Apo iti adu a daras. Ania ti sumiplot iti panunotyo no kiddawenyo nga umayen ti Pagarian ti Dios?” Kas pangsaruno iti sungbat ti bumalay, dakamatenyo ti parapo 8 ken 9 iti panid 26, kalpasanna basaenyo ti Daniel 2:44. Ilawlawagyo a ti iyaay iti Pagarian ti Dios ket kaipapananna iti panagngudo ti kinadakes ken panagsagaba.
6 Laglagipenyo a ti sarungkar ket mabalin a maaramid iti siasinoman a sidadaan a dumngeg, adda man naibati a literatura wenno awan. Padasenyo nga iyiskediol ti tiempo iti kada lawas nga agsarungkar. Bendisionan koma ni Jehova ti kinareggetyo tapno agbunga a maipaay iti dayawna.—Juan 15:8.