Dida Nagkedked a Nangaskasaba
1 Ti nagantayo a Saksi ni Jehova, deskribirenna ti trabahotayo. Saksiantayo ti kinatan-ok ni Jehova a Diostayo. (Isa. 43:10, 12) Masapul a makiraman ti tunggal maysa iti daytoy a panangsaksi no kayatna ti agbalin a kameng ti kongregasion. Iraman ti panangsaksi ti ipapan iti binalaybalay, panangasaba iti lanlansangan, panagsarungkar, ken panangyadal ti Biblia. Nainkalintegan a maidagadag kadatay amin ti naan-anay a pannakiraman.—1 Cor. 15:58.
2 Nupay kasta, nakedngan ti maaramidan ti dadduma a kameng ti kongregasion. Ti nakaro a sakit wenno an-annayen ti manglapped kadakuada. Dagiti bumusbusor a kabagian mabalin a dakkel a lapped. Nalabit pawilan ti di manamati a naganak ti maysa nga agtutubo. Mabalin a riknaen dagidiay agtataeng iti naiputputong a lugar a kasla imposible ti mangasaba. Dagiti managbabain mabalin a bumdengda. Nalabit ipagarup ti sumagmamano nga agibumbunannag a kastoy ti kasasaadda a dida maikari nga agbalin a Kristiano agsipud ta basbassit ti maaramidanda ngem dagiti dadduma. Awan rason a tagibassitenda ti kabaelanda. (Gal. 6:4) Maliwliwada koma iti pannakaammo a maay-ayo ni Jehova no aramidenda ti inggat’ kabaelanda iti aniaman a kasasaadda.—Luc. 21:1-4.
3 Iwayaan ti Pannakiraman: Rinibo dagiti kapadasan a mangipakita no kasano a di impalubos dagiti indibidual a malapdan ti panangasabada. Babaen iti sitatallugod a rikna, nakasarakda iti nagduduma a wagas para iti impormal a panangasaba. Dagidiay nakulong iti pagtaengan nangasabada babaen iti telepono. Tunggal sumangbay a bisita naibilang a manamnama a dumngeg. Nupay di makakasaba idiay pagtaengan ti busbusoren ti pamiliana nga asawa a babai, gundawayanna ti makisarita kadagiti kaarruba wenno sabsabali iti inaldaw a trabahona.
4 Mabalin a paritan ti di manamati a naganak ti maysa nga agtutubo a makiraman iti publiko a panangasaba. Imbes nga ibilang a dakkel a lapped dayta, nalabit matmatanna dagiti kaeskuelaanna ken mannursurona a kas personal a “teritoriana” ket makaitedto ti nasayaat a pammaneknek ken nalabit makaidaulo pay kadagiti panangyadal ti Biblia. Adu kadagidiay agnanaed kadagiti nasulinek a purok ti nabalinanda ti nakiraman babaen iti panagsurat. Makasarakto a kanayon dagidiay tigtignayen ti Nakristianuan a regta iti pamay-an tapno dida agbalin a “di aktibo wenno di nabunga maipapan iti umiso a pannakaammo ken ni Apotayo a Jesu-Kristo.”—2 Ped. 1:8.
5 Nangisaad ni Jehova iti agpapada a pagsurotan para iti isuamin, nga isut’ panagbalin nga “amin-kararua” iti panangasabatayo. (Col. 3:23) Nupay nagduduma ti kaadu ti tiempo a mabusbostayo, ti panggep isu met laeng—pudno nga ayat nga aggubuay iti “maysa a puso a napalungdo.” (1 Cron. 28:9; 1 Cor. 16:14) No ipapaaytay ti inggat’ kabaelantayo, ditayto pulos marikna nga awan kaes-eskantayo a kameng ti kongregasion gapu ta bassit ti maaramidantayo. Kas ken Pablo, maikunatayo a sipupudno a ‘ditay minedmedan ti panangibaga ti aniaman kadagiti bambanag a makagunggona wenno uray ti panangisuro iti publiko.”—Ara. 20:20.