Ni Jehova Isut’ Namarsuatayo
1 Minilion a tattao ti mamati a ti Dios pinarsuana ti biag. Adu met a sabsabali ti mamati iti ebolusion. Sa adda dagidiay agduadua no ania ti patienda. Ti libro a Life—How Did It Get Here? By Evolution or by Creation? ket agpaay amin iti kakasta a tattao. Idatag daytoy a publikasion ti naan-anay ti pannakasukimatna a panangilawlawag no kasano a timmaud ti biag ken no ania ti kayat a sawen daytoy iti masakbayantayo. Bayat ti Hunio, aramatentayo daytoy a nagsayaat a libro.
2 Bigbigen uray dagiti nalatak a tattao iti komunidad nga adda ammona iti siensia ti nagpaiduma a lohika daytoy a libro. Insurat ti maysa a sientipiko a managsirarak idiay Netherlands: “Rimbawan daytoy a libro dagiti amin a namnamaen. Ti lohikal a pannakaputar dagiti kapitulo ken ilustrasion ket saan a maudi iti kinasientipikoda a bulsekka la ketdi no adda aniaman a supiatem kadagitoy.” Kinuna ti maysa nga abogado: “Nabasakon iti uppat a daras ket agtultuloy a magustuak ti nauneg a panangadal, kinaeskolar, ken dokumentado a pannakaparnuayna.” Gapuna, agtalektayo nga adu pay dagiti mangipateg iti daytoy a libro.
3 Mabalin a kayatyo ti mangaramid iti ababa a presentasion a kas itoy:
◼ Luktanyo iti panid 6, sayo kunaen: “Adu a tattao ti mangipagarup a ti napintas a dagatayo ken ti biag nga adda kenkuana ket naiparparna laeng. Ania ti matinongyo a nainkalintegan a panangilawlawag no kasano a timmanor amin dagitoy? [Palubosan a sumungbat.] Nawadwad ti ebidensia a mangpatalged iti salaysay ti Biblia maipapan ti Namarsua a saan laeng a mannakabalin unay no di ket mangipatpateg pay kadatayo. Isu ti pudno a Dios, ket ti naganna Jehova.” Basaenyo ti Salmo 83:18, sa ilawlawagyo iti ababa a panggepenna a pagbalinen a paraiso ti intero a daga.
4 No kayatyo ti mapan a dagus iti punto, mabalinyo a kunaen:
◼ “Pinampanunotyo kadin daytoy a saludsod?” Itudo ti paulona, iturong iti panid 7, basaen dagiti saludsod iti parapo 2, sayo ilawlawag a ti libro mangted kadagiti makapnek a sungbat manipud iti Biblia.
5 Wenno mabalinyo nga ipadas daytoy:
◼ “Pinampanunotyo kadin no kasano a naadda ti daga? Adu ti mangipilit a resulta daytoy ti napigsa a kosmiko a panagbettak. Ania ti pagarupyo? [Palubosan a sumungbat.] Isuro ti Biblia a pinarsua ti Dios ti daga kas agnanayon a pagtaengantayo. Naiduma dayta kadagiti sabali a planeta iti sistema solartayo. Sigun iti pannakaammotayo, daytoy ti kakaisuna iti uniberso nga addaan iti nagduduma a kasapulan a mangsustento iti biag.” Iturong iti parapo 5 idiay panid 130, ken ilawlawag no apay a ti daga ket gapuanan la ketdi ti maysa a Nalaing a Diseniador.
6 Ti sabali pay a yaasideg ket mabalin a kaasping daytoy:
◼ “Pagarupen dagiti dadduma a timmaudtayo manipud kadagiti ‘sunggo a tao.’ Kunaenda a kastoy ti langa dagiti appotayo. [Ipakita ti ladawan iti panid 89.] Ania ti makunayo iti dayta?” Palubosan a sumungbat. Ipakita no ania ti naikuna iti parapo 20, kalpasanna basaen ti Aramid 4:24, a mangipabigbig ken Jehova kas Namarsua kadatayo ken Mannangted-Biag. “Sukimaten daytoy a libro ti intero a teoria ti ebolusion a mainaig iti naisao iti Biblia.” Iturong iti benneg dagiti linaonna iti panid 5, ken itudo ti sumagmamano a paulo, kas kadagidiay adda iti kapitulo 1, 7, 15, ken 19.
7 Mabalin a maysa a bendision daytoy a libro kadagiti napasnek a tattao nga inallilaw dagidiay awanan pammati ken Jehova wenno iti Saona. Makatulong ti agpayso nga impormasion a linaon ti Creation a libro kadagita a tattao a rumayray ti panangipategda iti Namarsua kadatayo, a siaayat a mangay-aywan kadatayo.