Usarenyo a Naimbag ti Tiempoyo
1 Sipupuot ni Jehova iti tiempo. Kayatna a sipapanunottay met iti tiempo. Babaen ti organisasionna tulongannatayo a sipapanunot iti tiempo. Magutugottayo a kanayon nga ‘aduan ti aramiden iti trabaho ti Apo.’ (1 Cor. 15:58) Iti kastoy a wagas, mas epektibotayo iti serbisio ni Jehova.
2 Addaan ti tunggal maysa kadatayo iti pareho a kaadu ti tiempo kada lawas—168 nga oras. Kasanot’ kasayaat ti panangusartayo iti tiempotayo? Ipakpakitatayo kadi nga ammotayo no anian ti tiempo iti panangmatmat ni Jehova? Masingatayo aya kadagiti saan a nasken nga ar-aramid?
3 Nasken nga organisadotayo a naimbag. Adu dagiti mangikagumaan a mangsalimetmet iti listaan dagiti rebbeng nga unaen. Ilistada ti tunggal banag sigun iti pategna. Kasano a maikeddeng dayta? Kunaen ti Biblia a ti tao masapul a “kitaenna ti kinaimbag dagiti amin a pagbannoganna.” (Ecl. 3:13) Adda dagiti trabaho a mangyeg iti nasaysayaat a resulta ngem iti dadduma. Usigenyo dagiti resulta a mayeg ti tunggal maysa. Ti kadi panangiringpas iti trabaho mamataud iti napateg a gunggona? ‘Makitayo kadi ti pagimbagan’ ti pagbannoganyo? No saan, nalabit a di rebbeng nga unaen dayta a trabaho.
4 Iti Ministeriotayo: Apresiarentayo no dagiti dadduma ket nasapada a sumangpet iti taripnong sakbay ti panangasaba, nga agimdengda a naimbag iti instruksion, ken dagus a mapanda iti teritoria. Mas kayattayo ti kupado a mangaskasaba ngem ti agur-uray. Nabatad a narikna ni Pablo a nakapatpateg ti nasayaat nga urnos idi insuratna: “Ti isuamin a bambanag maaramid koma a sitatakneng ken addaan urnos.”—1 Cor. 14:40.
5 No rummuartayo iti tay-ak ti serbisio, mabalin a mapukawtay ti napateg a tiempo babaen ti panagkape. Nupay kasta, mabalintay ti sumardeng iti apagbiit kalpasan ti panagtrabaho iti adu nga oras iti serbisio. Wenno nalabit a no dakes ti panniempo, ti panagsardeng ti mangrepresko ken tumulong kadatayo nga agtultuloy pay. Nupay kasta, adu ti mayat a kupado iti panangasaba kadagiti tattao imbes a makilangen iti kakabsat kadagiti pagkapean iti tiempo a nairanta iti ministerio. Kasapulan ti kinatimbeng.
6 “Uray ti kannaway . . . ammona ti nakedngan a panawenna” a pumanaw, ket ti kuton “saganaenna ti kanenna iti kalgaw” tapno makapagsagana iti panawen ti lam-ek, kuna ti Biblia. (Jer. 8:7; Prov. 6:6-8) Ditoy a lumtuad ti palimed ti panangusar a naimbag iti tiempo. Masapul met nga ‘ammotayo ti nakedngan a panawentayo.’ Nupay saan a nalabes ti kinainget, sipapanunottay koma iti tiempo. Kasapulan nga ammotayo saan laeng a no ania ti aramidentayo no di pay ket no kaano a maaramid. Masapul nga iruamtayo ti agpanunot a nasaksakbay, a pawaywayan dagiti posible a pakataktakan. Ken masapul met a situtuloktay a mangpaababa iti dadduma nga ar-aramid tapno maiwayaan dagiti napatpateg a bambanag, kas iti panagsagana a maipaay iti gimong, ministerio iti tay-ak, ken dadduma pay a teokratiko nga aktibidadtayo.
7 Kayattay a tuladen ti nailangitan nga Amatayo, ni Jehova a Dios, isu a mangisuro kadatayo a “maipaay iti tunggal banag adda nakedngan a tiempo.” (Ecl. 3:1) Babaen ti panangusar a naimbag iti tiempotayo, ‘maan-anaytayo a mairingpas ti ministeriotayo.’—2 Tim. 4:5.