No Kasano a Gatangen ti Nainggundawayan a Tiempo
1 Ti kaadu ti aramiden iti panagserbi ken Jehova pagbalinennatayo nga okupado! (1 Cor. 15:58) Mabigbigtayo a kasapulan ti personal ken sangapamiliaan a panagadal, inaldaw a panagbasa iti Biblia, panagsagana ken itatabuno kadagiti gimong ti kongregasion, ken pannakiraman a regular iti tay-ak ti ministerio. Addaan dagiti manangaywan iti panangipastor ken dadduma pay a responsabilidad iti kongregasion. Mabalin nga addaan dagiti dadduma kadagiti rebbengen iti pamilia wenno obligasion iti dadduma. Tapno umiso ti pannakaaramid ti amin, kasapulan ti tunggal maysa ti natimbeng ken nasayaat a personal nga organisasion.
2 Ituyang Dagiti Unaen: Ti balligi iti ‘pananggatang iti nainggundawayan a tiempo maipaay iti bagbagitayo’ agpannuray iti panangtingiting ken naimbag a panangamiris. (Efe. 5:15, 16) Masapul nga ikeddengtayo no ania “dagiti napatpateg a bambanag” ket unaentay ida. (Fil. 1:10) Kastoy ti panangdeskribir ti maysa a pagassawaan iti sangakabbalayanda: “Pinunnomi ti biagmi iti kinapudno. . . . Ti kinapudno saan a paset ti biagmi, isu a mismo ti biagmi. Agrikus iti dayta ti tunggal sabali a banag.” Nasken ti panangiyun-una iti panagdayaw ken Jehova iti biagtayo.
3 Ilasin Dagiti Mangsayang iti Oras: Adda 168 nga oras iti makalawas, ket kasapulan a nainsiriban ti panangusartayo iti dayta a tiempo. Tapno adda umdas a tiempo para kadagiti teokratiko nga aktibidad, masapul nga ilasin ken kissayantayo dagiti mangsayang iti oras. Ipalgak ti maysa a surbey nga idiay Estados Unidos nasurok a 30 nga oras iti makalawas ti us-usaren ti gagangay nga adulto nga agbuya iti TV! Kadagiti dadduma, adu ti tiempoda nga agbasa iti nailubongan a literatura. Mabalin nga adu unay ti tiempo nga us-usaren dagiti dadduma kadagiti sosial nga aktibidad, panaglinglingay, wenno iti computer. Nainsiriban nga usigen ti inaldaw a rutinatayo ken limitaran ti tiempo nga usarentayo kadagiti di nasken nga aktibidad.
4 Maaddaan iti Nasayaat a Rutina: Aniaman ti kasasaadtayo, mabalin nga usaren ti tunggal maysa kadatayo ti tiempo a maipaay kadagiti naespirituan nga aramid. Nasarakan dagiti dadduma nga ad-adu ti maibanagda no nasapada a mangrugi iti kada aldaw. No adu a tiempo ti usarentayo nga agbiahe a mapan iti trabaho wenno aguray kadagiti sabsabali, mabalintayo nga usaren ti dadduma iti dayta a tiempo iti panagbasa iti Biblia, panagsagana kadagiti gimong, wenno panagdengngeg kadagiti cassette nga impaay ti Sosiedad. Dakkel ti maganab dagiti pamilia no mangilasinda iti panawen nga agadal a sangsangkamaysa. No adda amin a miembro ti pamilia iti oras ti panagadal ti pamilia, magunggonaan ti tunggal maysa ta awan ti masayang nga oras.
5 Iti panaglabas ti tunggal aldaw, ad-adda a mabigbigtayo a “ti tiempo a nabati ket napaababa.” (1 Cor. 7:29) Agpannuray ti biagtayo no kasanotay nga usaren ti natda a tiempo. Mabendisionantayo no kailalaantayo ti tiempo ket iti kasta kanayon nga iyun-unatayo ti intereses ti Pagarian.—Mat. 6:33.