Ipangpangrunayo iti Biagyo ti Panagserbi ken Jehova
1 Inyarig ni Jesus dagiti dumdumngeg idi kenkuana iti dua a kita ti agibangbangon. Ti maysa imbangonna ti wagas ti panagbiagna iti bato ti panagtulnog ken Kristo ket nadaeranna dagiti bagyo ti ibubusor ken rigat. Ti maysa nagbangon iti kadaratan ti panagimbubukodan ken kinasukir ket di nakaandur idi dimteng ti rigat. (Mat. 7:24-27) Yantangay agbibiagtayo iti daytoy panungpalan ti sistema ti bambanag, mapasarantayo ti adu a bagyo ti pakarigatan. Pumarpartak ti pannakaurnong dagiti nangisit nga ulep ti dakkel a rigat. Makapagibturtay ngata a di maisin ti pammatitayo agingga iti panungpalan? (Mat. 24:3, 13, 21) Agpannuray unay dayta iti wagas a panangibangbangontayo iti biagtayo itatta. Gapuna, nasken nga iyimtuodtay iti bagbagitayo, ‘Ibangbangonko aya a sititibker ti Nakristianuan a biagko iti sitatallugod a panagserbi iti Dios?’
2 Aniat’ kayat a sawen ti panangibangon iti biagtayo iti panagserbi ken Jehova? Kayatna a sawen a pagbalinentay ni Jehova a kapatgan iti biagtayo. Ramanenna ti panangipamaysa iti Pagarian kas kangrunaan a pakaseknantayo. Ramanenna ti panagtulnog iti Dios iti amin nga aktibidad ti inaldaw a panagbiagtayo. Kalikagumanna ti naimpusuan a panagadaltayo iti Biblia a personal, a sangapamiliaan, ken iti kongregasion ken iti ministeriotayo iti tay-ak, a dagitoy ti ipangpangrunatayo. (Ecl. 12:13; Mat. 6:33) Ti kasta a kinatulnog mangibunga iti kasla bato ti kinatibkerna a pammati, a di marpuog uray dumteng dagiti aniaman a bagyo ni rigat.
3 Makaparagsak a makita ti minilion a tattao a sitatalek a mangibangbangon iti biagda ken ti namnamada iti masanguanan babaen ti panangipangpangrunada iti panagserbi iti Dios, a kas ti inaramid ni Jesus. (Juan 4:34) Adda sursurotenda a regular nga eskediul dagiti teokratiko nga aktibidad ket kas resultana tagtagiragsakenda dagiti nabaknang a bendision. Inlawlawag ti maysa nga ina no kasanoda a nagballigi ken lakayna a nangpadakkel iti dua nga annakda a lallaki nga agserbi ken Jehova: “Pinagbalinmi ti biagmi nga okupado iti kinapudno—tabunuanmi amin a kombension, agsagana ken tabunuanmi dagiti gimong, ken pinagbalinmi a regular a paset ti biagmi ti panagserbi idiay tay-ak.” Kinuna pay ni lakayna: “Ti kinapudno ket saan a paset ti biagmi, isu ti biagmi. Naisentro iti dayta amin a sabsabali a banag.” Ipangpangrunayo met aya iti pamiliayo ti panagserbi ken Jehova?
4 Mangaramid iti Praktikal a Linawas nga Eskediul: Tultulongannatayo ti organisasion ni Jehova a mangsurot iti nasayaat a naespirituan a rutina babaen ti panangyurnosna iti lima a gimong iti linawas. Dagiti Kristiano a mangipangpangruna iti biagda ti panagdayaw ken Jehova iyurnosda dagiti sekular nga aktibidadda ken aktibidad ti pamilia iti wagas a matabunuanda amin dagitoy a napateg a gimong. Dida itulok dagiti saan unay a napapateg a banag a mangsinga iti regular nga itatabunoda.—Fil. 1:10; Heb. 10:25.
5 Bigbigen dagiti nataengan a Kristiano a no kasano a napateg ti regular a pannangan kadagiti masnup nga oras iti kada aldaw, kasta met a nasken ti mangaramid iti masnup nga eskediul para iti panagadal a personal ken sangapamiliaan, a pakairamanan ti panagsagana para kadagiti gimong. (Mat. 4:4) Maiwayaanyo kadi ti uray 15 wenno 20 laeng a minuto iti kada aldaw para iti personal a panagadal? Ti tulbek isu ti di panangipalubos kadagiti dadduma a banag a mangtakaw iti tiempo a nailasin para iti panagadal. Iyugaliyo dayta. Nalabit kalikaguman daytoy ti panagriingyo a nasapsapa ngem iti agdama a panagririingyo a binigat. Sapaen dagiti 17,000 a miembro ti sangalubongan a pamilia ti Bethel ti bumangon iti bigat tapno usigenda ti inaldaw a teksto. Siempre, ti ibabangon a masapa kalikagumanna ti umiso nga oras a pannaturog iti rabii tapno sisasagana ken nakainana a naimbag para iti sumaganad a bigat.
6 No maysakayo nga ulo ti pamilia, dakayo ti mangiplano ken mangorganisar iti eskediul ti pamiliayo iti teokratiko nga aramid. Dadduma a pamilia basaenda a sangsangkamaysa ti Biblia, ti Yearbook, wenno sabali pay a publikasion bayat nga agpalpada kalpasan ti panangrabii. Kuna dagiti adu a nagannak nga addaan kadagiti annak a nagbalin a Kristiano a nabileg iti naespirituan a ti maysa a makagapu iti balligida isu ti panangyugali ti pamilia a mangiwaya iti maysa a rabii iti kada lawas tapno tagiragsakenda a sangsangkamaysa ti naespirituan a panagpipinnabileg. Kinuna ti maysa nga ama: “Panagkunak, ti kangrunaan a makagapu iti naespirituan nga irarang-ay dagiti annakmi ket ti regular a panagadalmi a sangapamiliaan iti rabii ti Mierkoles, a nangrugi agarup 30 a tawenen ti napalabas.” Amin dagiti tallo nga annakna ubbingda pay idi mabautisaranda, ket idi agangay simrekda a tallo iti amin-tiempo a ministerio. Malaksid pay iti panagadal ti pamilia, mabalin nga ensayuen dagiti presentasion iti tay-ak ti serbisio wenno paset iti gimong, ken addada pay sabsabali a nasayaat nga aktibidad a mabalin a tagiragsaken a sangsangkamaysa.
7 Iti linawas nga eskediulyo, ‘gatgatangenyo [aya] ti tiempo’ tapno maikasabayo ti Pagarian? (Col. 4:5) Okupado ti kaaduan kadatayo, nga addaantay kadagiti rebbengen iti pamilia ken iti kongregasion. No awan masnup nga urnostayo a makiraman iti trabaho a panangasaba ken panangisuro iti kada lawas, nakalaklaka a singaen dagiti sabsabali a banag daytoy nagpateg a trabaho. Kinuna ti makinkua iti maysa a dakkel a rantso ti baka: “Sipud idi 1944 nautobko a ti kakaisuna a wagas tapno makakasabaak ket babaen ti panangyeskediul iti masnup nga aldaw para iti dayta. Agingga kadagitoy kaskasdi a mangyes-eskediulak iti aldaw kada lawas para iti serbisio.” Napaneknekan ti maysa a Kristiano a panglakayen a ti kaadda ti masnup nga eskediul iti panangasaba isut’ nakatulong kenkuana a nakapromedio iti 15 nga oras iti makabulan iti trabaho a panangasaba. No adda aniaman a sekular a trabahona iti Sabado, iyeskediulna dayta kalpasan ti panangasabana iti agsapa. Mayeskediulyo kadi ken ti pamiliayo ti uray maysa laeng nga aldaw iti kada lawas para iti tay-ak ti serbisio, a pagbalinenyo daytoy a paset ti naespirituan a panagbiagyo?—Fil. 3:16.
8 Usigenyo ti Rutina ti Biagyo: Adda bambanag a mangsinga iti panangipangpangrunatay iti biagtayo iti panagserbi ken Jehova. Dagiti di mapakpakadaan a kasasaad mabalin a singaenda ti inkagumaantay nga implano nga eskediultayo iti panagadal, pannakigimong, ken panagserbi. Ket ni Satanas a Kabusortayo aramidenna amin a kabaelanna a ‘mangbangen iti danatayo’ ken tungdayenna dagiti planotayo. (1 Tes. 2:18; Efe. 6:12, 13) Diyo itulok nga upayendakayo dagitoy a tubeng, ket sumukokayon. Mangaramidkayo kadagiti nasken a panagbalbaliw tapno masurotyo ti nayeskediul a teokratiko nga aktibidadyo. Nasken ti determinasion ken kinapinget tapno maaramidyo ti talaga a napateg.
9 Ditay koma palubosan dagiti dakes nga impluensia ti lubong ken ti imperpekto a lasagtayo a mangiserrek kadagiti di naespirituan nga aramid a mangirugi a mangibus iti adu a tiempo ken atensiontayo. Nasken a sukimatentay ti bagitayo, nga iyimtuodtayo dagitoy: ‘Agbalbalin kadin a di natimbeng ti panagbiagko wenno adu unayen ti pakasingaanna? Rugrugiak kadin nga ipangpangruna iti biagko dagiti banag iti daytoy a lubong a dandanin aglabas? (1 Juan 2:15-17) Kasanot’ kaadu ti tiempo a busbusbosek kadagiti personal nga aramid, panagbakasion, panagay-ayam, wenno dadduma pay a paglinglingayan—a pakairamanan ti panagbuya iti telebision wenno panagsukimat iti Internet—no maidilig iti tiempo a mabusbusbos kadagiti naespirituan nga aramid?’
10 No madlawyo nga okupado unayen ti biagyo kadagiti di nasken nga aramid, aniat’ masapul nga aramiden? Kas iti panangikararag ni Pablo a “maatur” koma dagiti kakabsatna, wenno “mailinteg,” apay a diyo ikararag ti tulong ni Jehova tapno maipamaysayo manen ti agserbi kenkuana? (2 Cor. 13:9, 11, ftn.) Kalpasanna determinadokay koma a mangtungpal iti pangngeddengyo ken mangaramidkayo kadagiti nasken a panagbalbaliw. (1 Cor. 9:26, 27) Tulongannakayto ni Jehova tapno dikay agbaw-ing iti makannawan wenno makannigid no di ket agtultuloykayo iti natulnog a panagserbi kenkuana.—Idiligyo ti Isaias 30:20, 21.
11 Agtalinaed nga Okupado iti Naragsak a Panagserbi iti Dios: Ikagkagumaan dagiti minilion a tattao ti agbirok iti kinaragsak ngem mautobdanto met laeng a bayat nga umab-ababa ti biagda, saan a nangyeg kadakuada iti manayon a ragsak dagiti material a banag a tinartarigagayanda a gun-oden. Maysa dayta a “panagagawa iti angin.” (Ecl. 2:11) Iti sabali a bangir, no ipangpangrunatayo ni Jehova iti biagtayo, nga ‘isaadtay a kankanayon iti sanguanantayo,’ masagraptayo ti nauneg a pannakapnek. (Sal. 16:8, 11) Ngamin, ni Jehova ti mismo a nangpaadda kadatayo. (Apoc. 4:11) No awan ni Jehova, ti Naindaklan a Pumapanggep, awan mamaay ti biag. Ti panagserbi ken Jehova punnuenna ti biagtayo iti makagunggona, napnuan kaipapanan nga aramid a pakagunggonaantayo kasta met kadagiti sabsabali iti wagas a manayon, wen, iti agnanayon.
12 Ditay koma agbalin nga aleng-aleng di la ket ta malipatantay ti kinaganat ti umad-adanin a panungpalan ti lubong ni Satanas. Ti panangmatmattayo iti masanguanan impluensiaanna ti inaldaw a panagbiagtayo. Dagiti tattao idi kaaldawan ni Noe, a di namati nga addanto sangalubongan a layus, “dida nangikankano,” nga impangpangrunada iti biagda dagiti personal nga aramid—pannangan, panaginum, ken pannakiasawa—agingga a ti layus “inyanudna amin ida.” (Mat. 24:37-39) Itatta, dagidiay mangipamaysa iti biagda iti daytoy a lubong makitadanto a mismo ti pannakadadael dagiti namnamada iti masanguanan inton dumteng ti kadaklan pay laeng a didigra a mapasaran ti tao, “ti aldaw ni Jehova.”—2 Ped. 3:10-12.
13 Gapuna, itultuloyyo nga ibangon ti biagyo iti sibibiag a Dios, a ni Jehova, ken ti panagaramid iti pagayatanna. Awan sabali a pangnamnamaanyo iti daytoy a biag nga addaan iti kasta a mapagtalkan a Suporta ni Jehova. Dina mabalin ti agulbod—tungpalennanto dagiti karina. (Tito 1:2) Saan a matay—awan mapukaw a naitalek ken Jehova. (Hab. 1:12; 2 Tim. 1:12) Ti ibangbangontayo ita a biag a buyogen ti kinatulnog ken pammati ket pangrugian laeng ti mataginayonto a biag iti makaparag-o a panagserbi iti naragsak a Diostayo!—1 Tim. 1:11; 6:19.
[Blurb iti panid 3]
“Ti kinapudno ket saan a paset ti biagmi, isu ti biagmi. Naisentro iti dayta amin a sabsabali a banag.”