Itultuloyyo a Saluadan a Siiinget ti Panangusaryo iti Tiempoyo
1. Ania a karit ti sangsanguen ita dagiti tattao iti amin a lugar?
1 Iti kaaldawantayo nga adun dagiti alikamen a mangpaababa iti tiempotayo nga agtrabaho, adu ti agkuna a kasla umad-adu ti trabahoda ngem bassit ti panawenda a mangaramid kadagita. Marigatankayo kadi a mangtaginayon iti nasayaat a naespirituan a rutina? Kayatyo kadi nga ad-adu pay koma ti oras a mausaryo iti ministerio? Kasano ti kasayaatan a panangusartayo iti tiempotayo?—Sal. 90:12; Fil. 1:9-11.
2, 3. Ania a karit ti patauden ti teknolohia a pangisaknap iti impormasion, ken kasanotayo a masukimat ti bagbagitayo?
2 Dagiti Mangperdi iti Tiempo: Masapul a sagpaminsan a sukimaten ti tunggal maysa kadatayo no kasanotayo nga us-usaren ti tiempotayo. Idagadag ti Biblia: “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib a tattao, a gatangenyo ti nainggundawayan a tiempo maipaay iti bagbagiyo, agsipud ta dagiti aldaw dakesda.” (Efe. 5:15, 16) Usigentayo dagiti parikut a patauden dagiti dimmur-asan ti teknolohia a pangisaknap iti impormasion. Nupay adu ti pakausaran dagiti kompiuter ken dadduma pay a de koriente nga alikamen, agbalin dagitoy a silo no saantayo nga itultuloy nga aluadan a siiinget ti panangusartayo iti tiempotayo.—1 Cor. 7:29, 31.
3 Masapul nga isaludsod ti tunggal maysa kadatayo: ‘Inaldaw kadi a mangbusbusbosak iti tiempo nga agbasa wenno mangsungbat kadagiti makasinga laeng a mensahe iti E-mail? Kanayon kadi nga umaw-awagak iti telepono wenno agte-text maipapan kadagiti saan a napateg a banag? (1 Tim. 5:13) Agsuksukimatak kadi iti Internet nga awan gapgapuna wenno pimpindaek kadi ti amin nga estasion iti telebision no agbuyaak? Awan kadin ti gundawayko nga agadal iti Sao ti Dios gapu ta okupadoak kadagiti elektroniko nga ay-ayam?’ Dagiti kasta a kalat mabalin a sisisikap a dadaelenda ti espiritualidadtayo.—Prov. 12:11.
4. Ania a panagbalbaliw ti inaramid ti maysa nga agtutubo, ken apay?
4 Nainsiriban a Panangusar iti Tiempo: Dagiti de koriente nga alikamen alaenna nga agpada ti tiempo ken atensiontayo. Inadmitir ti maysa nga agtutubo a naadikto kadagiti ay-ayam iti kompiuter: “Adda dagiti gundaway a no nagay-ayamak nga umuna iti kompiuter sakbay a mapanak mangasaba wenno tumabuno iti Nakristianuan a gimong, marigatanak a mangipamaysa iti panunotko. Dandani kanayon a pampanunotek no kasanoak a lumaing nga agay-ayam apaman a makaawidakon. Naapektaran ti personal a panagadalko ken ti regular a panagbasak iti Biblia. Nangrugin a mapukaw ti rag-ok nga agserbi iti Dios.” Gapu ta nabigbigna a masapul nga agbalbaliwen, inikkatna amin nga ay-ayam iti kompiuterna. “Talaga a narigat dayta,” kinunana. “Ad-adda a naadiktoak kadagiti ay-ayam ngem iti impagarupko. Ngem nabang-aranak met unay gapu ta ammok a pagimbagak ti inaramidko.”—Mat. 5:29, 30.
5. Kasanotayo a maaddaan iti tiempo agpaay kadagiti naespirituan nga aktibidad, ket kasanotayo a magunggonaan no aramidentayo dayta?
5 Mabalin a nasken ti mangaramid kadagiti kasta nga addang no adda dagiti banag a nasken a balbaliwanyo. Mabalinyo kadi ti mangala iti 30 a minuto iti kada aldaw kadagiti saan a napateg nga aktibidad? Agarup kasta kapaut ti kasapulanyo tapno mabasayo ti intero a Biblia iti uneg ti makatawen. Anian a makagunggona dayta iti naespirituan! (Sal. 19:7-11; 119:97-100) Mangitudingkayo iti panawen para iti panagbasa iti Biblia, panagsagana iti gimong, ken iti panangasaba. (1 Cor. 15:58) No aramidenyo daytoy, mataginayonyo a kontrolado ti tiempoyo ken tulongannakayo nga ‘agtultuloy a manglasin no ania ti pagayatan ni Jehova.’—Efe. 5:17.