Usarenyo a Sieepektibo ti Tiempoyo
1 Addaantay amin iti agpapada a kaadu ti tiempo nga usarentayo iti kada lawas. Nangnangruna a napateg ti tiempo nga usarentayo a mangirakurak iti naimbag a damag gapu ta mausar dayta iti makaispal-biag a trabaho. (Roma 1:16) Maipakitatay ti apresasiontayo iti daytoy babaen ti panagsagana a naimbag para iti naiplano a panagserbi, sumangpet iti naituding nga oras kadagiti taripnong sakbay ti panangasaba, ken mapan a dagus iti teritoria. Mangaskasabatayo koman imbes a maibayagtayo nga agur-uray. Tangay insuronatayo ni Jehova a “maipaay iti tunggal banag adda nakedngan a tiempo,” masapul nga usarentayo a naimbag ti tiempo nga inlasintayo para iti ministerio.—Ecl. 3:1.
2 Usarenyo a Nainsiriban ti Tiempoyo: Magun-odtayo ti adu a bendision no determinadotayo a mangsurot iti eskediul a mangipalubos iti regular a pannakiraman iti tay-ak ti ministerio. Gagangay, ti nasayaat a resulta a magun-odtayo iti ministerio ket adda pakainaiganna iti kaadu ti tiempo a nabusbostayo iti serbisio. Babaen ti sangkabassit a panangbalbaliw iti rutinatayo, mabalintay kadi ti mangipaay iti ad-adu pay a tiempo iti tay-ak ti serbisio? Kas pagarigan, kalpasan ti trabaho a panagmagasin iti Sabado, mabalintay kadi a nayonan ti tiempotayo tapno masarungkaran ti sumagmamano a tattao? No mangasabatayo iti apagbiit iti Domingo, mabalintay met kadi ti mangusar iti tiempo nga agsarungkar wenno mangyadal iti Biblia? Mabalinantay pay kadi ti mangasaba iti lansangan kalpasan ti panagbalaybalaytayo? Kadagitoy wenno iti dadduma pay a pamay-an, mabalin a maparang-aytay ti serbisiotayo.
3 No addatayo iti pangasabaan, mapukawtay ti napateg a tiempo no ditay agannad. Siempre, no dakes unay ti paniempona, ti apagbiit a panaginana ket mangpabang-ar kadatayo ken tulongannatayo a makapagtultuloy. Ngem nasken ti kinatimbeng tangay mabalin a saan a kanayon a kasapulan ti kakasta a panaginana.
4 Kadagiti kallabes a tawen, narigaten a madanon dagiti tattao iti pagtaenganda. Tapno mapagballigian daytoy a kasasaad, baliwan ti adu nga agibumbunannag ti oras a panangasabada iti binalaybalay. Apay a diyo padasen ti mangasaba iti mumalmalem wenno iti sardam?
5 Nasaysayaat no saantayo nga agtutungtong kabayatan ti panangasaba iti lansangan. Imbes ketdi, agiinnaddayotayo koma ken asitgantayo dagiti tattao tapno mairugitayo a kasarita ida. Iti kasta nasaysayaat ti pannakausar ti tiempo ken dakdakkel a rag-o ti magun-od iti trabaho.
6 Gundawayanyo ti Mangasaba: Idi adda bumalay a nangibaga a saan nga interesado, dinamag ti Saksi no adda pay sabali iti balay a mabalinna a kasarita. Gapu iti daytoy, nakasaritana ti lalaki iti balay, a masaksakit iti adun a tawen ken gistay nakaidda a kanayon. Napabaro ti panaginteresna iti biag gapu iti namnama a nailanad iti Sao ti Dios. Di nagbayag, nakaungaren, makigimgimongen idiay Kingdom Hall, ken iranranudnan kadagiti sabsabali ti namnama a nabiit pay a nasarakanna!
7 Inyaplikar ti maysa a tin-edyer a sister ti singasing a makiraman a mangasaba sakbay ti Panagadal iti Libro ti Kongregasion. Iti damo a balay, naam-ammona ti 13-anyos a balasitang a dimngeg a naimbag ken nangala iti literatura. Iti sumaganad nga aldaw, nakita ti agtutubo a sister daytoy a balasitang idiay eskuelaan. Di nagbayag, insingasingna nga iyadalanna iti Biblia, ket immanamong ti balasitang.
8 Pagbalinenyo a De Kalidad Dayta a Tiempo: Ti regular a pannakiraman iti tay-ak ti serbisio tulongannatayo a mangparang-ay iti laingtayo a mangisango iti naimbag a damag. Maparang-ayyo aya ti abilidadyo a mangirugi iti saritaan iti ruangan babaen ti panangusar iti nasaysayaat nga introduksion? Maparang-ayyo pay aya ti laingyo kas mannursuro no mangyad-adalkayo iti Biblia iti pagtaengan? No aramidenyo dayta, pudno a mausaryo a sieepektibo ti tiempoyo iti serbisio ken ad-adda a nabunga ti ministerioyo.—1 Tim. 4:16.
9 Yantangay “ti tiempo a nabati ket napaababa,” mapunno koma ti biagtayo iti Nakristianuan nga ar-aramid. (1 Cor. 7:29) Ipangpangrunatay koma iti biagtayo ti panangilatang iti tiempo para iti trabaho a panangasaba. Naganaygay ken naregtatayo koma iti ministerio. Ti tiempo ket nakaskasdaaw a sagut nga inted ni Jehova kadatayo. Kanayon nga usarenyo a nainsiriban ken sieepektibo.
[Kahon iti panid 4]
Panunotenyo Dagitoy a Singasing:
◼ Sumangpet kadagiti taripnong sakbay ti panangasaba iti naituding a tiempo.
◼ No mabalbalin, kanayon a babassit koma ti grupo dagiti mangaskasaba.
◼ Dikay agtaktak a mapan iti teritoria.
◼ Trabahuenyo ti teritoria iti oras a kaadda ti kaaduan a tattao iti balayda.
◼ Sagpaminsan, mangasabakay a dakdakayo no natalgedkayo a mangaramid iti kasta.
◼ Agsarungkarkayo iti lugar a kaasitgan iti teritoria a pangasabaan.
◼ Itultuloyyo latta ti mangasaba no addada kagrupoyo a naibayag iti maysa a balay.
◼ No mabalin, depende kadagiti sirkumstansia, mangasabakayo iti nasursurok ngem maysa nga oras.