Usarenyo a Naimbag ti Tiempoyo No Adda iti Ministerio
Nangbusbos dagiti Saksi ni Jehova iti 1,945,487,604 nga oras iti ministerio bayat ti 2014 a tawen serbisio. Ipakpakita dayta a determinadotayo nga agtalinaed nga okupado iti panagserbitayo ken Jehova! (Sal. 110:3; 1 Cor. 15:58) Gapu ta “ti tiempo a nabati ket ababan,” mabalin kadi nga usarentayo dagiti napateg a tiempo a kaaddatayo iti ministerio a makisarita iti ad-adu pay a tattao?—1 Cor. 7:29.
Masapul ti pannakibagay tapno mausartayo a naimbag ti tiempotayo bayat nga addatayo iti ministerio. Kas pagarigan, no regularkayo a mangbusbusbos iti maysa wenno ad-adu pay nga oras iti maysa a kita ti ministerio nga awan ti makasarsaritayo, mabalin kadi a mangaramidkayo iti panagbalbaliw tapno ad-adu pay ti mabirokan ken makasaritayo? Nagduduma ti kasasaad iti tunggal lugar. Ngem mabalin a makatulong kadakayo dagiti sumaganad a singasing tapno mas mausaryo a naimbag ti tiempoyo ket maliklikanyo ti kasla “panangkabkabil iti angin.”—1 Cor. 9:26.
Panangasaba iti Binalaybalay: Iti adun a dekada, nairuamen dagiti agibumbunannag a mangirugi iti aldawda iti ministerio babaen ti panangasabada iti binalaybalay. Ngem gapu ta adu ti agtrabtrabaho iti aldaw, apay a diyo padasen ti mangasaba iti binalaybalay no mumalem wenno rumabii, ta ad-adu a tattao ti adda iti pagtaengan ken agin-inana? Bayat ti aldaw, mabalin a nabungbunga ti panangasaba iti igid ti kalsada wenno lugar ti negosio.
Panangasaba iti Publiko: Masapul a maipuesto dagiti lamisaan ken de pilid a pagidispleyan kadagiti lugar nga adu ti aglabas a tattao a sakup ti teritoria ti kongregasion. (Kitaenyo ti Hulio 2013 a Ti Ministeriotayo iti Pagarian, p. 5.) No bassiten ti lumablabas a tattao iti lugar a nairanta iti panangasaba iti publiko, mabalin nga ikeddeng ti Komite ti Serbisio ti Kongregasion a mayakar ti pakaipuestuan ti de pilid wenno lamisaan a pagidispleyan iti lugar nga ad-adu ti aglabas a tattao.
Panagsarungkar ken Panangyadal iti Biblia: Mabalin kadi nga iyeskediulyo ti panagsarungkar ken panangyadal iti Biblia iti oras a saan unay a nabunga ti dadduma pay a kita ti ministerio? Kas pagarigan, no nabunga ti panangasaba iti binalaybalay kadagiti agsapa ti Sabado, mabalin kadi a malem wenno rabii laengen ti panangyadalyo iti Biblia? No mapankayo agsarungkar, mabalin kadi nga agsisinakayo iti pagluganan tapno ad-adu ti magapuananyo iti ministerio?
Nupay iramantayo iti ireporttayo ti oras a kaaddatayo iti ministerio, naragragsaktayo no nabungatayo. No makitayo a saan nga epektibo ti pannakipaset iti maysa a kita ti ministerio iti espesipiko nga oras ti aldaw, padasenyo ti sabali pay a kita ti ministerio. Ikararagyo ken Jehova, ti “Apo ti panagani,” nga iwanwannakayo tapno mausaryo a naimbag ti tiempoyo bayat nga addakayo iti ministerio!—Mat. 9:38.