Makumikomkay Kadi Unay?
1 Imballaag ni Pablo a masapul a ‘kanayon nga aduantayo iti aramiden iti trabaho ti Apo.’ (1 Cor. 15:58) Maidagadag a maaddaantayo iti inaldaw a rutina iti personal a panagadal, regular a pannakiraman iti ministerio, itatabuno kadagiti gimong, ken panangtaming kadagiti paset iti kongregasion. Mainayon iti dayta, masapul a tulongantayo dagiti agkasapulan ti tulong. Iti kaadu dagiti aramiden, no dadduma kasla madagsenantayo unay, a panunoten a masapul a kissayantayo ti trabahotayo.
2 Adda dagiti kasasaad a nainkalintegan nga ikkaten wenno kissayan dagiti aktibidadtayo. Ibilang ti dadduma nga inkapilitan nga aramidenda amin a banag a kiddawen dagiti sabsabali kadakuada. Ti kaawan ti kinatimbeng iti daytoy a banag ket mamagsikor ken mangbannog ken makapaupay unay. Agbanag daytoy iti panagrakaya ti relasion iti pamilia, mangkibur iti emosion, wenno degdeganna ti problema ti salun-at.
3 Agtimbengkayo: Agpannuray ti tulbek ti kinatimbeng iti panangalagad iti balakad ni Pablo a “siguraduen dagiti napatpateg a bambanag.” (Fil. 1:10) Kaipapanan dayta nga ipamaysatayo dagiti bambanag a nasken ken, no ipalubos ti tiempo, tamingen dagiti bambanag a saan unay a nasken. Maibilang dagiti obligasion ti pamilia kadagiti bambanag a nasken unay. Adda paset ti sekular a rebbengen a masapul nga itungpal. Nupay kasta, insuro ni Jesus ti prinsipio a biroken nga umuna ti Pagarian. Masapul a sipupuottayo nga umuna kadagiti naespirituan a kasapulan a mangitungpal iti dedikasiontayo ken Jehova.—Mat. 5:3; 6:33.
4 No adda daytoy iti panunottayo, masapul nga ikkatentay manipud iti napusek nga eskediultayo ti aniaman a di nasken a personal nga ar-aramid, sobra a panagpalpaliwa, ken saan a nasken a pannakikumit kadagiti dadduma. Mangyeskediultayo iti tiempo ti personal a panagadal, nainkalintegan a pannakiraman iti serbisio, ken itatabuno kadagiti gimong. Mabalin a bingaybingayen ti natda a tiempo kadagiti sabsabali nga aramid.
5 Agpapan kasta, mabalin a mariknatayo a nadagsen latta ti awittayo. No kasta, kasapulan nga ipangagtayo ti awis ni Jesus: “Umaykayo kaniak, dakayo amin a mabambannogan ken nadagsenan, ket pagin-awaenkayto.” (Mat. 11:28) Agtaklinkayo ken Jehova, “isu nga inaldaw-aldaw a mangawit iti awittayo” ken mangted iti bileg kadagidiay nabannog. (Sal. 68:19; Isa. 40:29) Makapagtalektayo a tulongannatay ni Jehova a makapagtultuloy iti nagadu a teokratiko nga aktibidad.
6 Bayat a makumikomtay a mangaramid kadagiti interes ti Pagarian, makapagrag-otayo a saan nga awan kapaypay-anna ti trabahotayo a mainaig iti Apo.—1 Cor. 15:58.