Tulonganyo Ida nga Agserbi Manen
1 Nagsurat ni apostol Pablo kadagiti padana a Kristiano: “Orasen tapno agriingkayo manipud iti turog, ta ita ti pannakaisalakantayo as-asidegen ngem idi tiempo a nagbalintayo a manamati.” (Roma 13:11) Maseknan idi ni Pablo kadagiti kakabsatna a nailibay iti naespirituan; magagaran a mangriing kadakuada iti napabaro nga aktibidad.
2 Sipupudno a maikunatayo a lumablabasen ti rabii daytoy daan a lubong ket agbannawagen ti baro a lubong. (Roma 13:12) Addaantay iti naimbag a rason a maseknan kadagiti kakabsattayo a nagsardeng a makitimpuyog kadatayo kas manangaskasaba ti naimbag a damag. Idi napan a tawen ti serbisio, ditoy Pilipinas laeng, nasurok a 3,000 nga agibumbunannag ti nagaktibo manen. Kasanotay a matulongan dagiti dadduma pay a di aktibo nga agserbi manen ken Jehova?
3 No Ania ti Maaramid Dagiti Panglakayen: Kaaduan kadagiti di aktibo ti saan a nangpanaw iti kinapudno; basta nagsardengda laeng a mangasaba gapu iti pannakaupay, personal a problema, materialismo, wenno pakaringgoran iti biag. (Luc. 21:34-36) No mabalin, nasaysayaat no matulongan ida sakbay nga agbalinda a di aktibo. Pakaammuan koma ti sekretario ti kongregasion ti mangidadaulo ti Panagadal ti Libro ti Kongregasion no agbalin a di regular iti serbisio ti maysa nga agibumbunannag. Mabalin nga iyurnos ti maysa a panangipastor a panagsarungkar. Ilasin koma dagiti panglakayen ti puon ti problema ken no kasano a maipaay ti tulong.—Kitaenyo ti Setiembre 15, 1993, Pagwanawanan, pinanid 20-3.
4 No Kasano a Makatulong Dagiti Dadduma: Ammo ti kaaduan kadatayo no siasino ti nagbalin a di aktibo. Nalabit maysa a nadekket a gayyemtayo idi. Ania ti tulong a maaramidtayo? Apay a dikay mangyurnos iti ababa nga ibibisita? Ibagayo kenkuana a kailiwyo ti kaaddana. Narayray ken positibokayo. Iyebkas ti pannakaseknanyo ngem dikay iparikna nga isu ket masakit iti naespirituan. Agestoriakayo kadagiti makapabileg a kapadasan iti kongregasion. Itukon a kuyogenyo nga umay makigimong. Ipadamagyo kadagiti panglakayen ti tignay a nakitayo.
5 No umay manen makigimong ti maysa a di aktibo, nalabit a mabain a makilangen kadagiti dati nga am-ammona. Saanyo nga isalsaludsod kenkuana, “Sadinot’ napnapanam?” No di ket, ipariknayo kenkuana nga isu ket maabrasa. Iramanyo iti saritaan. Iyam-ammoyo kadagidiay saanna pay nga am-ammo. Katugawyo bayat ti gimong, siguraduenyo nga adda pagkantaanna ken ti material a maadal. Paregtaenyo nga agsubli, ken itukon ti tulongyo.
6 Gapu ta patpatgentay dagidiay nayaw-awan, agrag-o ni Jehova ken ni Jesus no makaungar dagitoy iti naespirituan. (Mal. 3:7; Mat. 18:12-14) Masagraptayo ti isu met laeng a rag-o no agballigitayo a mangtulong iti sabsabali nga agserbi manen ken Jehova.