Trabahuenyo a Naan-anay ti Teritoriayo
1 Kadagiti residensial a lugar masansan a makasaraktayo iti bassit a lugar ti negosio, kas iti groseria, restawran, wenno tiendaan. No matrabaho dagitoy a panggedan a mairaman iti intero a teritoriayo, sarungkaranyo koma a kas kadagiti balbalay.
2 Mangusarkayo iti ababa a presentasion, a nalabit kunayo: “Adda kayatko nga ipakita kadakayo.” No dinakay masango ti makinkukua, mabalinyo a tukonan laengen iti tract ken kunaenyo: “Umayakto manen no saankayo unay nga okupado. Kayatko nga ammuen no ania ti makunayo iti daytoy a tract.”
3 Di rumbeng nga agalikakatayo a mangaramid iti daytoy a trabaho. Impadamag ti maysa nga agibumbunannag: “Ninamnamak a saanda a dumngeg. Nupay kasta, nasdaawak ta maisupadi iti ninamnamak ti reaksionda iti mensahe ti Pagarian. Pudno a nadayaw ken mannakigayyemda ken gistay kanayon a mangalada kadagiti magasin.”
4 Adda maysa a babai nga agtartrabaho iti kompania ti real estate a nangpastrek kadagiti Saksi iti opisinana. Nangala kadagiti magasin ken kayatna ti agadal iti Biblia. Naipakita kenkuana ti libro a Pannakaammo, ket dagus a nairugi ti panagadal, iti mismo nga opisinana!
5 Ti naituding a panangtrabaho a naan-anay iti teritoriayo ramanenna ti panagsarungkar kadagiti panggedan. (Ara. 10:42) Planuenyo a sarungkaran dagitoy a kas met laeng kadagiti pribado a pagtaengan. Saan laeng a mawanas a naan-anay ti teritoriayo no di ket mabalin a magunggonaankayo pay kadagiti makaparagsak a kapadasan!