Iranudan Dagiti Dadduma Sigun iti Kasapulanda
1 Sibubuslon nga ipapaay ni Jehova ti naespirituan a kasapulantayo babaen ti matalek nga “adipen.” (Mat. 24:45-47) Yantangay nawadwad ti aw-awatentayo, namnamaen ni Jehova nga agririnnanudtayo kas sangalubongan a pamilia, a siguraduentayo a magunggonaan dagiti amin a padapada. (Mat. 10:8) Kasanotayo a maaramid daytoy? Usigentayo dagiti tallo a pamay-an.
2 Kontribusion iti Literatura: Kaaduan iti literatura a maaw-awattayo ket maiwaras iti nalaka a gatad tapno matulongan dagidiay awan unay mabalinda. Maipatulod met kadagiti kongregasion a saan a dagus a mabayadan. Iti kasta, no dagus nga agkontribusiontayo iti literatura a maawattayo ket isubli dagiti kongregasion ti naan-anay a gatadna iti Sosiedad, isubsublitayo ti pondo a mausar iti panangaramid iti ad-adu pay a literatura. Panunotentayo ti kasapulan ti dadduma, saan laeng a ti kasapulantayo, ket mangyeg daytoy iti dakdakkel a ragsak. (Ara. 20:35) Ngem no utangen dagiti payunir wenno agibumbunannag ti literatura ken saanda nga agkontribusion, iti kasta maipaidamda ti pondo a makatulong iti panangaramid iti ad-adu pay a literatura.
3 Dagiti Kingdom Hall Loan: Bimmulod kadi ti kongregasionyo iti kuarta a pagbangon iti Kingdom Hall? No kasta, awan duadua a maragsakankayo a maaddaan iti nasayaat a pasilidad. Naggapu dagitoy a pondo iti kontribusion dagiti kakabsattayo iti sangalubongan. Idi bimmulodkayo, awan duadua a nagkarikayo nga agkontribusion iti masnup a kantidad iti kada bulan a tumulong iti pannakaisubli ti nabulod. No simamatalek a tungtungpalenyo daytoy, iti kasta makitintinnulongkayo kadagiti amin a kakabsatyo iti sangalubongan. No simamatalek nga isubsubli ti kongregasion iti kada bulan ti pondo a nabulod iti Sosiedad sigun iti karida, tumultulongda iti pannakaibangon ti ad-adu pay a Kingdom Hall.
4 Ditoy Pilipinas, limitado ti pondo a mabalin a maipabulod nga agpaay kadagiti baro a Kingdom Hall depende iti kantidad a maaw-awat a binulan manipud kadagidiay nakabuloden wenno manipud iti donasion iti Kingdom Hall Fund. Gapuna, no agpalia dagiti kongregasion a mangisubli iti naan-anay a kantidad iti kada bulan, kinapudnona papaidamanda dagiti dadduma a kongregasion iti pondo a pagbangon kadagiti Kingdom Hall-da. Sigurado a ditay kayat nga aramiden dayta, saan kadi? Ipangag koma ngarud dagiti amin a bimmulod ti balakad ni Pablo nga iranudan dagiti sabsabali “sigun kadagiti kasapulanda,” iti kasta “itultuloyyo a kitaen, saan a ti personal a panaginteres kadagiti laeng bukodyo a bambanag, no di ket kasta met ti personal a panaginteres kadagiti bambanag ti sabsabali.”—Roma 12:13; Fil. 2:4.
5 Dagiti Boluntario a Kontribusion: Kadagiti napalabas a parapo napagsasaritaantayo a nangnangruna ti panangisubli iti Sosiedad kadagiti pondo a pagbayad kadagiti probision a naawat. Nupay kasta, dagidiay pudpudno a mangapresiar iti amin nga ar-aramiden ni Jehova babaen ti organisasionna saanda a mapnek a kastoy laeng ti maaramidanda. Imbes ketdi, kayatda nga iranudan dagiti sabsabali babaen kadagiti boluntario a kontribusionda iti Sosiedad. Nupay adda obligasionda iti lokal a kongregasion, adu ti situtulok nga agkontribusion iti sangalubongan a trabaho ti Sosiedad wenno iti Kingdom Hall Fund iti kada bulan.—Kitaenyo ti Disiembre 1, 1995 a Pagwanawanan, panid 30 ken 31.
6 Kinuna ni Jesus a dagiti adalanna mailasinda babaen ti panagiinnayatda. (Juan 13:34, 35) Ti kinamanagparaburtayo iti panangted kadagiti material a banag ken ti ditay panangipaidam iti kasapulan dagiti sabsabali ket sigurado a nasayaat a pammaneknek a pudnotayo a Kristiano.