Ipategyo Dagiti Banag a Mausar Kadagiti Teokratiko nga Aktibidad
1 Idi inyurnosna ti pannakatarimaan ti templo, kinomendaran ni Ari Josias dagidiay natudingan nga agtrabaho. Kinunana: “Awan koma ti maaramid a pannakikuenta iti kuarta kadakuada nga iti imada ti nakaikabkabilan dayta, ta agtartrabahoda a buyogen ti kinamatalek.” (2 Ar. 22:3-7) Ti panangipateg dagidi a lallaki kadagiti sagrado a banag ket makita iti panangusarda kadagiti banag a naitalek kadakuada. Iti kaaldawantayo, bayat a makiramramantayo iti nasantuan a trabaho iti naimbag a damag ti Dios, masapul met nga ipakitatayo ti kinamatalek iti panangusar kadagiti banag a naited kadatayo.
2 Iti Ministerio iti Tay-ak: Gapu ta apresiarentayo ti napateg a mensahe a linaon dagiti publikasiontayo ken sipapanunottayo iti nagastos iti panangaramid kadagita, matignaytayo nga ad-adda a mangipateg kadagita a publikasion. Ditay koma basta itukon dagiti literaturatayo kadagidiay di mangapresiar iti mensahe ti Biblia. No saan unay nga interesado ti maysa a tao iti naimbag a damag, mabalin a tract laengen ti itukontayo kenkuana imbes a literatura.
3 Iwarastayo dagiti literatura iti wagas a mangipakita iti panangapresiar iti pategda. Diyo koma ibati kadagiti publiko a lugar a pakaiwaraanna laeng. Tapno awan ti masayang, kitaenyo no ania dagiti adda iti pagtaenganyo sakbay a mangalakayo iti kanayonan a literatura. No kanayon a sobra ti suplayyo iti kada isyu dagiti magasin, kissayanyo ti pedidoyo.
4 Dagiti Publikasion nga Usarenyo a Mismo: Dagiti laeng koma publikasion a kasapulantayo ti pediduentayo. Kalkalainganna koma dagiti pediduentayo a deluxe a Biblia, Reference Bible, ken dadduma pay a dadakkel a publikasion, kas iti Concordance, Index, dagiti tomo ti Insight, ken ti libro a Manangiwaragawag, a bin-ig a dakkel a gastos ti kasapulan iti pannakaaramid dagitoy.
5 Isursuratyo kadi ti nagan ken address-yo kadagiti personal a kopiayo a publikasion? Makatulong daytoy tapno saanen a kasapulan a mangalakayo iti kasukat dagiti publikasion a naiwagat. No napukawankayo iti pagkantaan, Biblia, wenno publikasion a mapagadalan, nalabit masarakanyo dayta kadagiti napukaw a bambanag a naurnong iti Kingdom Hall wenno pagasambleaan.—Luc. 15:8, 9.
6 Nainsiriban koma ti panangusartayo kadagiti literaturatayo. Iti kasta, maipakitatayo ti kinamatalektayo iti panangusar kadagiti sanikua ti Pagarian nga intalek ni Jehova kadatayo.—Luc. 16:10.