Baro a Programa ti Asamblea Sirkito

Ti tema ti dua nga aldaw a programa ti asamblea sirkito a mangrugi inton Pebrero, 1998, ket “Panagtalinaed a Silalagip Unay iti Aldaw ni Jehova.” (2 Ped. 3:12) Nairanta dayta a manggutugot kadatayo nga agalibtak. Din agbayag lak-amenton dagiti agnanaed ditoy daga ti panangukom ni Jehova. Siasino ti makalasat iti “naindaklan nga aldaw ti Dios a Mannakabalin-amin”? Dagidiay laeng agtalinaed a siririing iti naespirituan ken addaan iti “nasantuan a panagbibiag ken ar-aramid ti nadiosan a debosion.”—Apoc. 16:14; 2 Ped. 3:11.

Nasken ti bautismo tapno makalasat ti maysa a tao iti aldaw ni Jehova. (1 Ped. 3:21) Dagiti agibumbunannag nga agtarigagay nga agpabautisar iti asamblea rumbeng nga ibagada dayta iti mamangulo a manangaywan, a mangaramid kadagiti kasapulan nga urnos.

Ti nagkapat a paset a simposium a, “Ti Kita ti Tattao a Pagbalinantayo Koma,” ibatadna no ania dagiti tignay a nainaig iti pananglaglagiptay unay iti kaadda ti aldaw ni Jehova. Ti palawag publiko nga “Agtignay a Nainsiriban Bayat nga Umad-adani ti Aldaw ni Jehova,” ilawlawagna ti kaipapanan ti ‘panangbirok ken Jehova, ti kinalinteg, ken kinaemma,’ tapno makalasattayo.—Sof. 2:3.

Agngudo ti asamblea sirkito babaen iti dua a makagutugot a palawag dagiti agdaldaliasat a manangaywan, a napauluan: “Naipamaysa Kadi ti Biagyo iti Kinapudno?” ken “Panagplano a Nasakbay Buyogen ti Pananglaglagip iti Aldaw ni Jehova.” Dagitoy a palawag tignayennatayo a mangsukimat iti biagtayo ken mangaramid kadagiti aniaman a nasken a panagbalbaliw. Ti padto ti Biblia ken dagiti pasamak ditoy lubong nabatad nga ipakitada nga asidegen ti aldaw ni Jehova. Daytoy a programa ti asamblea tignayennatayo nga ‘agtalinaed a sipupuot ken managbantay.’ (1 Ped. 5:8) Mangaramidkayo kadagiti masnup a plano tapno matabunuanyo ti dua nga aldaw.