Ti Biblia—Pangiwanwan ti Dios Kadagiti Amin a Tattao
1 Mapattapatta Nga Uppat A Bilion (4,000,000,000) A Biblia Ti Nayimprenta Iti Nasurok A 2,100 A Lenguahe Ken Dialekto, A Gapu Iti Dayta Nasurok A 90 Porsiento Iti Populasion Ti Daga Ti Makagun-oden Iti Sao Ti Dios. Kaskasdi, Adda Panagbisin Ditoy Lubong Iti “Panagdengngeg Kadagiti Sao Ni Jehova.” (Amos 8:11) Adu A Tattao Nga Addaan Iti Biblia Ti Di Mangbasbasa Iti Dayta Wenno Di Makatarus Kadagiti Linaonna. Kasanotayo A Matignay Ida A Mangaramat Iti Biblia Kas Praktikal A Giya Iti Biagda?
2 Iti Disiembre Itukontayo Ti Libro A Ti Biblia—saot’ Dios Wenno Iti Tao? Kadagiti Aginteres, Mabalintayo Met Nga Itukon Ti Patarus Iti Biblia A Nakatulong Kadatayo Iti Napalabas Nga 47 A Tawenen—ti New World Translation. Maaramidan Daytoy Babaen Ti Panangibatad Iti Nalawag, Moderno A Sasaona. (Kitaenyo ti libro nga “Amin a Kasuratan,” panid 328, parapo 6.) Ipakitatayo Ti Nasged Nga Apresasiontayo Iti Daytoy A Parabur Ni Jehova Babaen Ti Napasnek A Panangtulong Kadagiti Sabsabali A Mangawat Iti Biblia Kas Pangiwanwan Ti Dios Kadagiti Amin A Tattao.
3 Mabalinyo nga irugi ti presentasion babaen ti panangusaryo iti tract a “No Apay a Mapagtalkanyo ti Biblia.” Mabalinyo a kunaen:
◼ “Nupay nasurok a 90 porsiento iti populasion ti lubong ti makagun-oden iti Biblia, manmano ti tattao a mangbasbasa a regular iti dayta. Panagkunayo ania ngata ti makagapu?” Basaenyo ti umuna a dua a parapo iti tract, agraman ti 2 Timoteo 3:16. Itukonyo ti libro a Saot’ Dios. No dina awaten ti libro, kiddawenyo iti bumalay a basaennanto ti dadduma pay a paset ti tract. Itampokyo ti maudi a subtitulo a, “Panangipadto ti Masanguanan.”
4 No sublianyo dagiti tattao a naibatianyo iti tract a “No Apay a Mapagtalkanyo ti Biblia,” mabalinyo a padasen daytoy:
◼ Kalpasan a mayam-ammoyo manen ti bagbagiyo, basaenyo ti maudi a dua a parapo iti tract. Saludsodenyo iti bumalay no pinampanunotnan ti posibilidad nga agbiag nga agnanayon ditoy daga. Kalpasan a sumungbat, kunaenyo: “Masigurado dagiti Saksi ni Jehova a matungpalto amin a padto a masarakan iti Biblia, a pakairamanan ti padto maipapan iti nakaskasdaaw a masanguanan para iti amin a tattao a mangan-annurot kadagiti pagalagadan ti Dios.” Ipakitayo ti ilustrasion iti panid 13 ti broshur a Kalikaguman, iturongyo iti leksion 5, sa isingasingyo a pagsaritaanyo dagiti sungbat kadagiti nailista a saludsod, iti kasta mairugi ti panagadal.
5 Iti teritoria nga ayan dagiti relihioso a tattao, mabalinyo a padasen daytoy a pangirugi iti saritaan:
◼ “Iparparegtami ti ad-adda pay a panagraem iti Biblia. Adu dagiti pamilia nga addaan iti Biblia, ngem manmanoda nga agkonsulta iti dayta no addaanda kadagiti nadagsen a problema. Nadlawyo kadi daytoy? [Palubosanyo a sumungbat.] Nalabit ipagarupda a saanen nga agaplikar ita ti Biblia. Daytoy a libro, Ti Biblia—Saot’ Dios wenno iti Tao?, mangipaay iti makaallukoy a pammaneknek nga umiso ti Biblia no maipapan iti siensia ken mangipaay dayta kadagiti praktikal a solusion kadagiti agdama a naririkut a problema.” Itampokyo ti sumagmamano a punto iti kapitulo 8 wenno kapitulo 12 iti libro, sa itukonyo dayta.
6 No surnadanyo ti napaimaanyo iti libro a “Saot’ Dios,” mabalinyo a kunaen:
◼ “Idi naudi nga ibibisitak, napagsaritaanta no kasano a makatulong ti Biblia a mangrisut kadagiti agdama a naririkut a problema. Dagidiay nangawat iti dayta kas Sao ti Dios natulonganda met a maaddaan iti naragragsak, ad-adda a makapnek a panagbiag. Kayatko nga ipakita kenka ti maysa kadagiti praktikal a prinsipio ti Biblia a nailawlawag iti libro nga imbatik kenka.” Pagsaritaanyo ti maysa kadagiti Nainkasuratan a prinsipio a masarakan iti kapitulo 12, parapo 3-6, sa ingudoyo babaen ti panangbasayo iti parapo 7. No aginteres, itukonyo ti panagadal iti man libro a Pannakaammo wenno iti broshur a Kalikaguman.
7 Mabalin a paginteresan dagiti natataengan daytoy sumaganad a presentasion:
◼ “Adda idi tiempo a mabasbasa ti Biblia iti kaaduan a pagtaengan ken agbibiag idi dagiti pamilia a maitunos kadagiti prinsipiona. Napadasan kadi dayta ti pamiliayo? [Palubosanyo a sumungbat.] Itatta, adu ti kasla makumikom unayen nga agbasa iti Biblia wenno ipagarupda a saanen nga agaplikar dagiti moral a prinsipiona. Ti kapitulo 13 daytoy a libro, Ti Biblia—Saot’ Dios wenno iti Tao?, idatagna ti tallo nga agpaypayso a kapadasan dagiti tattao a simmayaat ti biagda idi nagadalda iti Biblia. No kayatyo a basaen no kasano a nakatulong kadakuada ti bileg ti Sao ti Dios, maragsakanak a mangibati iti daytoy a libro kadakayo.”
8 Iti panagsarungkar, mabalinyo a kunaen:
◼ “Iti daydi naudi a panagtungtongta, napagsaritaanta a ti agdama a kagimongan dina ikabkabilangan dagiti moral a prinsipio ti Biblia. Rumbeng kadi a maseknantayo iti dayta a panangmatmat? [Palubosanyo a sumungbat.] Impaganetget ni Jesu-Kristo ti kinapateg ti pananggun-od iti pannakaammo iti Biblia.” Basaenyo ti Juan 17:3. Kalpasanna isalaysayyo ti parapo 5 ti kapitulo 1 iti libro a Pannakaammo. Ilawlawagyo ti programatayo a libre a panagadal iti Biblia, sa dagdagusenyo nga itukon nga idemostrayo dayta.
9 Ikararagyo a bendisionan ni Jehova amin a panagreggetyo a mangiturong iti atension iti Biblia—ti pangiwanwan ti Dios kadagiti amin a tattao.