“Panangimulat’ Bin-i ti Pagarian” Kadagiti Ruta ti Magasin
1 Ti Kanta 133 iti Agkanta iti Daydayaw ni Jehova napauluan “Panangimulat’ Bin-i ti Pagarian.” Naibatay dayta iti ilustrasion ni Jesus a mangyasping iti trabaho a panagaramid iti adalan iti panagmula iti bin-i. (Mat. 13:4-8, 19-23) Kuna dayta a kanta: “Ti kawadwad maimulam ‘diay nadam-eg/Masansan a sikat’ yanna.” Kasanotay a maparang-ay ti kinaepektibo ti ministeriotayo? Maysa isut’ panangipasdek ken panangtaginayon iti ruta ti magasin.
2 Adda sumagmamano a kalat a maragpat baeten ti ruta ti magasin. (1) Ti regular nga isasarungkar kada dua a lawas mapatanoryo ti nainggayyeman a relasion iti dayta interesado a tao. (2) Patinayonyo nga abastuan dayta iti makaispal-biag nga impormasion a linaon Ti Pagwanawanan ken Agriingkayo! (3) Baeten ti pannakisarsaritayo matulonganyo dayta a tao a mangpatanor ti panagtarigagay iti Nainkasuratan a kinapudno, nga agturong iti panagadal iti Biblia.—1 Ped. 2:2.
3 No Kasano a Rugian ti Ruta ti Magasin: No adda aginteres kadagiti magasin, ilawlawagyo a dagiti nagpaiduma nga artikulo agparangda iti kada ruar ket maragsakankayto a mangidanon kadagita kada dua a lawas. Inton nakapakadakayon, ilistayo ti nagan ken direksion ti tao, ti petsa a panagam-ammoyo, dagiti petsa ti ruar a naipaimayo, dagiti artikulo a naitampok, ken dagiti tema a nangnangruna a naginteresanna.
4 Makairugikayo iti ruta uray no manmano laeng a tao ti nailistayo. Sayonto palawaen dayta babaen ti pananginayonyo kadagiti sabali a napaimaanyo ti magasin. Bayat a lumawlawa ti rutayo, mabalinyo nga organisaren sigun iti teritoria tapno nalaklaka ti panangsaklawyo. Siaannad nga irekordyo dagiti ruar a naipaimayo iti kada isasarungkaryo ken ti ipapanyo. Inayonyo nga ilista dagiti nagsaritaanyo ken no kasanoyo nga ituloy a patanoren ti interesna iti kinapudno iti sumaganad nga ibibisitayo.
5 Iraman Dagiti Negosiante ken Propesional: Sigun iti kapadasan ad-adda a dagiti agtagtagilako ken dadduma a propesional ti regular a mangala kadagiti magasintayo. Adda panglakayen nga uray ti mayor iti ilina ket rutana ti magasin. Adda agibumbunannag a nakairugi iti panangyadal iti 80 ti tawenna a makinkukua iti kompania nga aglaklako kadagiti materiales ti pagpatakder kalpasan a nangal-ala kadagiti magasin kenkuana iti diretso a sangapulo a tawen!
6 Adda sister a payunir a simrek iti pagtagilakuan ket naam-ammona ti pagassawaan a medio nalamiis ti panangtratoda kenkuana. Nupay kasta, tangay inakseptarda dagiti magasin, innayonna dagita a pagassawaan iti rutana ti magasin. Idi agangay, kayaten ti sister nga isardeng ti ibibisitana gapu ta naikayda ken gistay dida pay agsao, uray no saludsodenna ti opinionda. Ngem inkararag ti sister dayta agingga a napaimaanna ida iti libro nga Agbiag nga Agnanayon. Kalpasan a nabasana, kinuna ti babai: “Nabirokak met laengen ti kinapudno!” Nairugi ti panangyadal iti Biblia, ket kalpasanna nagbautisar ti agassawa. Talaga a nasayaat ti imbunga ti kinaregget ti payunir.
7 Panagsarungkar: No maawatyo ti baro a magasin, basaenyo amin nga artikulo. Kitaenyo dagiti punto a paginteresan ti tunggal tao dita rutayo. Inton bumisitakayo, kunaenyo: “Idi basbasaek daytoy nga artikulo, pinampanunotka ken no kasano a makapainteres kenka daytoy.” Dagiti agibumbunannag a nagduduma ti edadda matagiragsakda ti kaadda ti rutada ti magasin. Uray ubing mabalinna a kunaen: “Maragsakanak a makakita manen kadakayo. Simmangpeten dagiti kabaruan a kopiayo iti Pagwanawanan ken Agriingkayo! Ammok a magustuanyo daytoy artikulo a napauluan . . .”
8 Parayrayenyo ti panagseggada kadagiti sumungsungad nga artikulo babaen ti panangipakitayo iti kahon a napauluan “Iti Sumaganad a Ruar.” No agparang dagiti serie nga artikulo, ipakitayo daytoy ket paregtaenyo ti managbasa a dina koma lablabsan ti uray ania a paset dayta. Dikay liplipatan a tunggal itulodyo dagiti magasin iti maysa a tao a rutayo ti magasin, ibilangyo dayta a panagsarungkar. Ket kangrunaan amin, laglagipenyo a ti kalattayo isut’ panamagbalin kadagitoy nga iyadalan iti Biblia iti pagtaenganda.
9 Regular a Sarungkaranyo Dagiti Rutayo: Mabalinyo a sarungkaran dagiti rutayo ti magasin iti aniaman a praktikal nga oras—bigat iti ngalay ti lawas, mumalmalem, sardam, wenno iti ngudo ti lawas kalpasan ti panagbalaybalayyo. No dikay masarungkaran ti rutayo gaput’ panagsakit wenno agbakasionkayo, kiddawenyo a sabali nga agibumbunannag iti pamiliayo wenno kakongregasionyo ti mangsandi a mangitulod kadagiti magasin. Iti kasta, dagidiay adda iti rutayo maalada dagiti magasinda iti umno a tiempo.
10 Maysa a wagas a panangimula iti bin-i ti Pagarian isut’ regular a panangitulodyo iti Pagwanawanan ken Agriingkayo! kadagiti amin a rutayo ti magasin. Mientras isuroyo kadakuada ti Nainkasuratan a kinapudno, mabalin a maanagda ti sao ti Pagarian ket inton agangay agbungada iti bunga ti Pagarian a kaduayo.—Mat. 13:8, 23.