Panangitulod Kadagiti Magasin—Epektibo a Pangirugi iti Panangyadal iti Biblia
1. Apay a nabayagen nga iparparegta ti organisasion ni Jehova a maaddaan dagiti agibumbunannag kadagiti itultulodan iti magasin?
1 Adu a tattao ti saan a mayat nga agpayadal iti Biblia kadatayo, ngem magustuanda a basaen dagiti magasintayo. Gapuna, nabayagen a parparegtaen ti organisasion ni Jehova dagiti agibumbunannag a maaddaan kadagiti itulodan iti magasin. Gapu ta regular a basbasaen dagiti tattao dagiti magasintayo, masansan a kailiwdan ti Sao ti Dios. (1 Ped. 2:2) Inton agangay, adda mabasada a mangtukay iti pusoda, a mangtignay kadakuada nga agpayadal iti Biblia.
2. Kasanotayo a matukay ti interes dagiti itultulodantayo kadagiti magasin?
2 ‘Sibuganyo’ ti Bin-i ti Kinapudno: Imbes a basta itulodanyo kadagiti magasin, kasaritayo ti bumalay ken ikagumaanyo a gayyemen. Makatulong daytoy tapno maammuanyo ti kasasaadna, paginteresanna, ken patpatienna, iti kasta, makasaritayo buyogen ti pannakaawat. (Prov. 16:23) Agsaganakayo tunggal sumarungkarkayo. No mabalbalin, itampokyo iti apagbiit ti maysa a punto ken nainaig a teksto manipud kadagiti magasin tapno masibugan ti aniaman a bin-i ti kinapudno iti pusona. (1 Cor. 3:6) Isuratyo ti petsa ti tunggal isasarungkaryo, ti literatura a naibatiyo, ken dagiti topiko ken teksto a napagsaritaanyo.
3. Kasano kasansan a sarungkarantayo dagiti itultulodantayo iti magasin?
3 Kasano Kasansan ti Panagsarungkar? Rumbeng a maminsan iti kada bulan a sarungkaranyo ti itultulodanyo iti magasin tapno ikkanyo iti kabaruan a magasin. Nupay kasta, mabalin a masansan a sumarungkarkayo, depende iti kasasaadyo ken iti interes ti bumalay. Kas pagarigan, maysa wenno dua a lawas kalpasan ti panangitulodyo kadagiti magasin, mabalinyo ti agsubli ket kunaenyo, “Dimmaw-asak ta adda punto a kayatko nga ipakita kenka manipud iti magasin nga intedko.” Daytoy ti mangtukay iti interesna a mangbasa iti partikular nga artikulo. No nabasana daytan, mabalinyo nga isaludsod no ania ti makunana iti artikulo sa pagsaritaanyo iti apagbiit. Wenno no magusgustuanna ti agbasa kadagiti literaturatayo, mabalinyo ti agsubli ken mangibati iti tract, broshur, wenno libro a tukontayo iti dayta a bulan.
4. Ania ti mabalintayo nga aramiden sagpaminsan tapno maammuantayo no mayat nga agpayadal dagiti itultulodantayo iti magasin?
4 Diyo urayen a kiddawen ti bumalay a yadalanyo iti Biblia. Dakayo ti mangipamuspusan iti dayta. Uray no nagkedked nga agpayadal, mabalinyo nga ipakita sagpaminsan ti “Sungbat Dagiti Saludsod Maipapan iti Biblia” manipud iti Ti Pagwanawanan ken kitaenyo no kayatna a pagsaritaan dayta. Nalabit makairugikayo iti panangyadal iti Biblia iti ruangan. Nupay kasta, no saankayo a makairugi iti panangyadal, mabalinyo nga itultuloy nga itulodan kadagiti magasin tapno parayrayenyo ti interesna.