Panangparang-ay iti Abilidadtayo iti Ministerio—Maaddaan iti Regular nga Ik-ikkan iti Magasin

No Apay a Napateg: Adu kadagiti maragragsakan nga agbasa kadagiti magasintayo ti di mayat a makipagadal iti Biblia kadatayo. Nalabit kontentodan iti relihionda, wenno panagriknada ket dida masango ti agadal. Ngem iti panagbasbasada kadagiti magasintayo, mabalin a mapatanorda ti panagtarigagay iti Sao ti Dios. (1 Ped. 2:2) Mabalin a matignayda iti maysa nga artikulo, wenno agbaliw ti kasasaadda. Makatulong ti regular ken apagbiit nga ibibisita tapno maipasigda ti bagida kadatayo ket maammuantayo dagiti paginteresan ken pakaseknanda. Inton agangay, mabalin a mairugitayo ti panagadal iti Biblia.

No Kasano nga Aramiden Daytoy:

Iti kada bulan, iyeskediulyo no kaanoyo nga ikkan ti indibidual iti kabaruan a ruar Ti Pagwanawanan ken Agriingkayo! Mabalin a sarungkaranyo iti sabali nga aldaw iti isu met la a bulan tapno maparayrayyo ti gagarna a mangbasa iti maysa nga artikulo kadagiti magasin nga intedyo wenno ikkanyo iti publikasion a tukon iti dayta a bulan. Isuratyo dagiti makatulong nga impormasion.—Kitaenyo ti Enero 2014 a Ti Ministeriotayo iti Pagarian, p. 3.
Agsaganakayo iti tunggal ibibisita. Imbes a basta itedyo lattan dagiti magasin, kasaritayo ti bumalay ken ikagumaanyo a gayyemen tapno maparayrayyo ti interesna.
Nasiputkayo koma kadagiti gundaway a makairugikayo iti panagadal. No agdamag ti ik-ikkanyo iti magasin no ania ti kuna ti Biblia maipapan iti maysa a topiko, ikkanyo inton sumaganad iti publikasion a maus-usar iti panangyadal a naglaon iti sungbat ken pagsaritaanyo dayta. Sakbay a pumanawkayo, mangibatikayo iti mainaig a saludsod ken pagsaritaanyo inton agsublikayo. Uray apagbiit laeng ti panagsaritayo maipapan iti Biblia wenno iti maysa kadagiti publikasion a maus-usar iti panangyadal, mangikonkonduktakayon iti panangyadal iti Biblia no regular ken organisado dayta. Inikkanyo kadin ti bumalay iti broshur a Naimbag a Damag sa indemostrayon ti ababa a panagadal iti Biblia? Impabuyayo kadin kenkuana dagiti video nga Apay nga Adalem ti Biblia? ken Kasano ti Panagadal iti Biblia? Uray no dina kayat idi ti makipagadal iti Biblia, agbalbaliw ti kasasaad. Adda kadi pagsayaatanna no itukonyo manen dayta?

Padasenyo Ita a Bulan:

Ilistayo dagiti posible a regular a maikkan iti magasin. Itukonyo kadakuada dagiti agdama a ruar ti magasin, ken ibagayo nga ikkanyonto manen ida iti kopia ti sumaganad a ruar.