Sigagagar nga Ikasaba ti Naimbag a Damag
1 “Il-iliwek a makitakayo . . . Adda kinagagar iti biangko nga ideklara ti naimbag a damag kadakayo met.” Kastoy ti inyebkas ni apostol Pablo iti rugi ti suratna kadagiti kakabsat idiay Roma. Apay a sigagagar ni Pablo a sumarungkar kadakuada? Kinunana: “Tapno makagun-odak met koma iti sumagmamano a bunga kadakayo . . . Ta diak ibain ti naimbag a damag; iti kinapudnona, dayta ti pannakabalin ti Dios a pakaisalakanan.”—Roma 1:11-16.
2 Imparangarang ni Pablo daytoy met la a kinagagar idi kinasaona dagiti panglakayen ti Efeso. Impalagipna kadakuada: “Manipud idi umuna nga aldaw a bimmaddekak iti distrito ti Asia . . . , diak minedmedan . . . ti panangisuro kadakayo iti publiko ken iti binalay-balay. Ngem naan-anay a nangipaayak iti pangsaksi agpadpada kadagiti Judio ken kadagiti Griego.” (Ara. 20:18-21) Kadagiti amin a naituding a teritoriana, napasnek ni Pablo a nangirakurak iti naimbag a damag ti pannakaisalakan ken nanggun-od iti bunga ti Pagarian. Anian a nagsayaat nga espiritu a tuladen!
3 Mabalintay nga iyimtuod iti bagbagitayo: ‘Ipakpakitak kadi ti kasta met laeng a kinagagar a mangideklara iti naimbag a damag ditoy lugarko? Imbes a matmatak a kas annongen laeng ti trabaho a panangasaba, sigagagarak kadi a mangiburay iti naimbag a damag kadagiti adu a tattao no mabalbalin? Inamirisko kadi buyogen ti kararag dagiti personal a sirkumstansiak? Sinukimatko kadin amin a posibilidad nga adda iti teritoriami, kas ti panangasaba iti binalaybalay, iti lansangan, kadagiti pagnegosiuan, iti telepono, ken iti impormal a pamay-an?’
4 Sigagagar a Makiraman iti Abril: Nasayaat a tiempo ti bulan ti Abril tapno ad-adda pay a maipamaysatayo ti makiraman a personal iti trabaho a panangasaba. Ad-adu koma ti makapag-auxiliary pioneer gapu ta bimmaba ti makalikaguman nga oras. Nalabit palubosannakayto dagiti sirkumstansiayo nga ag-auxiliary pioneer iti Abril ken Mayo. Wenno makapag-regular payunirkayo gapu ta nabaliwan ti makalikaguman nga oras. No maysakayo nga agibumbunannag iti kongregasion, mabalinanyo kadi ti mangbusbos iti ad-adu nga oras ngem iti gagangay iti serbisio iti daytoy a bulan ken iti sumaganad, tapno masuportaranyo dagiti makabael nga agpayunir? Makaparagsakto dayta iti puso ni Jehova!
5 Kas ken Pablo, itultuloy koma dagiti agibumbunannag iti Pagarian nga iparangarang ti kinagagar babaen ti pannakibuligda iti trabaho a panangasaba. Magun-odtay ti napaypayso a rag-o no aramidentay ti amin a kabaelantayo iti ministerio. Kastoy ti rag-o a narikna ni Pablo iti sagrado a serbisiona. Nasayaat unay no tuladentayo ti ekselente nga ulidanna.—Roma 11:13; 1 Cor. 4:16.