“Ania ti Rumbeng nga Aramidek?”
1 Kas agtutubo a dandanin dumanon iti kinaadulto, mabalin nga iyimtuodmo, ‘Ania ti rumbeng nga aramidek iti biagko?’ Kalikaguman dagiti Kristiano nga agtutubo a palawaen ti serbisioda ken Jehova iti ministerio. Ngem kasanoyo nga aramiden daytoy bayat nga ibakbaklayyo dagiti responsabilidad ti kinaadulto, a ramanenna ti panangpataud kadagiti material a kasapulanyo? Saan a nalaka a sungbatan dayta.
2 Madanagan dagiti dadduma nga agtutubo no matmatanda ti situasion ti ekonomia ti lubong ken dagiti padlesda iti masanguanan. Kunaenda: ‘Rumbeng aya a gumun-odak iti kanayonan a sekular nga edukasion? Rumbeng aya a sumrekak a madagdagus iti amin-tiempo a serbisio?’ Tapno makaaramid iti umiso a pangngeddeng, masapul a ti maysa sungbatanna a sipapasnek daytoy a saludsod, ‘Ania ti kangrunaan a paginteresak iti biag?’ Masapul a sukimatenna dagiti motibona.
3 Ania ti napatanoryo a kangrunaan a pakaseknan bayat ti kinaagtutuboyo? Ad-adda kadi nga interesadokay nga agbirok iti pinansial a pagimbaganyo, wenno pudpudno kadi a tarigagayanyo nga usaren ti biagyo a mangparang-ay kadagiti interes ti Pagarian? Ti kurso iti unibersidad dina garantisaran ti panagballigi nga agsapul iti panggedan. Kas alternatibo, adu dagiti nakasursuro kadagiti paglaingan babaen ti panageskuelada iti bokasional wenno teknikal, wenno dagiti ababa a kurso ti kolehio a bassit la ti kalikagumanna a tiempo ken pannakaseknan.
4 Agtalekkayo iti Kari ni Jehova: Ti nasken unay a kinapudno nga usigenyo isu ti panangipanamnama ni Jehova a Dios nga ipaaynanto ti kasapulan dagidiay mangyun-una kadagiti interes ti Pagarian iti biagda. (Mat. 6:33) Saan a barengbareng daytoy a kari. Adu a kakabsat a timmabuno iti Ministerial Training School ti nagraduar iti kolehio sakbay a naammuanda ti kinapudno. Ngem ania idi ti sekular a panggedanda? Manmano dagiti nangikurri iti kurso a naturposda. Adu kadakuada ti mangipapaay idi kadagiti simple a serbisio kas panggedanda, nga umdas unay a panglitup kadagiti pinansial a kasapulanda bayat nga agpaypayunirda. Babaen ti panangpalawada iti aktibidadda iti ministerio, tagtagiragsakenda dagiti bendision a napatpateg nga amang ngem iti maited ti kuarta.
5 Tapno maikeddengyo no ania ti aramidenyo kalpasan nga agturposkayo iti high school, tingitingenyo amin a bambanag ket sukimatenyo a siaannad dagiti motiboyo. Usigenyo dagiti impormasion kas ti nagparang iti Agriingkayo! a Marso 8, 1998, panid 19-21 tapno natimbeng ti panangmatmatyo kadagiti pagpilianyo. Kasaritayo dagiti dadakkelyo, dagiti panglakayen, ti manangaywan ti sirkito, ken dagiti naballigi a payunir dita lugaryo. Makatulongto dayta kadakayo a mangaramid iti nainsiriban a pangngeddeng no ania ti rumbeng nga aramidenyo iti biagyo.—Ecl. 12:1, 13.