Makatulongkay Kadi?
1 Binalakadan ni apostol Pablo dagiti kameng ti kongregasion nga “addaanda koma iti isu met laeng a panangisakit iti maysa ken maysa.” (1 Cor. 12:25) Gapuna, ipakitatay koma ti personal nga interes iti maysa ken maysa ken situtuloktayo koma a mangipaay iti naayat a tulong no kasapulan. Kas maysa a pagarigan, dadduma kadagiti naespirituan a sister iti nagtetengngaantayo ket agsolsoloda a mangiturturong kadagiti annakda iti kinapudno. Ibakbaklay dagitoy a sister ti intero a responsabilidad a mangsanay kadagiti annakda iti naespirituan. Sigurado a maikarida iti naanus a pammaregtatayo ken praktikal a tulong “sigun kadagiti kasapulanda. (Roma 12:13a) Matulonganyo kadi ida?
2 Dagiti Wagas a Mabalinyo ti Tumulong: Kadagidiay awan bukodda a lugan, ti panangilugan kadakuada kadagiti gimong ken asamblea ket mabalin a kissayanna ti paggastuan dayta a pamilia. Mabalin nga ad-adda a magunggonaan ti ina manipud iti programa no tulongantay a mangaywan kadagiti babassit nga annakna kabayatan ti gimong. Kasta met, ti panangitukon iti tulong no itugotna dagiti annakna iti pangasabaan ket mabalin a mangpalag-an kenkuana. Ti panangipakita iti napaypayso nga interes kadagiti ubbing—pananggayyem kadakuada—ket makatulong unay kadagiti agtutubotayo. Ti sagpaminsan a panangawis iti pamilia ti agsolsolo a naganak tapno makidanggay iti panagadal ti pamiliayo ket makaipaay iti makapabang-ar a naespirituan a tulong.
3 Agannadtayo: Kas panagannad, ditay koma ipilit ti tumulong no mariknana a dina kasapulan dayta. Ken ditay met kayat ti makibiang kadagiti pribada a pakaseknan ti pamiliana bayat a tumultulongtayo. Siempre, dagiti sister ken agassawa ti kasayaatan a tumulong iti sister nga agkasapulan.
4 Maparegta dagiti amin a Kristiano a ‘surotenda ti kurso ti kinamanagpadagus’ iti maysa ken maysa. (Roma 12:13b) Ti panangtulong kadagiti naespirituan a kakabsattayo a lallaki ken babbai ket maysa kadagiti adu a wagas a pangipakitaantay iti ayattayo iti maysa ken maysa a kas iti ayat nga impakita ni Kristo.—Juan 13:35.