Saludsod

◼ Aniada a publikasion ti rumbeng nga iyadaltayo kadagiti kabbaro sakbay a mabautisaranda?

Sakbay a maidedikar ti maysa a tao ti biagna ken Jehova sa agpabautisar, masapul a gun-odenna ti umiso a pannakaammo. (Juan 17:3) Magun-odna ti impormasion a kasapulanna babaen ti panangadalna nga agpadpada iti broshur nga Ania ti Kalikaguman ti Dios Kadatayo? ken ti libro a Pannakaammo a Mangiturong iti Biag nga Agnanayon. Kaaduanna, umuna a maadal ti broshur a Kalikaguman. Nupay kasta, no nairugi ti panagadal iti libro a Pannakaammo, maadal koma ti broshur a Kalikaguman inton malpas ti libro. Apay a nasken daytoy?

Ti broshur a Kalikaguman ket mangipaay iti pamalatpatan kadagiti kangrunaan a pannursuro ti Biblia. No naadal dayta nga immun-una, ipaayanna ti estudiante iti pamunganayan a pannakaawat kadagiti makalikaguman tapno maparagsakna ni Jehova. No naudi dayta a naadal, agserbi a kas nasayaat a pangrepaso kadagiti naadal iti libro a Pannakaammo. Aniaman ti maadal nga umuna, paregtaenyo ti estudiante a mangkita kadagiti pangsuporta a kasuratan ken mangmennamenna kadagita. Siguraduenyo nga itampok dagiti ladawan, yantangay epektibo unay dagita a pangisuro.​—Kitaenyo ti Enero 15, 1997 a Pagwanawanan, panid 16-17.

Apaman a naadalen ti estudiante ti Biblia dagita a publikasion, mabalin a masungbatannan amin dagiti saludsod nga irepaso kenkuana dagiti panglakayen kas panagsagana iti bautismo. No kasta, mabalin a saanen a kasapulan ti pormal a panangyadal kenkuana iti aniaman a sabali pay a publikasion, nupay itultuloy koma ti konduktor nga ipakita ti napinget a panaginteres iti irarang-ayna.​—Kitaenyo ti Enero 15, 1996 a Pagwanawanan, panid 14, 17.