Nakalukat Kadin Kadakayo ti Ruangan ti Panagpayunir?
1 Ipalagip kadatayo ti tekstotayo iti tawen 1999 nga addatay pay laeng iti intuding ni Jehova nga “aldaw ti pannakaisalakan.” (2 Cor. 6:2) Ngem din agbayag, agpatinggan ti intudingna nga aldaw ti pannakaisalakan. Kalpasanna, mangruginton ti “aldaw a panangukom[na].” (2 Ped. 2:9) Bayat nga ipapaayan pay laeng ni Jehova ti sangatauan iti gundaway para iti pannakaisalakan, anian a makaparagsak a makita ti umad-adu a mangipangpangag!
2 Inkagumaan ti ili ni Jehova a sanguen ti karit a panangdanon kadagidiay mangipangag sakbay a maladaw. Kadagiti adu nga agibumbunannag iti Pagarian, kaipapanan daytoy ti panagpayunir. Nakalukat kadin kadakayo ti ruangan ti panagpayunir? Apay a maisaludsodtayo dayta?
3 Nayebkas nga Apresasion: Kas naipakaammo iti Enero 1999 a Ministeriotayo iti Pagarian, napabassit ti makalikaguman nga oras kadagiti regular ken auxiliary pioneer. Tapno maragpatda ti baro a makalikaguman, nasken a mangipaay dagiti regular pioneer iti 70 nga oras iti ministerio iti kada bulan, nga agdagup iti 840 nga oras iti kada tawen serbisio. Mangbusbos dagiti auxiliary pioneer iti 50 nga oras iti serbisio kada bulan. Adtoy ti sumagmamano kadagiti adu nga ebkas ti panangapresiar a naawat kas resulta dagitoy a panagbalbaliw:
“Anian a nakaay-ayat a sagut manipud iti nailangitan nga Amatayo!”
“Awan sasao a makailadawan iti napalaus a rag-o, ayat, ken panagyaman gapu iti daytoy a probision!”
“Dayta ti mangpalaka unay iti panangsurotmi iti eskediulmi!”
“Ikarkararagmi nga ad-adu pay koma ti sumrek iti amin-tiempo a ministerio ket tagiragsakenda dagiti bendision nga agtaud iti panagserbi ken Jehova nga ad-adda pay.”
4 Bayat nga umad-adanitayo iti kangitingitan ti intuding ti Dios nga aldaw ti pannakaisalakan, nabatad a tarigagayan ni Jehova a mangipaay ti ilina iti ultimo, napigsa a dir-i ti panangidayaw. Nanayonan ti bileg ken puersa daytoy a mensahe (1) babaen ti agtultuloy nga iyaadu dagiti manangiwaragawag ti Pagarian ken (2) babaen ti panangikagumaan ti tunggal maysa a mangpaadu iti maaramidanna iti pannakaikasaba ti Pagarian. Ni Jehova, daydiay “mangpadakkel iti dayta,” ket agpadpada a pinagballigina dagita babaen ti panangbendisionna iti kinatulok dagiti amin nga immawat iti pannakaisalakan.—1 Cor. 3:6, 7; Sal. 110:3.
5 Saankay Koma a Maikapis iti Panggepna: Binalakadan ni Pablo dagiti padana a Kristiano maipapan iti intuding ni Jehova nga aldaw ti pannakaisalakan: “Yantangay makipagtartrabahokami a sangsangkamaysa kenkuana [ken Jehova], ipakaasimi met kadakayo a saanyo nga awaten ti di kaikarian a kinamanangngaasi ti Dios ket maikapiskayo iti panggepna.” Saantayo a ‘maikapis iti panggepna’ no makitatayo nga isu daytoy “ti nangnangruna a makaay-ayo a tiempo” tapno agtrabaho iti tunggal oportunidad para iti pannakaisalakan dagiti sabsabali. (2 Cor. 6:1, 2) Itatta, ad-adda a naganat ti sasao ni Pablo. Dagiti Kristiano a mangiparparangarang iti naimpusuan nga ayat ken Jehova ibilangda a pribilehio ti pannakiraman a naan-anay iti ministerio nga impaannongna kadakuada. Kabaelanyo kadin ti makiraman nga ad-adda pay iti ministerio kas maysa a regular pioneer?
6 Rasonable Dayta a Kalat: Ditoy Pilipinas, kalattayo ti maaddaan iti 20,000 a regular pioneer inton Setiembre 1. Patienmi a rasonable ken maragpat daytoy a kalat. Apay a mangnamnamatayo unay iti dayta? Idi Abril 1997, naaddaantayo iti 22,410 a kakabsat a nag-auxiliary pioneer, ken 19,593 idi Abril 1998. Kaaduan ti nagreport iti 60 nga oras—a kurang laengen iti 10 nga oras iti baro a makalikaguman iti regular pioneer! Uray 4,000 laeng kadagidiay a nag-auxiliary pioneer ti agpasalista a regular pioneer sakbay nga agngudo daytoy a tawen serbisio, mairugitayo iti Setiembre ti 20,000 wenno ad-adu pay nga amin-tiempo a payunir!
7 Kasapulan ti Eskediul: Kasla marigatankay kadi pay laeng a mangragpat iti 70 nga oras a panagserbi idiay tay-ak iti makabulan? Nalabit makatulong no panunotenyo ti 17 nga oras iti makalawas. Babaen ti panangusar kadagiti pagtuladan nga eskediul iti sumaganad a panid, padasenyo ti mangaramid iti eskediul ti regular pioneer a tumutop kadagiti personal a kasasaadyo. Bayat nga iyurnosyo dayta, makiumankayo kadagiti aduan iti kapadasan a payunir no kasanoda a balbalansien ti panagpayunirda bayat nga ibaklayda dagiti rebbengenda a personal ken iti pamilia. Saludsodenyo iti manangaywan ti sirkitoyo no kasano nga iyes-eskediul dagiti payunir iti sirkito ti panagserbida iti kada lawas. Kalpasanna agpannuraykayo ken Jehova a bendisionanna dagiti planoyo nga agpayunir.—Prov. 16:3.
8 Pagbalinenyo a Proyekto ti Pamilia: Pinampanunotyo kadin a pagbalinen a proyekto ti pamiliayo ti panagpayunir? Mabalin nga agtugawkayo a sangapamiliaan ket pagsasaritaanyo no kasano a—babaen ti naannad a panagplano ken nasayaat a panagtitinnulong—makapagpayunir ti maysa wenno dua a miembro ti pamilia. Siempre, kalpasan ti napudno a panangusig kadagiti kasasaadda, makitanto ti dadduma a dida pay makapag-regular pioneer itatta. No kasta, pagbalinenyo a kalat ti panagpayunir iti masanguanan. Ngem rugianyon ti agplano a mangyurnos iti masnup a petsa a panangrugiyo nga agpayunir. Nalabit mabalinyo ti ag-auxiliary pioneer sagpaminsan kabayatan dayta a tawen agingga nga in-inut a makapag-regular pioneer-kayo.
9 Nagduduma ti kasasaad dagiti nasurok a 16,000 nga agdama a regular pioneer iti Pilipinas. Saanda a nasalun-at amin, ken kaaduan kadakuada ket addaan kadagiti obligasion iti pamilia ken iti pinansial. Nasurok a 3,600 a payunir ti agedaden iti nasurok a 50, ken agarup 2,800 kadakuada ti agedaden iti nasurok nga 65. Agarup 1,000 ti agtawen iti 20 wenno ub-ubing pay. Kadagiti amin a payunir, agarup apagkapat kadakuada ti lallaki, nga adu ti addaan kadagiti rebbengen iti pamilia ken iti kongregasion. Amin dagitoy ket ‘gatgatangenda ti nainggundawayan a tiempo’ tapno makapagpayunir, nga iti adu a kaso kaipapananna ti nasimsimple ngem ad-adda a makapnek a panagbiag.—Col. 4:5.
10 Kasapulanyo Kadi ti Panangpasimple? Ti panangpasimple iti biagyo ket mabalin nga isu ti tulbek a manglukat iti ruangan ti panagpayuniryo. Ti aya biagyo ket kas iti dakkel a balay nga addaan kadagiti awan kaes-eskanna a kuarto ken alikamen, nga agkasapulan iti adu a tiempo, kuarta, ken trabaho tapno mataripatoyo dagita? No kasta, nalabit makapagpayunirkayo no pagbalinenyo a nasimsimple ti kasasaadyo. Mapabassityo kadi ti tiempo a busbosenyo iti sekular a trabaho? Mabalinyo kadi a gatangen ti tiempo manipud iti di nasken nga aramid wenno ad-adda pay a timbengenyo ti kaadu ti tiempo a busbosenyo iti panaglinglingay?
11 Balakadannatayo ti Biblia iti 1 Timoteo 6:8: “No adda pagtaraon ken pagkawestayo, mapnektayon kadagitoy a bambanag.” Ti pannakapnek iti bassit ket napateg a banag tapno maaramidtay ti amin a kabaelantayo iti panagserbi ken Jehova ken palakaenna ti panangyun-una kadagiti naespirituan nga interes. (Mat. 6:22, 33) Iti panid 104 ti 1998 Yearbook iti report idiay Japan, nadakamat ti sumagmamano a makagapu no apay a nagsayaat ti espiritu ti panagpayunir iti dayta a pagilian. Usigenyo ti maysa: “Kaaduanna, pudno a nakasimsimple ti pagtaengan dagiti Hapon, isu a bassit laeng ti tiempo a kasapulan iti panangmantener, ken kaaduanna, nakayugalianda ti simple a panagbiag.” Saan aya a dayta ti kababagas ti 1 Timoteo 6:8?
12 Iti intero a lubong, nakagangganetget dagiti adipen ti Dios a mangikaskasaba iti naimbag a damag sakbay nga agpatingga ti intuding ni Jehova nga aldaw ti pannakaisalakan. Makomendaran unay ta itay napan a tawen, agpromedio iti gistay 700,000 ti nakiraman iti nagduduma a porma ti panagpayunir iti kada bulan. Mabalinyo kadi a balbaliwan ti wagas ti panagbiagyo tapno makaduayo ida? Awisendakayo a mangusig a siaannad ken buyogen ti kararag kadagiti kasasaadyo bayat a sungbatanyo ti saludsod a: “Nakalukat kadin kadakayo ti ruangan ti panagpayunir?”
[Blurb iti panid 3]
KALAT: 20,000 A REGULAR PIONEER!
[Kahon iti panid 4]
Dagiti Pagtuladan nga Eskediul ti Regular Pioneer
Kasapulan: 17 nga oras iti makalawas
Maysa nga Aldaw iti Tengnga ti Lawas ken ti Ngudo ti Lawas
Aldaw Oras
Biernes 8
Sabado 6
Domingo 3
Dagup nga Oras: 17
Dua nga Aldaw iti Tengnga ti Lawas ken Sabado
Aldaw Oras
Martes 7
Huebes 7
Sabado 3
Dagup nga Oras: 17
Tallo nga Aldaw iti Tengnga ti Lawas ken Domingo
Aldaw Oras
Lunes 5
Mierkoles 5
Biernes 5
Domingo 2
Dagup nga Oras: 17
Dua a Rabii ken ti Ngudo ti Lawas
Aldaw Oras
Lunes 3
Mierkoles 3
Sabado 8
Domingo 3
Dagup nga Oras: 17
Mangaramidkay iti Bukodyo nga Eskediul ti Regular Pioneer
Aldaw Oras
Lunes
Martes
Mierkoles
Huebes
Biernes
Sabado
Domingo
Dagup nga Oras: 17