Pumudnonto Amin a Naimpadtuan a Sao ti Dios!
1 Kanayon nga interesado dagiti Saksi ni Jehova iti padto ti Biblia. Gapuna naragsakantayo idi maammuantayo a ti tema ti kalkalpas a kombension ket “Naimpadtuan a Sao ti Dios.” Nagagarantayo idi a mangammo no ania ti insagana ni Jehova kadatayo a ‘taraon iti umiso a tiempo.’ (Mat. 24:45) Saannatayo a pinaay.
2 Dagiti Tampok ti Kombension: Ti panulbek a palawag iti Biernes nga “Ipangagyo ti Naimpadtuan a Sao ti Dios,” inramanna ti makaisuro a panangusig iti salaysay maipapan iti panagbalbaliw ti langa ni Jesus. (Mat. 17:1-9) Impaganetgetna nga addatayo itan iti wangawangan ti kasayaatan kadagiti panawen gapu ta nakaas-asidegtayon iti panungpalan, nga addan iti sanguanantayo ti baro a sistema! Ti maysa a napateg a pamay-an tapno maipangagtayo ti Sao ti Dios ket babaen ti regular a panangbasa iti dayta. Ti simposium a “Pagragsakanyo ti Agbasa iti Sao ti Dios” nangipaay kadagiti praktikal a singasing a mamagbalin nga ad-adda a makagunggona ken makaparagsak ti panagbasatayo iti Biblia.
3 Iti malem ti Sabado rinepasotayo dagiti makagapu no apay a rumbeng a kombinsidotayo nga agbibiagtayon kadagiti maudi nga al-aldaw. Malagipyo kadi amin dagitoy? Iti agsapa ti Domingo, naaddaan iti biag ti padto ni Habacuc yantangay naammuantayo a ti kaaldawantayo ket umasping unay iti kaaldawanna ken dandanin dumteng dagiti nakapatpateg a pasamak inton dadaelen ni Jehova dagiti nadangkes ken isalakanna dagiti nalinteg. Natarusanyo kadi ti punto ti drama ti Biblia maipapan kada Jacob ken Esau? Masapul a ganetgetantayo a gun-oden dagiti pamendision ni Jehova, nga idiantayo ti espiritu ti kinaaleng-aleng ken kinaawan interes.
4 Makapainteres Unay a Baro a Libro: Anian a ragsaktayo nga immawat iti baro a libro nga Ipangagyo ti Padto ni Daniel! Di pagduaduaan a basbasaenyon daytoy makaabbukay a publikasion. Kinuna ti nagpalawag a nangiruar iti dayta: “Malaksid iti sumagmamano laeng a detalye, natungpalen amin dagiti padto iti libro ni Daniel.” Saan kadi nga ipaganetget dayta ti kinaganat ti tiempotayo?
5 Ti programa ti kombension pinabilegna unay ti pammatitayo a pumudnonto amin a kari ti Dios a saan pay a natungpal. Maparegtatayo nga agtultuloy a mangipakaammo iti naimpadtuan a sao ti Dios kadagiti sabsabali!