Saludsod
◼ Siasino ti makinrebbeng a mangdalus iti Kingdom Hall?
Ti Kingdom Hall a nadalus ken napintas ket pakaitan-okan ti mensahe nga ikaskasabatayo. (Idiligyo ti 1 Pedro 2:12.) Napateg a masalimetmetan a nadalimanek ken nadalus ti patakder, ket adda maitulong ti tunggal maysa iti pannakamantenerna. Ditay koma mangnamnama nga interamente nga ibaklay dayta ti sumagmamano laeng a tattao. Masansan a mayurnos ti panagdalus sigun kadagiti grupo ti Panagadal iti Libro ti Kongregasion, nga idauluan ti konduktor ti panagadal wenno ti katulonganna. Kadagiti hall a saan a maymaysa a kongregasion ti aggigimong, iyurnos dagiti panglakayen ti bambanag tapno makapagtitinnulong amin dagiti kongregasion iti pannakamantenerna.
Kasano ti kasayaatan a panangtaming iti daytoy a responsabilidad? Madalusan koma ti Kingdom Hall sigun iti regular nga eskediul. Nakasagana koma dagiti suplay ken alikamen a pagdalus. Adda koma maipaskil a listaan dagiti kasapulan a maaramid tapno ammo dagiti agtrabaho no ania ti aramidenda. Mabalin nga adda dua a nagduma a listaan, maysa para iti gagangay a simple a panagdalus kalpasan ti kada gimong ken ti maysa para iti nasaksaknap a panagdalus iti linawas. Iyeskediul koma ti konduktor ti panagadal ti nasaksaknap a panagdalus iti aldaw ken oras a kombeniente kadagiti amin a natudingan. Regular met koma a maasikaso ti arubayan, dagiti sabsabong, ken mulmula. Kanayon koma a nadalus dagiti pagnaan ken pagiparadaan. Adda koma tinawen a general cleaning, nalabit sakbay ti Memorial. Mabalin a mairaman iti daytoy ti panangdalus kadagiti tawa, diding, ken pananglaba kadagiti kortina.
Siempre, makatulongtayo amin a mangpalag-an iti trabaho no ditay agiregreg iti chewing gum wenno agiwara iti uneg ken ruar ti hall. Dalusantayo ti kasilias kalpasan ti kada panagusar tapno nadalus nga usaren ti sumaganad. Agannadkayo koma tapno dikay makadadael kadagiti alikamen wenno dekorasion. Kitaenyo dagiti mansa ti suelo, nadadael a tugtugaw, parikut iti tubo, napundi a silaw, ken dadduma pay, ket dagdagusenyo nga ibaga dagitoy iti kabsat a mangay-aywan iti pannakamantener ti Kingdom Hall.
Sapay koma ta situtuloktayo amin a mangaramid iti pasettayo. Daytoy ti mamagbalin a makaay-ayo ti balay a pagdaydayawantayo ken mangipabigbig kadatayo kas nadalus nga ili a mangidaydayaw ken Jehova a Dios.—1 Ped. 1:16.