“Ti Panagbannogyo Saan nga Ubbaw”
1 Anian a makaparegta a kapanunotan! Saan nga ubbaw ti panagbannogyo nga agserbi ken Jehova. (1 Cor. 15:58) Maisupadi iti dayta, panunotenyo ti adu a tiempo ken rigat dagiti tattao a mangikagumaan a mangpasayaat iti kasasaadda iti biag wenno ti pinansial a situasionda. Mabalin a busbosenda ti adu a tawen tapno makagun-odda iti nangato nga adal wenno igaedda ti agtrabaho tapno bumaknang. Kaskasdi, gapu iti “tiempo ken ti di mapakpakadaan a pasamak,” mabalin a dida pulos magun-od ti kalkalikagumanda a dayaw, wenno nalabit dida masagrap dagiti tartarigagayanda a material. Kas iti “panagagawa iti angin,” ubbaw dagiti panagreggetda. (Ecl. 1:14; 9:11, NW) No kasta, anian a nagpateg nga aduantayo iti aramid iti kakaisuna a trabaho a saan nga ubbaw gapu ta manayon ti pategna!
2 Ti Trabaho a Pudno a Napateg: Ti panangikasaba iti naimbag a damag ti Pagarian ti Dios isu ti kapatgan a trabaho ditoy daga. Dayta ti trabaho a masapul a maaramid, dumngeg man wenno saan dagiti tattao. Kayattay a maikuna ti kas iti kinuna ni Pablo: “Nadalusak iti dara dagiti amin a tattao, ta diak minedmedan ti panangibaga kadakayo iti isuamin a pammatigmaan ti Dios.”—Ara. 20:26, 27.
3 No dumngeg ken ipangag dagiti tattao ti mensahe ti Pagarian, anian a rag-o! Adda agtutubo a babai a natayan iti ikit. Pinampanunotna no sadino ti napanan ti ikitna—idiay langit wenno idiay impierno? Inkararagna ti tulong ti Dios, nga inusarna ti nagan a Jehova, kas insuro kenkuana ti kabsatna. Di nagbayag agad-adalen iti Biblia ken tumabtabunon kadagiti Nakristianuan a gimong. Nagbalbaliw a naan-anay ti panangmatmatna iti biag ket insardengnan ti makitimpuyog kadagiti barkadana iti lansangan. Insardengen ti balasang ti agsigarilio, agdroga, ken agtakaw. Inaminna: “Ti laeng panagayat ken Jehova ti nakatignay kaniak a mangidian iti kasta a dakes a panagbiag. Ti naindaklan nga asi ni Jehova ti kakaisuna a makaipaay kaniak iti namnama a biag nga agnanayon.” Saanen nga agbibiag iti kinaubbaw.
4 Uray no di dumngeg dagiti tattao, kaskasdi nga adda napateg a magapuananyo. Ammoda a simmarungkar kadakuada dagiti Saksi ni Jehova. Mapasingkedan ti mismo a kinatarnaw, kinamatalek, ken ayatyo. Gapuna, ubbaw kadi ti panagbannogyo iti aramid ti Apo? Pulos a saan!