‘Agbalinkayo a Naparabur, Sisasagana a Mangiranud’
1 Sinigsiglon ti napalabas, binilin ni apostol Pablo ni Timoteo a paregtaenna dagiti kapammatianna “nga agaramidda iti naimbag, nga agbalinda a nabaknang kadagiti nasayaat nga ar-aramid, nga agbalinda a naparabur, sisasagana a mangiranud.” (1 Tim. 6:18) Pinalagipan met ni Pablo dagiti Hebreo a Kristiano a dida liplipatan ‘ti agaramid iti naimbag ken ti mangiranud kadagiti bambanag kadagiti dadduma.’ (Heb. 13:16) Apay nga insuratna dagitoy nga instruksion? Agsipud ta ammona nga adda “dayag ken dayaw ken talna agpaay iti tunggal maysa nga agaramid ti naimbag.”—Roma 2:10.
2 Gapu ta isu ti Namarsua, ni Jehova a Dios ti Makinkukua iti amin a banag. (Apoc. 4:11) Sigurado nga apresiarentayo ti ar-aramidenna nga agpaay kadatayo babaen kadagiti sanikuana. Iti laksid ti kinaawan panagyaman dagiti adu iti sangatauan, agtultuloy nga ipalubos ti Kangatuan a lak-amen amin a tattao dagiti naayat a probisionna a mangsustiner iti biag. (Mat. 5:45) Insakripisiona pay ti patpatgenna unay nga Anak tapno maaddaantayo koma iti biag nga agnanayon. Saan kadi a dayta nga ayat a naipakita kadatayo ti rumbeng a mangtignay kadatayo a mangipaneknek a managyamantayo babaen ti panagbalin a naparabur kadagiti padatayo a tattao?—2 Cor. 5:14, 15.
3 Ania ti Mairanudtayo? Maikanatad laeng nga usarentay ti aniaman a sanikuatayo iti wagas a makaay-ayo iti imatang ti Dios. Sigurado a kayattay a suportaran ti sangalubongan a trabaho ti Pagarian iti material ken naespirituan a wagas. Siempre, ti naimbag a damag isu ti kapatgan a gameng a mabalin a matagikua ti asinoman, yantangay dayta ti “pannakabalin ti Dios a pakaisalakanan.” (Roma 1:16) Babaen ti naparabur a panangusartay iti panawen ken sanikuatayo iti kada bulan tapno makiraman iti trabaho a panangasaba ken panangisuro, mairanudtayo daytoy naespirituan a gameng kadagiti sabsabali, a mangiturong iti pananggun-odda iti biag nga agnanayon.
4 Maragsakan unay ni Jehova no tulongantay dagidiay napanglaw. Addada inkarina a bendision, ken palagipannatayo met: “Ti kinabaknang awanto mamaayna intono al-aldaw ti pungtot; ngem ti kinalinteg mangispal manipud ken patay.” (Prov. 11:4; 19:17) Ti panangsuporta iti trabaho ti Pagarian iti material a wagas ken ti naan-anay a pannakiraman iti pannakaikasaba ti naimbag a damag ket nagsayaat a pamay-an tapno maipakitatay a pudno a naparaburtayo, a sisasagana a mangiranud.