Agaramidkayo iti Naimbag ken Tulonganyo Dagiti Sabsabali
1 “Aduan [ni Dorcas] iti naimbag nga ar-aramid ken sagsagut ti asi.” (Ara. 9:36, 39) Gapu iti kinaparaburna, isu ket impateg ni Jehova a Dios ken dagiti tattao a makaam-ammo kenkuana. Kuna ti Hebreo 13:16: “Dikay lipatan ti panagaramid iti naimbag ken ti panangiranud iti bambanag iti sabsabali, ta babaen iti kakasta a sakripisio maay-ayo a naan-anay ti Dios.” Kasano a makaaramidtayo iti naimbag ken kasano a matulongantayo ita dagiti sabsabali?
2 Ti maysa a pamay-an a matulongantayo dagiti sabsabali ket babaen ti panangiranud kadagiti ‘napapateg a bambanag’ nga ik-ikutantayo. (Prov. 3:9) Gapu kadagiti kontribusiontayo iti sangalubongan a trabaho, nagbalin a posible ti pannakaibangon dagiti Kingdom Hall, Assembly Hall, ken pasilidad dagiti sanga nga opisina iti intero a lubong. Ti kinaparaburtayo nakatulong kadagiti minilion a tattao a magunggonaan iti teokratiko nga edukasion ken iti panagtitimpuyog a makapabileg iti naespirituan.
3 Panangipaay iti Liwliwa: No dumteng ti didigra, sidadaan dagiti adipen ni Jehova nga ‘agaramid iti naimbag’ kadagiti kapammatianda ken uray kadagidiay ditay kapammatian. (Gal. 6:10) Kalpasan ti napasamak a panagbettak iti maysa a planta ti kemikal idiay Francia, kinuna ti agassawa nga agnanaed iti asideg ti planta: “Dagus nga immay timmulong dagiti Kristiano a kakabsatmi a nangdalus iti apartment-mi agraman ti apartment dagiti dadduma pay nga agnanaed iti pasdek nga ayanmi. Nasdaaw unay dagiti kaarrubami a nakakita iti kaadu dagiti tattao nga immay timmulong.” Innayon ti maysa pay a kabsat a babai: “Sinaranaydakami dagiti panglakayen. Liniwliwadakami. Kinapudnona, ad-adda a kasapulanmi dayta ngem iti material a tulong.”
4 Nupay adu dagiti pamay-an a makaaramidtayo iti naimbag kadagiti kaarrubatayo, ti kasayaatan a wagas a matulongantayo ida ket babaen ti panangiranud iti napateg a pannakaammo iti kinapudno, a pakairamanan ti “namnama iti agnanayon a biag” nga inkari ni Jehova a mismo. (Tito 1:1, 2) Pudno a liwliwa ti itden ti mensahe ti Biblia kadagidiay agladladingit gapu kadagiti kasasaad ditoy lubong ken gapu iti managbasol a kasasaadda. (Mat. 5:4) Sapay koma ta aramidentayo ti naimbag ken tulongantayo dagiti sabsabali no kabaelantayo nga aramiden dayta.—Prov. 3:27.