Itultuloyyo a Pabilgen ti Maysa ken Maysa
1 Inaramid ni apostol Pablo ti amin a kabaelanna a mangpabileg kadagiti kapammatianna. (Ara. 14:19-22) Kasta met, maseknantayo no maipasango dagiti kakabsattayo kadagiti narikut a kasasaad, ket kayattayo a tulongan ida. Ipasimudaag ti Biblia nga amin, saan la a dagiti panglakayen, ti rumbeng a maseknan kadagiti sabsabali. (Roma 15:1, 2) Usigentayo ti dua a pamay-an tapno maipangagtayo ti naayat a balakad: “Itultuloyyo a liwliwaen ti maysa ken maysa ken pabilgen ti maysa ken maysa.”—1 Tes. 5:11.
2 Ammuenyo ti Kasapulan Dagiti Sabsabali: Kuna ti Sao ti Dios a ni Dorcas ket “aduan iti naimbag nga ar-aramid ken sagsagut ti asi.” (Ara. 9:36, 39) Inasikasona dagidiay agkasapulan ken inaramidna ti kabaelanna a tumulong kadakuada. Anian a nagsayaat nga ulidan ti impaayna kadatayo! Mabalin nga adda ammoyo a nataengan a masapul nga ilugan no mapan iti gimong. Wenno mabalin nga adda payunir nga awan kaduana a mangasaba iti malem ti lawlawasna. Panunotem laengen ti pannakapabilegda no tulongam wenno kaduaam dagidiay agkasapulan iti kasta a tulong!
3 Panagsasarita Maipapan iti Naespirituan: Mapabilegtayo met dagiti sabsabali babaen ti panagsasaotayo. (Efe. 4:29) Napaliiw ti maysa nga aduan kapadasan a panglakayen: “No kayatmo ti agbalin a makapabileg, agsaoka maipapan kadagiti naespirituan a bambanag. Tapno mairugim ti makapabileg a saritaan, mabalin nga agusarka iti simple a saludsod kas iti, ‘Kasanoyo a naammuan ti kinapudno?’” Mangipakitakayo iti napasnek nga interes kadagiti agtutubo iti kongregasion. Ipariknayo ti pannakaseknanyo kadagidiay maup-upay ken managbabain. (Prov. 12:25) Diyo ipalubos a ti panagsasarita maipapan kadagiti paglinglingayan ditoy lubong ti mangibus iti tiempoyo a makisarita kadagiti kapammatiantayo maipapan iti naespirituan.—Roma 1:11, 12.
4 Ania ngarud ti ibagayo tapno mapabileg dagiti sabsabali? Iti personal a panagbasa ken panagadalyo iti Biblia, adda kadi nasarakanyo a prinsipio a nangpauneg iti apresasionyo ken Jehova? Adda kadi nangngegyo iti palawag publiko wenno iti Panagadal iti Pagwanawanan a nakapabileg kadakayo? Wenno natukay kadi ti pusoyo gapu iti makapabileg iti pammati a kapadasan? No agurnongkayo kadagiti kasta a naespirituan a gameng, kanayon nga addanto mairanudyo a makapabileg a banag kadagiti sabsabali.—Prov. 2:1; Luc. 6:45.
5 Babaen ti panangitukontayo iti praktikal a tulong ken ti nainsiriban a panangusartayo iti dilatayo, sapay koma ta itultuloytayo a pabilgen ti maysa ken maysa.—Prov. 12:18.