Managbabainkayo Kadi?
1 Ditay pakasdaawan no makakitatayo iti ubing a sumiripsirip kadatayo iti likudan ti ina wenno amana. Natural iti ubing ti kinamanagbabain. Uray kadagiti nataenganen, adu ti medio gagangay a managbabain. No maapektaran ti pannakipasetyo iti ministerio gapu iti kinamanagbabain, ania ti maaramidanyo?
2 Panangdaer iti Kinamanagbabain: Nasken nga ipaayan iti atension “ti nalimed a kinatao ti puso.” (1 Ped. 3:4) Pabilgen ti ayatyo ken Jehova ken iti kaarrubayo. Kombinsidokayo koma a naan-anay a ti panangitungpal iti annongen a mangasaba ket maysa kadagiti kasayaatan a wagas a panangipakita iti managsakripisio nga ayat. Salimetmetanyo ti nasayaat a rutina ti personal a panagadal ken pannakigimong. Regular ken espesipiko nga ikararag ti tulong ni Jehova. Ti nabileg a pammati ken panagtalek kenkuana ket mangpatanor iti kompiansa ken mangipaay ‘iti ad-adda pay a tured tapno awanan buteng nga agsao iti sao ti Dios.’—Fil. 1:14.
3 Sarangten ti pannakarikna iti kinakapuy. Agparang a kastoy ti masapul nga aramiden idi ni Timoteo. Pinaregta ni Pablo ni Timoteo nga “awan koma a pulos ti asinoman a tao a mangumsi iti kina-agtutubo[na],” nga impalagipna kenkuana a “ti Dios inikkannatayo saan a ti maysa nga espiritu ti kinatakrut, no di ket ti pannakabalin.” (1 Tim. 4:12; 2 Tim. 1:7) Naan-anay nga inusar ni Jehova ni Timoteo, ket usarennakayo met no ikagumaanyo ti rumang-ay a buyogen ti naan-anay a panagtalek Kenkuana.—Sal. 56:11.
4 Gapu ta managbabain idi ti maysa a kabsat a babai, kabutengna ti bumusbusor nga asawana. Ngem nakatulong ti panangutobna iti teksto ti Biblia a kas iti Mateo 10:37. Bayat a nagporsegi, nagbalin a nalaklaka kenkuana ti mangasaba, ket idi agangay inawat ti asawa, ina, ken dagiti kakabsatna ti kinapudno!
5 Nasken ti Panagsagana: Ad-adda ti kompiansayo no agsaganakayo a naimbag sakbay a mangasaba. Mangpili iti simple a presentasion iti libro a Panakirinnason wenno kadagiti napalabas a ruar ti Ministeriotayo iti Pagarian, adalenyo dayta, sa ensayuenyo. Imbes a ti la adda a pagdandanaganyo, agpanunotkayo a sipopositibo. Sursuruenyo ti agbalin a natured babaen ti nasinged a pannakipagtrabaho kadagiti sabsabali. Tandaananyo a managbabain met a kas kadakayo ti adu kadagiti tattao a masarakanyo iti binalaybalay. Kasapulan amin a tattao ti mensahe ti Pagarian.
6 No managbabainkayo, dikay maupay. No agporsegikayo, tulongannakayo ni Jehova nga agbalin nga epektibo a manangaskasaba iti naimbag a damag. Iti kasta, masagrapyo ti rag-o iti ministerioyo.—Prov. 10:22.