Nasakbay a Panagplano—Maipaay iti Ania?
1 Sipapanunottay amin kadagiti planotayo iti masanguanan. Dagidiay naindagaan ti namnamada paspasungadenda ti panagbiag nga agnanayon iti nalinteg a baro a lubong ti Dios. Ngem adda dagiti impluensia a mabalin a mangrabsut iti dayta a namnama iti pusotayo. Kasapulan ti napasnek a panagregget tapno agtalinaed a nakasentro ti biagtayo kadagiti aktibidad a mainaig iti Pagarian ken saan a masinga babaen dagiti makasulisog a derrep ti lasag.—1 Juan 2:15-17.
2 Talaga a saan a matarusan ti lubong dagiti kalat ti tattao a mangipangpangruna iti naespirituan a bambanag. (1 Cor. 2:14) Nupay ikarkarigatan ti kaaduan a tattao a ragpaten ti dayaw, pannakabalin, wenno kinabaknang, dagiti naespirituan a gameng ti pagreggetantayo a gun-oden. (Mat. 6:19-21) No padpadasentay nga itunos ti pampanunottayo iti panangmatmat ti lubong maipapan iti masanguanan, maragpattayto ngata dagiti naespirituan a kalattayo? Di agbayag, nailubongan a bambanag ti pakaseknanto unayen ti pusotayo. Kasanotay a malapdan daytoy?
3 “Ikawesyo ni Apo Jesu-Kristo”: Maysa a wagas a pangtingiting no ibangbangontay ti masakbayantayo kadagiti interes ti Pagarian isut’ panangusig iti ibagbagatayo. Kankanayon kadi nga agsasaotayo maipapan kadagiti material a banag ken nailubongan a paginteresan? No wen, masapul nga usigentayo no mapukpukawen ti pusotayo ti panangipangpangruna kadagiti naespirituan a banag. Mabalin a kasapulantay ti ad-adda a panangipaganetget iti ‘panangikawes ken Apo Jesu-Kristo imbes nga aggakattayo a nasakbay maipaay kadagiti derrep ti lasag.’—Roma 13:14.
4 Dagiti agtutubo ‘maikawesda ni Kristo’ babaen ti panagplano a nasakbay maipaay iti aldaw nga iseserrekdanto iti amin-tiempo a ministerio. Maysa nga agtutubo a tinarigagayanna ti ag-regular pioneer ti napadakkel iti maysa a kultura a kinatalged iti pinansial ti agraraira a kustombre para kadagiti agtutubo a lallaki. Gapuna, nakaro ti pannakaigamerna iti negosio agingga a ti pannakigimong ken panangasaba ket kadawyan laengen a banag. Idi nairugina ti agtalek iti sasao ni Jesus a masarakan iti Mateo 6:33 ken nakalapsut iti awanan panggep a rutina a mangibus laeng iti tiempo ken pigsa, simrek iti amin-tiempo a serbisio. Buyogen ti naimbag a konsiensia, agserserbi itan ken Jehova ‘iti amin a kabaelanna,’ kas kinunana.
5 Kunaen ti Biblia a nainsiriban ti agplano para iti masanguanan. (Prov. 21:5) Aramidentay koma amin ti kasta a ti pagayatan ti Dios ti kangrunaan a panunotentayo.—Efe. 5:15-17.