“Kasano a Maaddaanak iti Tiempo?”
1 Dayta ti reklamo ti adu kadatayo, agsipud ta napno ti biagtayo iti aktibidad. Naikuna a ti tiempo ti kapapatgan ngem kalakaan a mapukaw a sanikuatayo. Kasano ngarud a maaddaantayo iti tiempo para kadagiti banag a pudno a napateg, kas iti panagbasa ken panagadal iti Sao ti Dios?—Fil. 1:10.
2 Ti solusion ket saan a ti panagsapul iti ad-adu a tiempo no di ket ti panangikeddeng no ania ti pangusarantayo iti tiempo nga adda kadatayo. Addaantayo amin iti 168 nga oras iti kada lawas, nga agarup 100 iti daytoy ti mabalin a mabusbos iti pannaturog ken panagtrabaho. Kasano ngarud ti kasayaatan a panangusar kadagiti nabatbati nga oras? Ibalakad ti Efeso 5:15-17 a magnatayo ‘saan a kas kadagiti nakuneng no di ket kas kadagiti masirib a tattao, a gatangentayo ti nainggundawayan a tiempo . . . , lasinen no ania ti pagayatan ni Jehova.’ Daytoy ti mangipakita a kasapulan ti panangaprobetsar iti tunggal gundaway a mangaramid kadagiti banag nga ibagbaga ni Jehova a napateg.
3 Inyasping ni Jesus ti kaaldawantayo iti panawen ni Noe. (Luc. 17:26, 27) Okupado idi dagiti tattao iti inaldaw a panagbiagda. Nupay kasta, inwayaan ni Noe ti panangbangon iti dakkel a daong ken panangasaba. (Heb. 11:7; 2 Ped. 2:5) Kasano? Babaen ti panangyun-unana iti pagayatan ti Dios ken panagtulnog kenkuana babaen ti panagaramid iti bambanag a naibilin.—Gen. 6:22.
4 Ania ti Rumbeng nga Umun-una? Kinuna ni Jesus: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.” (Mat. 4:4) Kada lawas, umaw-awattayo iti “abasto a [naespirituan a] taraon iti umiso a tiempo.” (Luc. 12:42) Kalikagumanna ti eskediul para iti regular ken personal a panagbasa ken panagadal tapno maipaunegtayo amin dagitoy no kayattayo ti naan-anay a magunggonaan. Gapu ta pagyamanantayo ti naespirituan a taraon, saantay a matmatan dayta a kasla nabiit laeng a naisagana a taraon, a parparawpaw nga adalen kas iti apurado a pannangan iti literal a taraon. Imbes ketdi, ti umiso a panangapresiar ti mangtignay kadatayo a mangiwaya iti panagadal ken panangtagiragsak kadagiti naespirituan a banag.
5 Mangitunda iti biag nga agnanayon ti pannangan iti naespirituan a taraon. (Juan 17:3) Maikari dayta a maipangpangruna iti inaldaw nga eskediultayo. Maiwayaantay kadi ti inaldaw a panagbasa iti Biblia ken panagsagana para kadagiti Nakristianuan a gimong? Wen, mabalinantayo. Iti kasta, maawattayo ti “dakkel a gunggona” nga itden ti panangammo ken panangaramid iti pagayatan ti Dios.—Sal. 19:7-11.