Ti Teokratiko nga Eskuelaan ti Panagministro iti 2002
1 Tagtagilag-anen ti adu a tao ti abilidad nga agsao. Nupay kasta, ti panagsao ket sagut ti Dios. Gapu ta makapagsaotayo, makasaritatay ti sabsabali ken mayebkastayo dagiti kapanunotan ken riknatayo. Kangrunaanna, maidayawtayo ti Dios babaen dayta.—Sal. 22:22; 1 Cor. 1:4-7.
2 Iti Teokratiko nga Eskuelaan ti Panagministro, masansanay dagiti lallaki, babbai, ken ubbing a mangipakaammo iti nagan ni Jehova. (Sal. 148:12, 13) Ti programa ti eskuelaan para iti 2002 ket saklawenna ti adu a suheto ti Biblia a personal a pakagunggonaantayo ken mausartayo iti ministerio. Babaen ti panagsagana para iti eskuelaan ken pannakipaset iti dayta, maparang-aytayo ti pannakaammo ken kinasigotayo kas mannursuro iti Sao ti Dios.—Sal. 45:1.
3 Basaen ti Biblia nga Inaldaw: No masansan a tugottayo ti Biblia, maaprobetsartayo ti aniaman a nawaya a tiempo a mangbasa iti dayta. Kaaduan kadatayo ti addaan iti sumagmamano a nawaya a minutos iti kada aldaw a mabalintay nga usaren iti kastoy a pamay-an. Anian a makagunggona a basaen ti uray maysa a panid iti kada aldaw, a makaanay tapno madanggayantayo ti programa a panagbasa iti Biblia a naibalabala iti eskediul ti eskuelaan!—Sal. 1:1-3.
4 Ti nalawag a panangibasa iti Biblia tulongannatayo a mangdanon iti puso dagiti agdengdengngeg kadatayo ken mangtignay kadakuada nga agdayaw ken Jehova. Kadagiti estudiante a mangiparang iti Paset Num. 2 iti eskuelaan, nasken nga ulit-ulitenda nga ensayuen a basaen a sipipigsa ti pasetda. Mangipaay iti komendasion ken singasing ti manangaywan ti eskuelaan tapno maparang-ay ti panagbasa.
5 Usaren ti Libro a Panakirinnason: Dagiti paset Num. 3 ken Num. 4 ket naibatay iti libro a Panakirinnason. Kaaduan kadatayo ti nalabit masapul nga ad-adda a mangikagumaan a mangusar a masansan iti daytoy a praktikal a katulongan iti tay-ak ti ministerio. Mangpili koma dagiti estudiante kadagiti eksena a maibagay iti teritoria. Partikular koma a kitaen ti manangaywan ti eskuelaan no kasano ti panangisuro ken panangusarda iti Kasuratan.
6 Ti Teokratiko nga Eskuelaan ti Panagministro tulongannatayo koma amin nga agtultuloy a mangusar iti inted-Dios a sagut ti panagsao a mangipakaammo iti naimbag a damag ken mangidayaw iti Naindaklan a Diostayo, ni Jehova!—Sal. 34:1; Efe. 6:19.