Naisangsangayan a Panagpipinnaregta
1 Inaldaw a masubok ti pammati dagiti adipen ti Jehova. Yantangay ammona a bassit laengen ti natda a tiempona, ar-aramiden ti Diablo ti maudi nga iyaatakena tapno madadael ti kinatarnawtayo ken ni Jehova. (Apoc. 12:12) Napateg a ‘gun-odentayo ti pannakabalin iti Apo ken iti kinabileg ti pigsana’ tapno ‘mabalinantayo ti sumaranget iti nadangkes nga aldaw ket, kalpasan a naan-anay a naaramidtayon ti amin a bambanag, makapagtakdertayo a sititibker.’—Efe. 6:10, 13.
2 Ti pannakitaripnong kadagiti kapammatian ket maysa a probision ni Jehova tapno bumilegtayo. Inapresiar daytoy ni apostol Pablo. Il-iliwenna ti makikadua kadagiti Kristiano a kakabsatna tapno ‘makapagsisinnukatda iti pammaregta’ ken ‘mapatibkerda.’ (Roma 1:11, 12) Tapno bumilegtayo a mangaramid iti pagayatan ti Dios, siaayat nga inyurnos ti Bagi a Manarawidwid a maipaayantayo iti gundaway a makapagpipinnaregta iti mapaspasungad a “Panagtulnog iti Dios” a Kombension Distrito.
3 Tumabuno Tapno Magunggonaan: Ikagumaanyo a tabunuan ti tallo nga aldaw. ‘Magunggonaantayo’ no sumangpettayo sakbay ti panglukat a kanta ken agtalinaed agingga a mayebkastayo ti naimpusuan nga “Amen” iti pangserra a kararag. (Isa. 48:17, 18) Adu ti nasken a mangyurnos a nasapsapa iti eskediulda iti trabaho tapno makatabunoda iti tallo nga aldaw. Agpayso a saan a nalaka ti makisarita iti amoyo tapno palubosannakayo nga agbakasion, ngem makapagtalektayo ken ni Jehova a tulongannatayo a mangaramid iti pagayatanna. (1 Juan 5:14, 15) No ditay pay inaramid daytoy, itan ti tiempo nga iyurnostayo ti pagluganan ken pagdagusantayo, a ditay ipabpabareng dagiti bambanag. Makapagtalektayo a bendisionan ni Jehova ti panangikagumaantayo a makatabuno iti tallo nga aldaw.—Prov. 10:22.
4 Seggaanyo ti Pammaregta: Naikunayo kadin ti kastoy kalpasan ti itatabunoyo iti kombension distrito: “Dayta pay laeng ti kasayaatan!” Apay a nalabit kasta ti nariknayo? Gapu ta kas imperpekto a tattao mabalin nga in-inut a mapaksuyantayo, ket kasapulantayo ti naespirituan a pammaregta. (Isa. 40:30) Kinuna ti maysa a kabsat a babai: “Pakapsutennak daytoy a sistema, ngem dagiti kombension pabaruenda ti naespirituan a panangmatmatko ken ipaayda ti naespirituan a tulong a kasapulak. Kas man la dumteng ti pammabileg iti tiempo a kasapulak unay.” Nalabit nariknayo met dayta.
5 Saan laeng a babaen kadagiti palawag ken interbiu a makaawattayo kadagiti kasapulan a pammabileg no di ket kadagiti dadduma pay a paset dagiti kombensiontayo. Kinuna ti maysa a kabsat a lalaki: “Ti nalawag, praktikal nga aplikasion dagiti prinsipio ti Biblia ti pudno nga apresiarek. Siempre, nakapatpateg dagiti drama ta ipakitada no kasano a magunggonaantayo kadagiti nagkauna nga ulidan, naimbag man dagita wenno dakes. Kankanayon a segseggaak dagiti baro a ruar, ken magusgustuak a basaen ida iti mabayag kalpasan a makaawidak iti pagtaengak.”
6 Napateg a probision ni Jehova dagiti kombension kadagitoy “napeggad a tiempo a narigat a pakilangenan.” (2 Tim. 3:1) Tulongandatayo a mangipangag iti naimpadtuan a balakad nga: “Agtalinaedkayo a siririing, agtakderkayo a sititibker iti pammati, agtalinaedkayo a malalaki, bumilegkayo.” (1 Cor. 16:13) Ngarud, determinadotayo koma a tumabuno iti tunggal sesion ken tagiragsakentayo ti nabaknang a panagpipinnaregta iti “Panagtulnog iti Dios” a Kombension Distrito!
[Kahon iti panid 3]
Iplanoyo a Tabunuan ti Tallo nga Aldaw
■ Agkiddawkayo iti bakasion iti trabahoyo.
■ Agpareserbakayo iti pagdagusanyo iti siudad a pagkombensionan, no kasapulan.
■ Mangyurnoskayo iti paglugananyo a mapan iti pagkombensionan.