No Apay nga Ay-ayatentayo ti Intero a Timpuyogtayo nga Agkakabsat
Iti daytoy awanan ayat a lubong, kasanotayo a masalimetmetan ti nasged nga ayattayo kadagiti naespirituan a kakabsattayo? (1 Ped. 2:17) Kasanotayo a maipakita kadagiti sabsabali a talaga nga addaantayo iti napaypayso ken sangalubongan a panagkakabsat? (Mat. 23:8) Babaen ti video nga Our Whole Association of Brothers. Ipakita daytoy a video dagiti rason no apay nga addaantayo iti ayat iti tunggal maysa. Kitaenyo no masungbatanyo dagitoy a saludsod:
(1) Ania dagiti tallo nga aktibidad nga ar-aramidentayo amin nga agkakabsat iti intero a lubong? (2) Kasano nga ipakpakita dagiti kakabsattayo ti determinasionda a mangasaba (a) kadagiti let-ang ti Alaska, (b) kadagiti dadakkel a pantalan ti Europa, ken (c) kadagiti napuskol a kabakiran ti Peru? (3) Ania ti nangnangruna nga epektibo nga alikamen iti panangasaba? (4) Apay a pulos a ditay koma panunoten a gagangay laeng a trabaho ti panangasaba? (5) Mangtedkayo kadagiti ehemplo no kasano a dagiti Saksi ni Jehova liniwliwa ken sinaranayda ti tunggal maysa kadagiti tiempo ti didigra—ginggined, bagyo, ken gerra sibil. (Kitaenyo dagiti komento ni Takao iti panid 23 iti Agosto 22, 1995, nga Agriingkayo! ken ni Kotoyo iti panid 20 iti Oktubre 22, 1996, nga Agriingkayo!) (6) Kadagiti ania a praktikal a pamay-an a maipakitatayo amin ti naisangsangayan a pakailasinan ti Nakristianuan a panagkakabsattayo? (Juan 13:35) (7) Kasano koma ti rumbeng a panangipategtayo kadagiti gimongtayo iti kongregasion? (8) Kasano a ti kaadda ti Kingdom Hall a paggigimongan apektaranna dagidiay dati nga awanan iti Kingdom Hall? (9) Kasano a nakalasat iti naespirituan dagiti kakabsattayo idiay Makindaya a Europa ken Russia idi naparitanda? (10) Uray pay itan, ania a naisangsangayan a panagregget ti ar-aramiden ti adu a Saksi tapno makatabunoda kadagiti kombension, ken apay? Kasano a naparegtanakayo daytoy? (11) Apay a determinadokayo nga agdayaw a sangsangkamaysa, tumulong kadagiti sabsabali kadagiti tiempo ti panagkasapulan, ken simamatalek a mangasaba iti amin a gundaway ken iti amin a kabaelanyo? (12) Apay a nasayaat a maaddaankayo iti personal a kopia daytoy a video ken ipabuyayo dayta kadagiti amin nga interesado a tattao aginggat’ mabalin?