Rumangrang-ay ti Programa a Panagibangon Kadagiti Kingdom Hall
1 Idi 1983 iti “Panagkaykaysa iti Pagarian” a Kombension Distrito idiay Estados Unidos, nayanunsio ti pannakabukel ti espesial a pondo a pangsuporta iti pannakaibangon ken pannakatarimaan dagiti Kingdom Hall iti intero nga Estados Unidos ken Canada. Ditay ammo idi no aniada a bendision ti ibunga dagita a bassit a pangrugian. Ad-adda idi a matungtungpal kadatayo ti maitutop la unay a kuna ti Salmo 92:4: “Ta pinagrag-onak, O Jehova, gapu iti aramidmo; gapu iti ar-aramid dagita imam agdir-iak a sirarag-o.”
2 Maragsakantayo unay iti mapaspasamak. Maipatpatungpal ita ti napapartak a sangalubongan a programa a panagibangon kadagiti Kingdom Hall. Addaantayo amin iti pribilehio a makiraman iti daytoy nga aktibidad. Ar-aramidentayo dayta babaen ti panangted iti dakkel wenno bassit a pinansial a kontribusion a pangsuportar iti panagibangon iti ad-adu pay a lugar a pagdaydayawan iti intero a lubong. Adu met dagiti kakabsat a nagboluntario a mangusar kadagiti alikamenda ken kasta met iti panawen, abilidad, ken pannakaammoda mainaig kadagita a proyekto. Naballigi dayta nga urnos gapu iti panangiwanwan, tulong, ken nabaknang a pamendision ni Jehova iti nagkaykaysa a panagreggettayo.—Salmo 127:1.
3 Adu a sanga ti nangtulad iti padron nga orihinal a nairanta kadagiti kongregasion idiay Estados Unidos. Kadagiti Kingdom Hall iti adu a pagilian, adda kahon a pangitinnagan dagiti agibumbunannag kadagiti kontribusionda para iti Kingdom Hall Fund. Iti Marso 1997 nga isyu Ti Ministeriotayo iti Pagarian para iti Estados Unidos, adda naipakaammo a panagbalbaliw iti daytoy a programa. Kunana: “Manipud idi nabukel ti Kingdom Hall Fund ti Sosiedad idi 1983, sipaparabur ti panagdonasion dagiti kakabsat, iti kasta, adda maipabulod a pondo para iti pannakaibangon dagiti Kingdom Hall. Addan 2,700 a kongregasion ditoy a pagilian a natulongan iti daytoy nga urnos. No awan ti kasta nga urnos, adu a kongregasion ti saan a makaibangon kadagiti baro a Kingdom Hall wenno makatarimaan kadagidiay masapul a tarimnen. Kasapulan unay ita nga ipabulod ti dadduma kadagitoy a naidonar a pondo kadagiti kongregasion kadagiti napanglaw a pagilian. Ti agtultuloy a panangsuportayo iti daytoy nga urnos ket apresiaren unay ti Sosiedad ken dagiti kongregasion a natulongan babaen dagiti kontribusionyo.”
4 Nagserbi dayta nga anunsio kas awis a makiraman iti napapartak a programa a panagibangon kadagiti Kingdom Hall. Mairamanto iti Kingdom Hall Fund ti kasapulan dagiti kakabsattayo iti dadduma pay a pagilian. Kinuna ti maysa nga artikulo iti Agosto 1997 nga isyu Ti Ministeriotayo iti Pagarian para iti Estados Unidos: “Agtultuloy a masapul a maibangon dagiti Kingdom Hall iti sangalubongan. Iti laengen napalabas a tawen serbisio, 3,288 a baro a kongregasion ti nabuangay. Adu kadagitoy a kongregasion ti adda iti Africa, Asia, Sentral ken Abagatan nga America, ken Makindaya a Europa.”
5 Ania dagiti naibanagen manipud idi? Impadamag ti 2001 Yearbook: “Babaen iti daytoy nga urnos, iti 30 a pagilian, 453 a Kingdom Hall ti nalpasen, ken 727 pay ti maibangbangon. Naipaayan iti atension ti panangaramid kadagiti pagsurotan a plano dagiti Kingdom Hall iti kada pagilian nga agus-usar kadagiti lokal a materiales ken pamay-an ti panagbangon. Idiay Kenya, mausar dagiti tinikap a bato; idiay Togo, gagangay a mausar ti ladrilio; idiay Cameroon, kadawyan dagiti hollow block a mapalitadaan. Iti kastoy a wagas, nabiit a masursuro dagiti lokal a kakabsat dagiti abilidad a kasapulan tapno maited kadakuada dagiti napateg a pagrebbengan iti sidong ti nasional a programa.”
6 Makita iti dakkel a kontinente ti Africa a pudno a bembendisionan ni Jehova daytoy a programa. Bayat a matmatmatanyo dagiti ladawan ti sumagmamano kadagiti Kingdom Hall a naibangonen, panunotenyo no ania ti epekto ti kasta a panagibangon iti trabaho dagiti Saksi ni Jehova! Pudno daytoy iti tallo a benneg—ti panagkaykaysa ti sangalubongan a panagkakabsattayo, ti epektona iti lokal a komunidad, ken ti iyaadu ti tumabtabuno kadagiti gimong ti kongregasion. Nupay itampok daytoy a suplemento dagiti Kingdom Hall a naibangon idiay Africa, ipakitanto dagiti masanguanan nga isyu Ti Ministeriotayo iti Pagarian no kasano a rumangrang-ay iti dadduma a paset ti lubong ti programa a panagibangon kadagiti Kingdom Hall.
[Dagiti Ladawan iti panid 3]
REPUBLIKA TI SENTRAL AFRICA
Bimbo, Bangui
Begoua, Bangui
[Dagiti Ladawan iti panid 4]
Ukonga, Tanzania
[Ladawan iti panid 4]
Accra, Ghana
[Ladawan iti panid 4]
Salala, Liberia
[Ladawan iti panid 4]
Allada, Benin—dati a Kingdom Hall
Allada, Benin—baro a Kingdom Hall
[Ladawan iti panid 4]
Karoi, Zimbabwe
[Ladawan iti panid 5]
Kpeme, Togo
[Ladawan iti panid 5]
Sokodé, Togo
[Dagiti Ladawan iti panid 5]
Fidjrosse, Benin
[Ladawan iti panid 6]
Lyenga, Zambia—dati a Kingdom Hall
[Ladawan iti panid 6]
Lyenga, Zambia—baro a Kingdom Hall
[Ladawan iti panid 6]
Kinshasa, Congo
[Ladawan iti panid 6]
Musambira, Rwanda