Panagbangon Kadagiti Kingdom Hall iti Pilipinas

¹ No kitaentay ti sangalubongan a tay-ak, makaparagsak a makita ti dakkel nga irarang-ay a sagsagrapen ti naindagaan nga organisasion ni Jehova! Itay napan a tawen agdagup iti 3,288 a kongregasion ti nainayon iti sangalubongan. Gapu iti daytoy nga irarang-ay, di pakasdaawan a kasapulan ti ad-adu pay a Kingdom Hall ken panangpasayaat kadagiti naibangonen.

² Ipakpakita ti adu a kakabsat ti naisangsangayan a regta ken suportada iti organisasion ni Jehova babaen ti panangiboluntarioda iti tiempo ken sanikuada iti panagbangon iti Kingdom Hall. Kada tawen, agarup 50 a baro a Kingdom Hall ti maibangbangon ditoy Pilipinas ken adu pay ti mapaspasayaat. Naitalek kadagiti Congregation Building Committee ti panangaywan kadagitoy a proyekto, ket maapresiar ti panagbannogda. Ti intero nga urnos ti panagbangon iti Kingdom Hall ket maar-aramid babaen ti Nakristianuan nga espiritu ti panangted ken panagsakripisio—ti kasungani ti espiritu a gagangay a maipakpakita iti lubong.—2 Tim. 3:2, 4.

³ Taginayonen a Simple ti Disenio ti Kingdom Hall: Rumbeng a kanayon a panunoten ti natimbeng a panagpatakder babaen iti simple ken praktikal a disenio. Yantangay adu ti agboluntario nga agtrabaho kadagiti proyekto a Kingdom Hall, nalabit ipagarup dagiti trabahador a gunggundawayanyo ida no pagibangonen wenno pagikabilenyo ida kadagiti dekorasion nga agkasapulan iti adu unay a trabaho. Ti Kingdom Hall Loans Department iti sanga nga opisina makaipaay iti napateg a kapanunotan a tumulong iti natimbeng a panagdesision maipapan iti disenio ti Kingdom Hall.

⁴ Nupay nakapagpatakder ti dadduma a kongregasion babaen kadagiti napataud a lokal a pondo, agarup 1,000 a sabsabali pay a kongregasion iti napalabas a sangapulo a tawen ti kasapulan nga umutang iti Sosiedad manipud iti Kingdom Hall Fund. No panggep ti kongregasionyo a pasayaaten ti Kingdom Hall-yo ket agkasapulankay iti pinansial a tulong, makiumankayo iti Sosiedad. Sakbay nga umutang iti Sosiedad, masapul nga agsurbey dagiti panglakayen tapno maammuanda no (1) mano ti maitedda iti pangrugian a makatulong iti pannakagatang ti lote ken magasto iti panagbangon, (2) mano ti maipabulod dagidiay naitimpuyog kadagiti kongregasion a maseknan, ken (3) no mano ti maited iti binulan a manglitup kadagiti paggastuan iti panagandar ti kongregasion ken pangbayad iti aniaman nga utang iti Sosiedad. Awan nagan a maipakita kadagiti babassit a papel a maisubli inton maala daytoy a surbey. Nasken nga umiso amin ti isurat dagiti kakabsat, a realistiko nga usigenda ti mismo a maitedda ken ti manamnama a mautang, yantangay dagitoy ti usaren dagiti panglakayen kadagiti nadagsen a desisionda agpaay iti kongregasion. Iti kapadasanmi, nasayaat a padasen ti maaramidan iti lokal babaen ti panangpataud iti Kingdom Hall Building Fund iti sumagmamano a bulan sakbay nga umutang iti Sosiedad.—Luc. 4:28-30.

⁵ Panangpattapatta iti Magasto ken Wagas ti Panagkuenta: Sakbay a mairugi ti proyekto a panagbangon iti Kingdom Hall, rumbeng a siaannad a mapattapatta dagiti magasto iti panagbangon sakbay nga aktual nga umutang. Makatulong daytoy tapno saan a maparigat dagiti agibumbunannag iti nadagsen unay nga eskediul ti panagbayad. Kasta met, agtalinaed dayta a kuarta iti Society Kingdom Hall Fund nga usaren ti sabsabali a kongregasion nga ad-adda nga agkasapulan iti nasaysayaat a Kingdom Hall. (Fil. 4:5) Nupay mabalin nga agkurang ti badyet gapu kadagiti di ninamnama a paggastuan, mabalin a karkuluen ti umiso a kuenta babaen ti nasayaat a panagplano ken panangusig.

⁶ Ti proyekto a panagbangon iti Kingdom Hall ramanenna ti panaggasto ti kongregasion iti dakkel a kantidad. Masapul a siguraduen dagiti panglakayen nga umiso ti pannakausar ti pondo. Masapul a masalimetmetan dagiti umiso a rekord ti kuenta, ken rumbeng a binulan a maited ti nabatad a report kadagiti kongregasion a maseknan. Siguraduen koma ti mamangulo a manangaywan a masukimat iti kada tallo a bulan ti pondo iti panagbangon ken amin a mainaig a kuenta a kagiddan ti regular a kuenta ti kongregasion. Nupay kasta, iti tiempo ti panagbangon ken bayat nga adu ti bayadan, nasken a binulan a masukimat ti kuenta. Masapul ti naan-anay nga anamong ti kongregasion iti proyekto kalpasan ti naan-anay a pannakailawlawag dagiti detalye ken dagiti mapattapatta a magasto. Kalpasanna, rumbeng nga umiso ti pannakaaprobar amin a mabayadan sakbay ti panagbayad. No nalpasen ti proyekto, rumbeng a nabatad a makuenta amin a naggastuan.

⁷ Nasayaat ti Trabaho a Maitulong Dagiti Boluntario: Agyaman ti Sosiedad kadagiti adu a boluntario a tumultulong iti panagbangon iti Kingdom Hall. Pudno a makaay-ayo a makita ti linaklaksa a boluntario nga agsaksakripisio iti amin nga aspeto ti panagbangon iti Kingdom Hall. Naballigi daytoy a programa gapu iti espiritu ti kinatulok, kinamanagparabur, ken panagtitinnulong dagiti boluntario a trabahador a mangisakripisio iti tiempo a maipaay koma kadagiti kongregasion ken pamiliada. (Sal. 110:3; Col. 3:23) Maikarida iti komendasion, apresasion, ken naan-anay a panangsuportatayo gapu iti daytoy a kinamanagayatda.—Roma 12:10; Heb. 13:1.

⁸ No maibangbangon ti Kingdom Hall, mabalin ti agawis kadagiti agibumbunannag kadagiti kabangibang a kongregasion a tumulong iti proyekto. Aramiden daytoy ti Congregation Building Committee babaen ti panagsuratda kadagiti mamangulo a manangaywan dagiti kabangibang a kongregasion ken ipakaammoda nga agkasapulanda iti tulong. Napateg ti serbisio a maaramidan dagiti amin a makapagboluntario.

⁹ Panangannad a Saan a Nalabes ti Panaggasto iti Panagbangon: Rumbeng nga agbirok dagiti Congregation Building Committee iti nababa a presio babaen ti panamagdilig ken pagkokompetensiaenda dagiti aglako. Iti kastoy a wagas, maikeddengda no sadino ti paggatanganda ken no ania dagiti material a rumbeng a gatangen. Tapno sigurado a makaekonomia iti pondo, masapul nga aprobaran ti Congregation Building Committee amin a paggastuan a maala iti pondo a pagbangon.

¹⁰ Makatulongtay Amin: Addaantay amin iti gundaway a mangted iti pinansial a tulong para iti Society Kingdom Hall Fund sigun iti ipalubos ti kasasaadtayo. Sipud idi naipasdek ti Society Kingdom Hall Fund, rinibu a kongregasion ti natulongan a maaddaan kadagiti Kingdom Hall. Adu ti kongregasion a saan koma a naaddaan iti kasta a nagsayaat a paggigimongan no saan a gapu iti naayat a panagkakabsat a naiparangarang babaen iti naparabur a suportayo iti Society Kingdom Hall Fund. Daytoy ti pondo a maipautang iti panagbangon kadagiti baro a Kingdom Hall. Bayat nga agtultuloy ti pannakaisubli ti kuarta, maipabulod dagitoy a pondo iti sabsabali pay a kongregasion nga agkasapulan.

¹¹ Dagiti Ebkas ti Panagyaman: Idi nalpasen ti baro a Kingdom Hall-da, kastoy ti insurat ti maysa a kongregasion iti Sosiedad: “Nagsuratkami tapno agyaman iti naayat a tulongyo iti pannakaibangon ti baro a Kingdom Hall-mi. Nalpasen a naan-anay ti Kingdom Hall-mi ken naidedikaren ken Jehova, ket napalaus ti panagyaman ti kongregasion gapu ta addaanen iti kasta ti kapintasna a pasdek a pagdaydayawan ken Jehova. Kanayon a siraragsak a sinuportaran ti kongregasionmi ti Society Kingdom Hall Fund ken dagiti lokal a proyekto iti panagbangon ket itultuloymi nga aramiden ti kasta, a sipapanunotkami iti dakkel a panagkasapulan dagiti sabsabali pay a kongregasion tapno magunggonaanda iti daytoy nagsayaat ken napateg a probision.”

¹² Inyebkas ti sabali pay a kongregasion ti panangapresiarda iti naipaay a naayat a tulong kadakuada, a kunkunada: “Iyebkasmi ti napalaus a panagyamanmi kadakayo gapu iti tulong ti Society Kingdom Hall Fund. No awan dayta narigrigat ken naibayag koma pay ti pannakaipatakder ti Kingdom Hall[mi]. Talaga a makita ti kinasirib ni Jehova iti daytoy nga urnos.”

¹³ Ti Trabaho iti Masanguanan: Addaantay amin iti rason nga agrag-o bayat a sanguentayo ti panagkasapulan iti ad-adu pay ken nasaysayaat a Kingdom Hall. Addaantay koma iti espiritu ti panagtutunos—nga agtitinnulong ken naan-anay a suportarantayo daytoy nagpateg a trabaho. (Sal. 133:1) Anian a ragsaktayo yantangay addaantay kadagiti lallaki a dinutokan ti organisasion ni Jehova a mangidaulo iti naespirituan a bambanag ken iti panagbangon kadagiti kasapulan a pasilidad! Nagkiddaw ni Pablo kadagiti taga-Filipos a kunkunana: “An-anayenyo ti rag-ok iti panagmaymaysayo iti panunot ken panagmaymaysayo iti ayat.” (Fil. 2:2) Pudno nga addaantay iti rason nga agragsak, yantangay naitalek kadatayo ti naimbag a damag ti naipasdeken a Pagarian a masapul a ‘maikasaba iti isuamin a mapagnaedan a daga a maipaay a pangsaksi kadagiti isuamin a nasnasion’ sakbay nga umay ti panungpalan. (Mat. 24:14) Ti di maisin nga idadasigtayo iti dayta a Pagarian ken panagtrabaho a sisusungdo maipaay iti interesesna isu ti mangparagsak iti puso ni Jehova. “Anakko, agsiribka, ket paragsakem toy pusok, tapno masungbatak ti mangumsi kaniak.” (Prov. 27:11) Anian a naisangsangayan ti pribilehiotayo a makapagtitinnulong ken sirarag-o a makibinnulig ken Jesu-Kristo iti trabaho ni Jehova!