Panagibangon iti Kingdom Hall—Napateg nga Aspeto ti Sagrado a Panagserbi
1. Ania ti nagapuananen iti panagibangon iti Kingdom Hall, ngem ania pay ti kasapulan?
1 Iti napalabas a tallo ket kagudua a tawen, 150 a Kingdom Hall ti naibangonen ditoy Pilipinas. Apresiarenmi unay ti kinapinget dagiti Kingdom Hall Construction Group ken dagiti amin a timmulong kadakuada. Nupay adun a trabaho ti nairingpas, adu pay laeng ti masapul a maaramid iti panagibangon iti Kingdom Hall. Kasano a masuportarantayo amin daytoy napateg nga aspeto ti sagrado a panagserbitayo ken ni Jehova?—Apo. 7:15.
2. Kasano a direkta a masuportarantayo ti trabaho a panagibangon iti Kingdom Hall?
2 Kinamasindadaan: No bautisadoka nga agibumbunannag, awisendaka nga agboluntario a makipagtrabaho iti Kingdom Hall Construction Group babaen ti panangsuratmo iti Application for Kingdom Hall Construction Volunteer Program (A-25). Maala daytoy a porma iti kongregasionyo wenno mabalin ti agkiddaw iti dayta iti sanga nga opisina babaen kadagiti panglakayen. No maaprobaran, maawiska nga agtrabaho iti proyekto a panagibangon iti Kingdom Hall iti uneg ti tallo agingga iti innem a bulan. Uray no awan ti suratam nga aplikasion, maipakitam met ti kinamasindadaanmo no agboluntarioka iti maysa wenno dua nga aldaw wenno uray makalawas iti aniaman a maibangbangon a Kingdom Hall iti sirkitoyo wenno iti kabangibang a sirkito. Situtulok nga agtrabaho ken mannakikooperar koma dagiti amin nga agboluntario. (Sal. 110:3; 133:1) Uray no saanka a nasigo iti panagibangon, adu latta ti maitulongmo tapno agballigi ti proyekto a panagibangon. Masanayka met tapno agbalinka a nasigsigo iti masanguanan.
3. Ania dagiti sabali pay a pamay-an a maipakitatayo ti suportatayo iti daytoy nga urnos?
3 No saanka a makapagboluntario, maipakitam ti suportam babaen ti panangparegtam kadagiti sabsabali a makiraman iti dayta nga urnos. No adda pagrebbengan iti kongregasion dagidiay agtartrabaho iti proyekto a panagibangon iti Kingdom Hall, mabalinmo ti tumulong a mangaramid kadagita. Babaen ti nasakbay a panagplano, masigurado dagiti panglakayen a maasikaso a naimbag ti kongregasion uray no ti dadduma ket agtartrabaho iti proyekto a panagibangon iti Kingdom Hall. Awan duadua a maay-ayo ni Jehova no sangsangkamaysa nga agtrabahotayo maipaay iti pannakayadelantar dagiti interes ti Pagarian.—Heb. 13:16.
4. Kasano a maparegtatayo dagidiay makiramraman iti proyekto a panagibangon iti Kingdom Hall?
4 Mangparegta: Adu a tiempo ken pinget ti ramanen ti panagibangon kadagiti pasdek a pagdaydayawan. Ngarud, nalawag a dagidiay naawis a tumulong iti proyekto a panagibangon ket awanda iti kongregasionda no dadduma. Alertotay koma a mangkomendar ken mangparegta kadagiti boluntario iti panagibangon, nga agsaksakripisio tapno maasikaso daytoy “nasken nga aramid.”—Ara. 6:3; Roma 14:19.
5. Kasano a maipakita dagiti boluntario iti panagibangon ti kinabalanse?
5 Panagbalin a Balanse: Ti panangikasaba iti Pagarian ti Dios ti kangrunaan a nateokratikuan nga aktibidadtayo. (Mar. 13:10) Gapu ta silalagipda iti daytoy, ikagkagumaan dagiti Kingdom Hall Construction Desk ken Regional Kingdom Hall Office nga iyeskediul ti proyekto tapno adda gundaway dagiti boluntario a makiraman a regular iti ministerio iti tay-ak. Umasping iti dayta, ikagumaan met dagiti boluntario iti panagibangon ti agbalin a balanse iti panangasikasoda kadagiti naespirituan a responsabilidadda.
6. Ania ti maitungpal no amin a miembro ti kongregasion ket makitunos a sangsangkamaysa tapno mayadelantar ti pudno a panagdayaw?
6 Dineskribir ni apostol Pablo dagiti miembro ti kongregasion kas sangsangkamaysa nga agtartrabaho “maipaay iti idadakkel ti bagi maipaay iti mismo a pannakapabilegna iti ayat.” (Efe. 4:16) Ti ayattayo ken ni Jehova ken iti pudno a panagdayaw tignayennatayo a makitunos a sangsangkamaysa tapno maikasaba ti naimbag a damag ken masuportaran ti panagibangon iti Kingdom Hall.