Maysa a Napasnek a Pammaregta nga Ipangag Dagiti Pasamak a Pakaballaagantayo Ita
Maparayraytayo amin ti determinasiontayo nga agtalinaed a natarnaw babaen ti panangipapuso kadagiti leksion manipud iti naibatay-Biblia a drama a naipabuya iti video a Warning Examples for Our Day. Sakbay a buyaenyo, pangngaasiyo ta basaenyo ti Numeros kapitulo 25 ken dagiti mainaig nga impormasion iti Insight on the Scriptures, Tomo 2, panid 419, parapo 3-5. Kalpasanna, sungbatanyo dagitoy a saludsod: Siasino dagiti Moabita, ken apay a ni Jehova binilinna ni Moises a dida makigubat kadakuada? (Deut. 2:9) Kasano a ginandat ni Balaam nga usaren dagiti Moabita a mangdadael iti nasion ti Israel? Apay a ditay koma liplipatan nga adu nga Israelita ti napaay iti maysa a napateg a pannubok sakbay unay ti iseserrekda iti Naikari a Daga?—1 Cor. 10:11, 12.
Bayat a buybuyaenyo ti video a Warning Examples, usigenyo dagiti sumaganad nga uppat a benneg ti biag a masapul nga ipaayantayo iti atension ita tapno makapagtalinaedtayo a matalek ken matagiragsak ti anamong ti Dios. (1) Kababalin: Kasano nga impakita ti dadduma nga Israelita ti di umiso a kababalin ken ni Jehova ken kadagiti urnosna? Imbes ketdi, ania a kababalin ti nasken nga iyanninawtayo? (2) Katimpuyog: Apay a di kayat ni Jehova a makigayyem dagiti Israelita kadagiti Moabita? (Ex. 34:12; Prov. 13:20) Apay a masapul a nainsiriban ti panangpilitayo kadagiti gagayyemtayo? (3) Moral: Ti dakes a pannakitimpuyog intuggodna ti agarup 23,000 nga Israelita iti ania a nadagsen a basol? (1 Cor. 10:8) Ita, ania ti nanggargari iti dadduma nga adipen ti Dios nga agaramid iti imoralidad, ngem kasanotayo a masalakniban ti bagitayo? (4) Panagdayaw: Kasano a nasubok dagiti Israelita no maipapan iti kinasin-aw ti panagdayawda? Iti ania a nasikap a kita ti idolatria ti mabalin a pakatnagan ti dadduma ita, ngem kasano a maliklikantayo dayta?—Col. 3:5.
Iti drama, kasano a nabendisionan ni Jamin gapu iti moral a kinatarnawna? Babaen daytoy a video, ania ti napasnek nga iparparegta ti Bagi a Manarawidwid iti amin a pudno a Kristiano? No maysaka nga ama, apay a nainsiriban no ulit-uliten a buyaen ti pamiliam daytoy a video?