Maikari Unay a Maidaydayaw ni Jehova
Marambakan ti Pangrabii ti Apo Inton Abril 16
1 Rumayrayray ti panagseggatayo bayat nga umas-asideg ti Abril 16, 2003. Iti dayta a rabii, laglagipentayo ti ipapatay ni Jesus, a makidanggaytayo kadagiti minilion a padatayo a managdaydayaw iti sangalubongan a mangitan-ok iti nagan ni Jehova. Maikari ni Jehova iti amin a panagdayawtayo gapu iti subbot, a maysa a naindaklan a sagutna. Babaen iti dayta, iburaynanto dagiti agkakaimbag a bendision iti intero a natulnog a sangatauan. Naimpusuan a makidanggaytayo iti salmista a mangikuna iti kastoy: “Ni Jehova naindaklan ken maidaydayaw iti kasta unay.”—Sal. 145:3.
2 Tiempo daytoy ti panangutob iti kinaimbag ti Dios ken iti utangtayo a naimbag a nakem ken ni Jehova gapu iti panangibaonna iti “bugbugtong nga Anakna ditoy lubong tapno magun-odantayo ti biag babaen kenkuana.” (1 Juan 4:9, 10) No sitatallugod a rambakantayo ti Pangrabii ti Apo, maipasagepsep iti pusotayo a “ni Jehova managparabur ken naasi . . . ken naindaklan iti naayat a kinamanangngaasi.” (Sal. 145:8) Wen, ti subbot ti katan-okan nga ebkas ti ayat ni Jehova iti sangatauan. (Juan 3:16) No utobentayo ti ayat ti Dios ken panunotentayo ti di maisin a kinatarnaw ni Jesus, matignaytayo a mangidaydayaw ken ni Jehova. Iti agnanayon, idaydayawtayo gapu iti aglaplapusanan nga ayatna iti panangipaayna kadatayo iti gundaway nga agbiag nga agnanayon.—Sal. 145:1, 2.
3 Tulonganyo Dagiti Dadduma a Mangidayaw ken ni Jehova: Ti panangapresiar iti subbot, ti kasayaatan a sagut ti Dios, tignayennatayo a mangawis kadagiti dadduma a makidanggay kadatayo a mangidaydayaw ken ni Jehova. Napaltiingan nga insurat ti salmista: “Iti pannakadakamat ti kinaruay ti kinaimbagmo agyesngawdanto, ket gapu iti kinalintegmo agdir-idanto a sirarag-o.” (Sal. 145:7) Idi napan a tawen laeng, nasurok a maysa a bilion nga oras ti nabusbos dagiti Saksi ni Jehova iti sangalubongan iti trabaho a panangasaba. Ania ti bunga ti panagbannogda? Kada lawas, agpromedio iti nasurok a 5,100 ti nagpabautisar kas simbolo ti panagdedikarda ken ni Jehova. Yantangay agdagup iti 15,597,746 ti timmabuno iti Memorial, a pakairamanan ti nasurok a 9 a milion a saan pay a mangidaydayaw ken ni Jehova kas agibumbunannag iti naimbag a damag, dakkel ti pangnamnamaan iti kanayonan nga irarang-ay! Kas manangiwaragawag iti Pagarian, ipatpategtayo ti pribilehiotayo a mangipakaammo iti naimbag a damag ken mangiturong iti puso dagiti dadduma ken ni Jehova, iti Anakna, ken iti Pagarian.
4 Ti maysa a nasayaat a pamay-an tapno maparegta dagiti dadduma a mangidayaw ken ni Jehova ket babaen ti panangawis kadakuada a makidanggay kadatayo a mangrambak iti Pangrabii ti Apo. Nailistayo kadin dagiti amin a kayatyo nga awisen agraman dagiti dadduma pay a nalabit nasken a mapalagipan maipapan iti aldaw ken oras? Inikkanyo kadin iti imbitasion amin dagidiay adda iti listaanyo? No saan pay, aramidenyo dayta bayat nga adda pay tiempo. Tulonganyo ida a mangtarus iti panggep ti okasion. Iti Memorial, alistokay koma a mangkablaaw kadagiti bisita. Abrasaenyo ida, iyam-ammoyo ida kadagiti dadduma, ken komendaranyo ida gapu iti kaaddada.
5 Magutugot dagiti kabbaro a rumang-ay iti naespirituan no tumabunoda iti Memorial. Timmabuno iti Memorial ti maysa a mayad-adalan iti Biblia. Gapu ta addaan iti post-traumatic stress disorder, narigat unay kenkuana ti makipulapol kadagiti tattao. Idi napagsaludsodan no ania ti makunana maipapan iti pannakitaripnongna, kinunana: “Nasantuan unay a rabii dayta, ket addaak sadiay.” Makigimgimongen manipud idi.
6 Kalpasan ti Memorial: Ania ti mabalin nga aramiden tapno matulongan dagitoy nga interesado nga agbalin a managdaydayaw ni Jehova? Tandaanan dagiti panglakayen dagidiay damoda ti tumabuno iti Memorial ken ipasarungkarda ida kadagiti kualipikado nga agibumbunannag di agbayag kalpasanna tapno mairepaso kadakuada dagiti makapabang-ar a banag a nasursuro ken napaliiwda. Nalabit kayat dagiti dadduma ti mayadalan iti Biblia iti pagtaenganda. Maawisda met koma a tumabuno kadagiti amin a linawas a gimong ti kongregasion, yantangay ad-adu ti masursuroda iti Biblia no regular a tumabunoda.
7 Adda dagiti maar-aramid nga urnos tapno maparegta a makigimong a regular dagiti amin a di regular ken di aktibo. No kiddawen dagiti panglakayen a tulonganyo ti maysa a di aktibo tapno makiraman manen iti serbisio iti tay-ak, sidadaan koma a tumulongkayo. Ti panangipakita iti kasta a naayat a pannakaseknan kadagiti kakabsattayo ket maitunos iti pammagbaga ni apostol Pablo: “Bayat nga addaantayo iti mainugot a tiempo a maipaay iti dayta, aramidentayo koma ti naimbag kadagiti amin, ngem nangnangruna kadagidiay nainaig kadatayo iti pammati.”—Gal. 6:10.
8 Ikagumaantay koma amin ti tumabuno iti Memorial inton Abril 16. Ditay kayat a liwayan daytoy kasasagraduan nga okasion a pakaidayawan ni Jehova. Wen, ita ken iti agnanayon, idaydayawtayo ni Jehova gapu kadagiti naindaklan nga aramidna!—Sal. 145:21.