Mangyeg iti Rag-o ti Grupo a Panangasaba
1 Idi imbaonna a mangasaba dagiti 70 nga adalanna, insuro ni Jesus kadakuada no ania ti ibagada, inorganisarna ida a sagdudua, ken imbagana no sadino ti pangasabaanda. Nangyeg daytoy iti rag-o kadakuada. (Luc. 10:1-17) Kasta met ita, ti grupo a panangasaba ket makatulong a mangkabal, mangorganisar, ken mangparegta kadagiti adipen ti Dios a mangasaba.
2 Mangidaulo Dagiti Panglakayen: Napateg ti akem dagiti panglakayen iti panangtulong kadagiti amin a makiraman a regular iti trabaho a panangasaba. Ti manangaywan iti serbisio ti mangidaulo a mangaramid kadagiti urnos para iti panangasaba iti lawlawasna. Ti manangaywan iti panagadal iti libro ti mangorganisar iti panangasaba ti grupona, nangruna iti ngudo ti lawas. Kadagiti tiempo nga agtataripnong ti intero a kongregasion sakbay ti panangasaba, kas no kalpasan ti Panagadal iti Pagwanawanan, ti tunggal manangaywan iti panagadal iti libro ti mangaramid kadagiti urnos para iti grupona.
3 “Sitatakneng ken Sigun iti Urnos”: Ti natudingan a mangikondukta iti taripnong sakbay ti panangasaba ket rumbeng a mangrugi iti eksakto nga oras ken limitaranna ti taripnong iti 10 wenno 15 a minuto. Nasayaat no isu ti mangyurnos kadagiti grupo a mapan mangasaba ken mangituding iti teritoria (malaksid no dagiti manangaywan iti panagadal iti libro ti mangasikaso iti daytoy, kas nadakamaten) sakbay nga ingudona ti taripnong babaen ti kararag. Iti kasta, saan nga aguummong dagiti agibumbunannag iti teritoria, ta makadadael dayta iti dignidad ti trabahotayo. Maitunos met dayta iti balakad ni Pablo: “Amin a bambanag maaramid koma a sitatakneng ken sigun iti urnos.” (1 Cor. 14:40) Naballigi ti kasta nga urnos no saan a naladaw a sumangpet dagiti amin a tumabuno kadagitoy a taripnong, makikooperarda a naan-anay iti mangidaulo, ken mapanda a dagus iti teritoria apaman a malpas ti taripnong.
4 Pagbalinennatayo a Nasinged ken Nagkaykaysa: Dagiti urnos para iti grupo a panangasaba ket mangipaay iti nagsayaat a gundaway tapno maam-ammotayo a naimbag dagiti dadduma iti kongregasion. Nupay mabalin ti makitulag a nasaksakbay iti pakikaduaantayo a mangasaba, makagunggona met ti tumabuno kadagiti taripnong sakbay ti panangasaba nga awan ti nakitulagantayo. Mabalin a matudingantayo a makikadua iti maysa a ditay unay am-ammo, iti kasta ‘lumawa’ ti ayattayo.—2 Cor. 6:11-13.
5 Ti grupo a panangasaba paregtaennatayo ken pagbalinennatayo a nasinged iti maysa ken maysa kas “katrabahuan iti kinapudno.” (3 Juan 8) Sapay koma ta naan-anay a makiramantayo iti dayta!