Saludsod
◼ Maireport kadi iti kongregasion ti sangapamiliaan a panagadal iti Biblia?
No mangikondukta ti maysa a Kristiano a nagannak iti sangapamiliaan a panagadal iti Biblia a pakairamanan dagiti di bautisado nga annak, mabalinna nga ireport ti di sumurok a maysa nga oras iti kada lawas, maysa a panagsarungkar iti kada lawas, ken maysa a panagadal iti Biblia iti pagtaengan iti kada bulan. Kasta ti ireportna uray no nasurok a maysa nga oras ti panagadalda, saan la a maminsan a maangay iti kada lawas, wenno saggaysa nga iyadalanna dagiti annakna.—Kitaenyo ti libro a Ministeriotayo, p. 104.
No bautisado a Saksi ti amin a kameng ti pamilia, saan a maireport ti oras wenno ti panagadal a mismo (malaksid no ad-adalen pay laeng ti maysa nga anak ti maikadua a libro kalpasan ti bautismo). Ngamin, ti report ti kongregasion kangrunaan nga ipasimudaagna no ania ti magapgapuanan iti panangikasaba iti naimbag a damag ken panangisuro iti kinapudno iti Biblia kadagidiay saan pay a dedikado ken bautisado nga adipen ni Jehova. (Mat. 24:14; 28:19, 20) Nupay kasta, di kayat a sawen daytoy a maksayan ti pateg ti regular a panangangay iti kasta a panagadal.
Dagiti Kristiano a nagannak pagrebbenganda nga iyadalan dagiti annakda. Dagidiay makasapul iti tulong iti panangipasdek wenno panangpasayaat iti sangapamiliaan a panagadalda mabalinda ti agpatulong kadagiti panglakayen. No kasapulan a sabali nga agibumbunannag ti mangikondukta iti panagadal iti Biblia iti di bautisado nga anak ti maysa a Kristiano a pamilia a naitimpuyog iti kongregasion, nasken ti pannakiuman iti mamangulo a manangaywan wenno iti manangaywan iti serbisio. No maaprobaran ti kasta a panagadal, daydiay mangikondukta mabalinna nga ireport dayta a kas met laeng iti sabali nga iyad-adalanna iti Biblia.
Ad-adu nga amang ti oras ken panagregget a ramanen ti panangisuro kadagiti annak maipapan kadagiti dalan ni Jehova ngem ti agparang iti report. (Deut. 6:6-9; Prov. 22:6) Makomendaran dagiti Kristiano a nagannak gapu iti panangibaklayda iti nadagsen a responsabilidad a mangpadakkel kadagiti annakda “iti disiplina ken panangiturong-panunot ni Jehova.”—Efe. 6:4.