Saludsod

◼ Ireport kadi nga agpadpada dagiti nagannak ti oras a mabusbosda iti regular a panagadal ti pamilia?

Nupay dagiti amma ti kangrunaan a makinrebbeng iti panangpadakkel kadagiti annakda “iti disiplina ken panangiturong-panunot ni Jehova,” adda akem ti tunggal nagannak a mangsanay kadagiti annakda. (Efe. 6:4) Iparegta ti Biblia kadagiti annak: “Umimdengka, anakko, iti disiplina ni amam, ket saanmo a baybay-an ti linteg ni inam.” (Prov. 1:8) Ti maysa a napateg a pamay-an ti panangsanay dagiti nagannak kadagiti annakda ket ti sangapamiliaan a panagadal iti Biblia.

Iti napalabas, kadagiti pamilia nga addaan iti di pay nabautisaran nga annak, ti laeng mangikondukta iti panagadal ti pamilia ti mangireport iti oras uray no duada a makisarsarita kadagiti annakda. Ngem nabalbaliwanen dayta. No agbinnulig dagiti nagannak iti panangisuro kadagiti annakda bayat ti panagadal ti pamilia, isuda a dua ket mabalin a mangireport iti di nalablabes ngem maysa nga oras kada lawas kas serbisio iti tay-ak. Siempre, ad-adu nga amang ngem maysa nga oras iti kada lawas ti busbusbosen dagiti nagannak a mangisuro kadagiti annakda. Ti panangsanay kadagiti annak ramanenna ti di agsarday a panagregget. (Deut. 6:6-9) Nupay kasta, ti koma nangnangruna nga agminar iti binulan a report iti serbisio iti tay-ak ket dagidiay nagapuanan iti tay-ak. Gapuna, uray no ti panagadal ket napapaut ngem maysa nga oras, wenno saan laeng a naminsan a naikondukta dayta iti makalawas, wenno saan a naggigiddan a nayadalan dagiti annak, saan koma a nalablabes ngem maysa nga oras ti ireport iti serbisio iti kada lawas. Maysa laeng kadagiti nagannak ti mangireport iti panagadal ti pamilia iti Biblia ken saan met a nasursurok ngem maysa a panagsarungkar ti maireport iti tunggal lawas a pannakaikondukta dayta a panagadal.