Naespirituan a Taraon iti Umiso a Tiempo
1. Kasano a matungtungpal ita ti Ezequiel 36:29?
1 “Awagak ti bukel ken paaduek, ket saanakto a mangipagteng kadakayo iti nakaro a bisin,” kuna ni Soberano nga Apo Jehova. (Ezeq. 36:29) Agaplikar dagita a naimpadtuan a sasao kadagiti adipen ti Dios ita. Iti piguratibo a pannao, pinagtubo ni Jehova ti adu a makaited iti biag a bukbukel nga agpaay kadagiti adipenna. Sibabatad a naipakita dayta iti naintiempuan a taraon a maipapaay babaen kadagiti kombension distritotayo.
2. Kasano nga inusar ni Jehova dagiti kombension distrito a mangipaay iti naespirituan a taraon iti umiso a tiempo?
2 Iti kombension a naangay idiay Columbus, Ohio, idi 1931, tinignay ni Jehova dagiti agdaydayaw kenkuana a mangawat iti baro a nagan—Saksi ni Jehova. (Isa. 43:10-12) Idi 1935, siuumiso a nailawlawag no siasino ti mangbukel iti dakkel a bunggoy a nadakamat iti Apocalipsis 7:9-17. Idi 1942, impalawag ni Kabsat Knorr ti diskurso a “Talna—Agpautto Aya?” Dayta a palawag ti nangidur-as iti sangalubongan a trabaho a panangasaba ken nangiturong iti pannakabuangay ti Watchtower Bible School of Gilead. Nupay ad-adda a nakallalagip ti dadduma a kombension, tunggal maysa ket kasla lamisaan a nakaidasaran ti nawadwad a makapakired a naespirituan a taraon iti umiso a tiempo.—Sal. 23:5; Mat. 24:45.
3. Ania ti nasken nga aramidentayo tapno magunggonaantayo iti naespirituan a padaya iti kombension distritotayo?
3 Kasano ti Pampannanganyo? Uray no mapalikmutantayo iti taraon, agbisintayo latta no masaduttayo a mangan. (Prov. 26:15) Pudno met dayta iti naespirituan nga anag. Kadagiti sumagmamano a kombension, adda dagiti nakapaliiw nga adu ti agpagnapagna wenno makiin-innestoria kadagiti dadduma bayat ti programa. Nupay napateg a paset ti kombension ti makapabileg a panaglalangen, maaramid koma dayta sakbay ken kalpasan ti tunggal sesion. (Ecl. 3:1, 7) No awantayo iti pagtugawantayo ken saantayo nga umim-imdeng a naimbag, mabalin a maliwayantayo ti napateg a punto. Dagiti manangaywan kadagiti departamento ti kombension ken dagiti kakabsat nga addaan iti annongen ket mabalin a sagpaminsan nga agsasaritada maipapan kadagiti banag a mainaig iti kombension kabayatan ti sesion. Ngem no awan ti as-asikasuenda, masapul a mangipasdekda iti ulidan babaen ti panagimdengda iti programa. Awan koma kadatayo ti mangliway iti aniaman a maidasar a naespirituan a taraon.—1 Cor. 10:12; Fil. 2:12.
4. Kasanotayo a maipakita ti panagyamantayo iti nawadwad a naespirituan a taraon nga ipapaay ni Jehova?
4 Pagrag-oantayo unay ti nawadwad a naespirituan a kinapudno nga ipapaay ni Jehova, a maisupadi kadagiti saan a makapakired nga ulbod a doktrina ti Kakristianuan! (Isa. 65:13, 14) Ti maysa a pamay-an a ‘maipakitatayo a managyamantayo’ ket babaen ti panangibilangtayo iti kombension kas gundaway nga agpaisuro ken Jehova. (Col. 3:15) Ipamaysatayo a denggen ti mensahe, saan a ti agpalpalawag, ken matmatantayo a ti mensahe ket naggapu iti ‘Naindaklan a Manangisuro kadatayo.’ (Isa. 30:20, 21; 54:13) Dumngegka a naimbag. Inotarmo dagiti kangrunaan a punto. Repasuem dagiti napateg a punto iti programa iti karabiyan ti tunggal aldaw ti kombension. Iyaplikarmo ti nasursurom.
5. Dagiti kombension distrito ket mangted kadatayo kadagiti ania a rason tapno agrag-o?
5 Amin a kombension sakbay ti Armagedon, maangay man dayta iti kampo dagiti nagbakuit, iti pagilian nga adda ti gubat, wenno kadagiti nataltalna a lugar, ket panagbiktoria a maibusor ken ni Satanas! Kas nagkaykaysa nga agkakabsat, ipatpategtayo dagiti gundawaytayo nga agtataripnong kadagiti kombension distrito. (Ezeq. 36:38) Makapagtalektayo a siaayat nga ipaayannatayo manen ni Jehova iti “abasto a taraon iti umiso a tiempo.”—Luc. 12:42.
[Kahon iti panid 4]
Mangipakita iti Apresasion iti Lamisaan ni Jehova
◼ Dumngegka a naimbag
◼ Inotarmo dagiti kangrunaan a punto
◼ Repasuem dagiti napateg a punto iti programa iti karabiyan ti tunggal aldaw ti kombension
◼ Iyaplikarmo ti nasursurom