Tuladenyo ti Kababalin ni Jesus
1. Ania a kababalin ti imparangarang ni Jesus?
1 Nupay ditay nakita ti Anak ti Dios, nasursurotayo nga ayaten babaen ti naisurat a pakasaritaan ti biag ken ministerio ni Jesus. (1 Ped. 1:8) Kas panagtulnog iti pagayatan ni Amana, pinanawanna ti natan-ok a saadna idiay langit ket immay ditoy daga. Idi nagbiag kas tao, situtulok a nagserbi kadagiti sabsabali ket idi kamaudiananna, intedna ti biagna gapu iti sangatauan. (Mat. 20:28) Idagadag kadatayo ti Sao ti Dios: “Pagtalinaedenyo kadakayo daytoy a kababalin iti isip nga adda met ken Kristo Jesus.” Kasanotayo a matulad ti kinamanagsakripisiona?—Fil. 2:5-8.
2. Ania ti kasasaad dagiti adu a Kristiano, ket ania ti makatulong kadakuada?
2 No Nabannogtayo: Uray no perpekto ni Jesus, nakarikna latta iti bannog. Naminsan, idi a “nabannog iti panagbaniagana,” naan-anay a kinasabaanna ti maysa a Samaritana. (Juan 4:6) Kasta met laeng ti kasasaad ti adu a Kristiano ita. Kalpasan ti makalawas a makabannog a panagsapulda iti pagbiag, mabalin a mariknada nga awanen ti pigsada a makiraman iti trabaho a panangasaba. Nupay kasta, mabang-arantayo iti naespirituan no regular a makiramantayo iti Nakristianuan a ministerio.—Juan 4:32-34.
3. Kasanotayo a matulad ti kinamasindadaan ni Jesus a mangisuro?
3 Iti sabali pay a gundaway, nagturong ni Jesus ken dagiti adalanna iti awan matataona a lugar tapno aginanada bassit. Ngem adu ti nakaammo iti dayta ket nagtatarayda a simmurot kadakuada. Immun-unada a simmangpet iti nasao a lugar. Imbes a maringgoran ni Jesus, “simnek ti asina kadakuada” ket rinugianna nga “isuro ida iti adu a banag.” (Mar. 6:30-34) Tapno makairugi ken makaikondukta iti panangyadal iti Biblia, kasapulan ti kasta met laeng a kababalin. Kasapulan ti pinget ken napaypayso a panagayat kadagiti tattao. No awan ti iyad-adalanyo iti Biblia iti agdama, dikay mauma nga agbirok.
4. Kasano a ti panag-auxiliary pioneer matulongannatayo a mangtulad iti kababalin ni Kristo?
4 Ipangpangrunayo Dagiti Naespirituan a Banag: Ti panag-auxiliary pioneer matulongannatayo nga ad-adda a mangipamaysa kadagiti naespirituan nga aktibidad. Insurat ti maysa nga agtutubo a kabsat a babai: “Ti ina ti maysa kadagiti gagayyemko pinaregtanakami a kaduaenmi nga ag-auxiliary pioneer iti makabulan. Imbag laengen ta kinaduaanmi. Ad-adda a naam-ammok dagiti kakabsat, ket di nagbayag, imbilangdak a kasla miembro ti pamiliada. Tinagiragsakko met ti ad-adu pay a gundaway a makisarita kadagiti sabsabali maipapan ken ni Jehova ken mangisuro kadakuada kadagiti agkakaimbag a kinapudno maipapan iti Pagarian. Dagitoy ti namagbalin kaniak a nasingsinged ken ni Jehova ken iti organisasionna.”—Sal. 34:8.
5. Apay a masapul nga agtultuloy nga ikagumaantayo a tuladen ti kababalin ni Jesus?
5 Nupay tarigagayantayo a paragsaken ni Jehova, nasken a makidangadangtayo iti imperpekto a lasagtayo. (Roma 7:21-23) Masapul a sarangtentayo ti nailubongan a kababalin nga agkedked nga agsakripisio. (Mat. 16:22, 23) Iti tulong ti nasantuan nga espiritu ni Jehova, mabalinantayo nga aramiden daytoy. (Gal. 5:16, 17) Bayat nga ur-urayentayo ti pannakaisalakantayo nga agturong iti nalinteg a baro a lubong ti Dios, sapay koma ta tuladentayo ti kababalin ni Jesus babaen ti panangipangpangrunatayo kadagiti banag a mainaig iti Pagarian ken ti pagimbagan dagiti sabsabali imbes a ti bukodtayo a pagsayaatan.—Mat. 6:33; Roma 15:1-3.