No Ania ti Ibagayo Maipapan Kadagiti Magasin

Ti Pagwanawanan Abr. 15

“Adda dagiti agkuna a pagayatan ti Dios ti amin a mapaspasamak, agraman dagiti didigra. Napampanunotyo kadin dayta? [Palubosanyo a sumungbat.] Adu ti makaammo iti daytoy a kararag. [Basaenyo ti Mateo 6:10b.] Ania ti pagayatan ti Dios para iti daga, ken kaanonto a naan-anay a matungpal dayta? Ipakita daytoy a magasin ti sungbat ti Biblia.”

Agriingkayo! Abr. 22

“Ditoy lubong ita, adda dagiti tattao nga awanan namnama. Kasta kadi ti riknayo no dadduma? [Palubosanyo a sumungbat. Sa basaenyo ti Roma 15:4.] Ammo ti kaaduan a tattao a napateg ti maaddaan iti namnama. Iti daytoy a ruar ti Agriingkayo!, sigurado a pagragsakanyo nga usigen ti pito a Nainkasuratan a rason no apay a di rumbeng a maawanantayo iti namnama.”

Ti Pagwanawanan Mayo 1

“Gapu ta kayatda a pasayaaten ti kasasaad ti sangatauan, makiramraman iti politika dagiti dadduma a panguluen ti relihion. Nupay kasta, paliiwenyo no ania ti inaramid ni Jesus idi kayat dagiti tattao a pagbalinen nga ari. [Basaenyo ti Juan 6:15.] Impamaysa nga insuro ni Jesus ti maysa a banag nga agpaay iti manayon a pagimbagan dagiti sabsabali. Ilawlawag daytoy a magasin no ania dayta.”

Agriingkayo! Mayo 8

“Adu a tattao ti narigat ti sasaadenda iti panggedan. Dagiti dadduma ket irurrurumen pay ketdi dagiti katrabahuanda. Ammoyo kadi a naglaon ti Biblia iti pammagbaga a makatulong kadatayo a mangsango kadagiti kasta a kasasaad? [Palubosanyo a sumungbat. Sa basaenyo ti Proverbio 15:1.] Mangipaay daytoy a magasin kadagiti praktikal a singasing no kasano a mataginayon ti natalna a relasion kadagiti katrabahuan.”